Filipoo Nenacaauru Rai 3

Ena nenaa Cana Coaunera Ere rauhi que acaauru relaa Faboro ne

1Cana Curuaanaa Jesocurisito coitucuera neein neeichene jaun raotojoeein rachoojoeein neeuchera chasocuru. Jauriaana inara rai laenasihunlu niqui. Nena jerichanejeein coaiteen enacoaauneein caa laenaain letoareeunni, raotojoeein coitucuhin neeichene coina.

2-3Coaracuche, “Esinae rauhijiriin Cana Coaunera Ere tonorana jeriquichene, inara jaberoco cari sauhichenete neere”, naain inara coritaa nii nechu aansai, jaberoco cari saaurerane coataa. Nitohaneeinte niqui cojunacaacoaa nitohanaine coina cacha relaelu Moisesa inoaenlu niqui. Nete inae cau chauratane que turuha Jesocurisitone jaun, inae nene nitohanai, inae Jesocurisito Suujue que cana suujua cojunacatiha Cana Coaunerana jaun.

4Canuhetonaine Isaraele nefoerate esine neein Moisesa aitoonjoan tonoraera neein neeunlu jauriaa itolere amuritoheriin. 5Inae fosa janoniha nejanoaanune janate, cajabereeon cari jiununuhin moloorelu, Isaraele esine nichaaun- Isaraele niha canu inacane jaun. Canune Beenjamiin lauri caje nefoeratenaa neeun. Ebereeo ere quete ereeure cafojiaraauru, jerichanejeeina chu acaauru rijijieein Ebereeo ere que ereeun. Canune fariseeo neein Moisesa aitoonjoan rijijieein ichaera neein neeunlu. 6Casuujua coaarihei amuneeinne Cana Coaunera Calaohi Jesocurisito ere tonoraaurera cairichaeriin nerejetoonlu. Jataainna rauhijiriin Moisesa aitoonjoan rijijieein icharaaetoonlu.

Nii jaunte caque chaque erenaa nainenelu chunei.

7Nitohaneeinte carai nelateeinneein nelu carai nii Moisesa aitoonjoan niqui. Nena inae canu ichao coriha Jesocurisitone jaun, inae enene jianeeun, inae nelateniha caraine jaun.

8Nitohaneeinte inae Cana Coaunera Calaohi Jesocurisito coitucuhanune jaun, carai inae nelatene, nii jauriaa carai nelateein. Cana Coaunera Calaohi Jesocurisito ere tonoraanune jaunna jitariin nii itajeeun. Coatiha canu rai chaque nelatejeehai nii jitariin canuhacha itajei, inae que jaolecohanune jaun. Cana Curuaanaa Jesocurisito coitucuhin 9aina nihanune coreniha inae chaque nelatihei nii jauriaanejeein nenaa. Coatiha nii Moisesaacha aitoonjoan tonoraanune coreniha jianacoon caeterihei Cana Coaunera. Jesocurisito esenetaanune corenihate, jianacoon caete Cana Coaunera.

10-11Aihana jaunna Cana Coaunera Calaohi Jesocurisito suujua que suujuequiin nihanune jereeun. Acaihanejein nitohaneein nihanunena coacuun. Charijieein teeinti necairichanaa abaantaain ohane caje ichanaain nelu Cana Coaunera Calaohi Jesocurisito. Nii rijijieeina canuhetonai nenaa jereeun.

Itolere jianeeinne satono que turuhane reentiaain laraajiin nereeunni.

12Coatiha, “Inae esinae rauhijiriin aca jerihane rijijieein nihanu”, naain irihanune jaun aitohaaun. Nena laen Aca jerihane rijijieein sacureeunni, caa baiha rijijieein nihanune coina.

13Coatiha, “Rijijieeina inae neeun”, naanune caun aitohaaun. Itolere canuhacha icharaaetilu jianeeinne jelai choae jauhecotojoeriin laraajiin nereeunni satono que tiaain, 14Jesocurisito aina cuaain cana rai niicha teeni tihane coina cana raain nihalu Cana Coaunerane jaan raanune coina.

15Caitono tocohaneein coaaucaachenete ne, esinae rauhijiriin cana suujua coitucuhin, Jesocurisito esenetaeraneein ijiin niha cana suujuane coina. Jana ainihanete, inara que nii coaaratereein Cana Coaunera, inara netonai nii coaraain coitucuhichene coina. 16Nete laen inae nii coitucuujihacachene rijijieein tonoraain ichaohacachene caohachae.

17Chasocuru charijieein teeinti cha ichaain neeun, nii rijijieein inara netonai cha ichaain neeuche. Chaaen nii aihacaanune rijijieein nenacaauruhacha ichai rijijieein cha ichaain neeuche inara netonai.

18Inae araai saain aitocoaaun. Niite jataain canu inaderajae. Atiinne coaiteen aitoreeunni. “Cana Coaunera coitucuhanu”, naainte niqui ere cacha tabaauru, nete satiin coreniha coroso que ohin nihalu Jesocurisitone saijieein aina nejeratenaa tocohaneein ichaaore, joaenreein necairichanaa abaatana nainecurenihane jaun.

19Nitohaneein ichaonacaaurute nitajiha cuurureein, necoejenaa charaneein ataebinae rijijieein ichaaoruhane jaun. Cana Coaunera coacuelanaala, acaihanejein caa chauratane que nenacaauru itolereeicha que coaaucuruhane jaun. 20Nitohaneein nihaacache laen cana. Dede curuaanaa neein niha cana Curuaanaa Jesocurisitone jaunte, dede cocoaicha neein nihacache. Aihana jaunte nacoauneein dede caje fauha uha nii jianacoon cana mitaera Jesocurisitone cohajihacache. 21Acate cana jaberoco coriha cureein culocohin rai jaberoco tocohaneein necaohacha que necaohachaain. Itolere amuritonaa nainihane jaan aina cuaainte nitohaneein ichareein.

Currently Selected:

Filipoo Nenacaauru Rai 3: URA

Highlight

Compare

Copy