Éxodo 5

Egipto curuaanaa Faraaon aina ereeuruha Moisesa aina Aaroonne

1Nii baiha jetaote, rai rauhijiriin beein Moisesa letoaa Cana Coaunerane jana, biha cue Egipto curuaanaa Faraaon rai, Aaroon aina Moisesa. Nitohaneein beratiha Cana Coaunerane jaun cuhin turuhin jetaote:

“ ‘Canu cachaauru Isaraelitaauru jianeeute cacha areroo cuhin canu coroajeein canu belaiha beseta ichacurumiincha’, naainte ichei berate Isaraelita nichaanune coaunera Cana Coaunera”, naain jetao be Moisesa Faraaon rai.

2Nii jana jetaote: “Chaneeina ne Isaraelitaauru Curuaanaa, rai nere tonoracaaune coina”, naa Egipto curuaana Faraaon acaauru raine 3jana jetao:

“Ebereeo nichaanune coaunera Cana Coaunerate canacaanu que tacaa uhera. Nii jaunna nichata janoin coamueraneein cacha areroo cuhin canacaanu iri sohin mocohin que cana curuaanaa itolere coaunera neein nenaa Cana Coaunera belaihacaanune coina curichaanu nabana canacaanu ateinaa cunai quene coataara. Ainihane chaelai coata ajinai que canacaanu ateinaane coataara”, naaure jetao Aaroon aina Moisesacuru, Egipto curuaanaa Faraaon rai.

4Nii jana jetaote, Aaroon, Moisesa, naaonjoai rai jetao: “Chanuna cachaauru suujua auhacaaiche namihaneeo que neeuru janata. Chajaaincha amihanenihuche”, nae jetao Aaroon, Moisesa naaonjoain rai Egipto curuaanaa Faraaon.

5Chaaen jetaotechu, “Chanuna jana caa Egipto batane que neein amihanenacaauru arajiin Isaraele cocoaichacuru jianeratiha uhiche inara”, nae jetao Egipto curuaanaa Faraaon Aaroon, Moisesa naaonjoain rai.

6Niritiin jetaote, nii cojoanonaa bananeein nii amihanenaa beraichaneein nenacaauru letonocuru letoaain jetao acaauru rai:

7“Jiaonriha inae caa Isaraele cocoaichacuru rai omane teeichenera. Inae caalai caje amunaa jerecuruhana jaun, acaauru raajenihane omane ariin ladiricho ichacurumiincha. 8Nii jana, jauriaanejeein ichacuruhane araaineein ladiricho ichacurenihane, jiaonriha leinjiinejein fautaain ichacuruhane jeriquichenera. Atiin jeelai araineein ichacuruhane coina, jataain mijiaaineein acaauru conujueein letoanajaauchera. Inae jataain bajeritooruhara, nihei leinjiinejein ladiricho ichacuruhi enanetojoeeinta. Acaaurute, ehequiin, ‘Coanete cana irihuru sohin mocohin que Cana Coaunera belainichaachera’, naain niicha que ereereeca neeure. 9Aihane jaun, amihanenaacha que acaauru sirichuchete amunaa nainecureneeine. Ainihanete nechu casaje esenetaain amuurureeincha”, naen jetao rai cachaauru beraihurera rai Egipto curuaanaa Faraaon.

10Nii jaun jetaote, nii Isaraele cocoaichacuru rene turuin jetao, “Egipto curuaana Faraaonte, inae inara rai omane tihacaanune jerene. 11Aihana jaun, enacaje coaauneein, inara raajenihane omane ariin raain ladiricho ichacuchera. Nii coreniha nihein jeelai fautaeriin ladiricho ichaquichene jerihei Egipto curuaanaa Faraaonta”, naaunre jetao, nii amihanenaa beraichaneein nenacaauru, Isaraele cocoaichacuru rai.

12Nii jana jetaote, nii aroso suuri rijijieein nenaa omane ariha cajihaneein amuhemuhecure nii Egipto batane que nii Isaraele cocoaichacuru. 13-14Nitohaneein jetaote, inetono janonaa bana naineein jetao, Isaraele cocoaichacuru conujueein letoanajaaure nii Egipto curuaanaa Faraaon letononeein Isaraelitaauru amihaneeo beraichaneein nenacaauru, jauriaanejeein ichacuruhane araaineein adobe ichacuruhane coina. Nii choae tacaain jetaotechu, nii ladiricho ichana naiinaaureniha nii Isaraelitaurune jana jetao, acaauru curuaanaacuru sohajeein jetao:

“Chanuna, raca caje coaunein ichaquichene saijeein enanetojoeein jauriaanejeei ichaquichenejeeoneein ichasineeicheta”, naain jetao, cotainajaaure nii Faraaon letononeein amihanenaa beraichaneein nenacaauru Egipto cocoaichacuru.

15Nii jana jetaote, Egipto curuaanaa Faraaon nenajaun cuhin jetao, nii Faraaon rai:

“Chanuna jataain mainajeein catohaneein ii cachaauru que canacaanu cairichaerateei. 16Omane telanaala naaonjoaainche natiin, jeelai araineein adobe ichacaanune jereein, conujueein canacaanu letoaaiche. Nii choae tacaain canacaanu soore ii cachaauru”, naauruha nii Isaraele cocoaichacurune jana jetao:

17“Nechu jataain bajeritoichene jaunte, inara bajeri caaun, ‘Canacaanu iri sohinne mocohin que Cana Coaunera belaiha curichaanura’, naaichera. 18Chajaaincha amihanenihuche. Inara rai teraeniha omanene niha natiin, atiin jeelai araaineein ladiricho ichaain, teeichenetenera”, nae jetao nii Isaraelitaauru rai Egipto curuaanaa Faraaon.

19Nii jana jetaote, caaintati amihanenaa que aitiin, jauriaanejeein ichacuruhane araaineein ladiricho ichaain, bananeein nainaain teeuruhane coina acaauru rai aitoha Faraaonne jaun jetao, nii que nererojoecaaure jataain caaintatiin coaracuruhane jaun nii Isaraele cocoaichacuru. 20Nitohaneein nii Egipto curuaanaa Faraaon rene turuhin, ereeuruha Faraaon ainane caje acaauru jana jetaote, Aaroon aina Moisesa cohajeeure Isaraelitaauru. 21Nii jaun jetaote, Aaroon aina Moisesa rai jetao:

“Catohaneein canacaanu terateein neeichene coarajeeinte inara casetecareein Cana Coaunerara. Inarate chujian nii ujuaihoneein neeiche, catohaneein canacaanu cairichaa Faraaon, rai cachaauru ainane coinara”, naaure jetao, nii Isaraele cocoaichacuru Aaroon aina Moisesa rai.

Cana Coaunera bajaa Moisesane.

22Niritocuruhane jaun jetaote, “Chaanate catohaneein caa cachaauru cairichaaita Curuaanaa; chanuunajia caletuaita, curuaanaa 23Ii, Curuaaneein netiin Faraaon aina iriha cuhanune caje coauneeinte, jeelai amuritoheriin ii cachaauru cairichaaure. Nete nihei chatohanei ichaeneei acaauru ichoterateeine coinara”, naain jetao Cana Coaunera bajae Moisesa.

Currently Selected:

Éxodo 5: URA

Highlight

Compare

Copy