Ichanohichuru 25

Feseto acatiha niha Faborone

1Inae coberenadoro nihane coina, Sesareea turuhin, coberenadoro neein enohane baiha jetaote, nichata janohane cuhane jetao, Sesareea caje, Jerosaleeun cue jetao Feseto. 2Nii jana jetaote, cuu rai Faboro colurujueeure jetao, nii Jerosaleeun nenacaauru, batirichuru curuaanaacuru, Jorioocuru rai jataain nelateein nenacaauru naaonjoainuri jetao, Faboro colurujueeure. 3Nitohaneein, colurujueein jetaote:

“Atiin canacaanu rai, cau Jerosaleeun nii Faboro joaerateeura”, naain bajaaure jetao, bero cataaun coaarateein, Faboro sohin joaerateeuruhane coina coacuhin niqui. 4-5Ne jetaote:

“Cuute, Sesareea caseteconeein nedaelura. Nena, ena chajaaojoaain jelaiha cureeunnicha. Inae jelaiha cuhanune janate, nainecure cajiniichaain uhin, cuu teein, chaaelai que situha, nii cachane, colurujuenaa nainecure inara rai jataain nelateineein nenacaauru cocoainanacaihurura”, naachae jetao, acaauru rai Feseto.

6Nii Jerosaleeun, fosa janone nihane, lechoonca janoneein nihane baiha jetaote, jelaiha Sesareea cauha cue jetao Feseto. Nii cojoanoo jetaote, ita colurujeeurera rucuhecuruhana jaan coloheri tribonal asae rori ichoae nelauriaain jetao, Faboro raerate. 7Inae Faboro turuaauruhane jana, enoha Faborone jana jetaote, rohan nichuuntaacoaain jetao, colurujueeure Jerosaleen caje uhin turunacaauru Jorioocuru. Itolere baaso cuhane cuaainchuru, joaereein caje erenaa rocohichuru, colurujueeure jetao, baaso ichaenihane sainejeein. Nii jaun jetaote, esinae rauhijiriin erenaa nihane coitucuurene. 8Nii jaun jetaote, acaaentonai, rai jabereco coreniha jetao:

“Coatiha chatoanai baaso que irihaun, Jorioocuru aitoonjoa, Jorioocuru ichao coacuhinta. Niheichu, ita taojiananaja Teenforo coacuhin irihaunta. Niheichu Romanocuru curuaanaa coacuhin irihaun baasoneeinta”, naain jetao, ere Faboro.

9Nii jaun jetaote, caohachaain Jorioocuru aina nedanaa jerihane jaun jetao:

“Cureeina Jerosaleeun, cuu teein nii ichei rucuhenacai rucuhecaaunne coinaneta”, naain jetao, Faboro caje bajae Feseto.

10Nii jana jetaote:

“Nena jerichanejeein, Romanocuru curuaanaa cana netonai curuaanaa enferadoro icharatenohi neruujuenaanaja coloheri tribonal asae caa neeun, cau teein neruujuenaa nainichaaune coinara”, naain jetao, tonorae Faboro. Niritiin tonoraain jetao te: “Ii te, raotojoeein Jorioocuru rai baaso ichaenihanune coitucuhin neeicha. 11Esinae rauhijiriin, jataain baaso ichaain, baaso que situhin nihanune coaraain, nii coreniha casohin cajaonaa jerera nihane, coatiha nii caohaterihaaun, coatiha onaa coasihaaun. Jana, esinae rauhijiriin, erenaa nenihane, nihei chunei acaauru rai canu tenaa nainihei, casohin cajaaoruhane coina. Nii jaunna, ii caje bajareeunni, raajenihane canu rai rucuhenacai rucuheca Romanocuru curuaanaa eenferadorone coinara”, nae jetao Faboro.

12Nii jaun jetaote, nii cuu nenacaauru rai coroatajaneraauru caohachaain suujua rauhi coaaraauru caje jetao bajae Feseto. Nitohaneein, bajaane baiha jetaote:

“Inae Romanocuru curuaanaa, ii rucuhecane coina bajaaine jaunte, Romanocuru curuaanaa rene curiquiincha”, nae jetao Feseto, Faboro rai.

Curuaanaa Aquirifa acatiha niha Faborone

13Nii baiha neenejeein jetaote, namujera Berenisi aina jiniiquiin cuhin, Sesareea turuha cue, curuaanaa reey- Aquirifa, Feseto coaraane coina. 14Cuu araai janohin aina niha nii curuaanaane jaun jetaote:

“Cautene leinjiin cacha caseteconeein Ferisiicha ratirilura”, naain jetao, bee Feseto. 15Niritiin beein jetaote: “Jerosaleeun turuhanune janate, carai colurujeeurelu batirichuru curuaanaacuru, saain Jorioocuru bichauhenaauru, naaonjoainuri, casetecaanune coinara. 16Nena, acaauru rai: ‘Coatiha nainihei aonaeniha cachane jana, nedaa colurujueein niha namute cachane, nii colurujuenojoi cacha casetecaain, chatohaneein teein, sohin joaera jereein, naaonjoaain niha Romanocuru rai rauhineta. Niha ita colurujueranete, ita acatiha netiin, nii colurujuera aina iriha nii colurujuenojoinete jere Romanocuru rai rauhicha’, naaina acaauru rai beeunra”, naain jetao beebeje Feseto. 17Niritiin beebejeein jetaote: “Nii jaunna, cau turuuruha nii satiin colurujueeurerane jana, nii cojoanoonecoriin, cacha rucuhecaaunne jaan coloheri tribonal asae rori ichoae nelauriaain, nii cacha raerateeun, nii rucuhecaaunne coina, 18inacojoeein niqui, ‘Chatohaneein jecha sosereein, chatohaneein Romanocuru curuaanaa aitoonjoa tonoraa cachane caohatihane coreniha jecha carene letoaaure’, naain niqui. 19Nete, leinjiin acaihanejein, nii acaauruacha esenetai que aitiin, chaaen nii onaalu Jesosoneein curuajai queecha maroaain colurujueeure, ‘Enanetojoeein jete, ichoae’, naa que Faborone jaun. 20Nii jaunna, nii aina, chaa coitucuenihanune jaun, Faboro rai: ‘Cureeina Jerosaleeun, cuu nii ichei rucuhenacai rucuhequine coina’, naain bajaaun. 21Nii janate, ‘Cana curuaanaa, Romanocuru curuaanaa enferadoro jete, rucuhere raajenihane’, naain bajae, cana curuaanaacha rucuhecane coina. Nii jaunna, rucuheca eenferadorone coina letoaanunereein tiaain, caseteconeein nihane coina aitoon”, naane jana jetaote:

22“Canuhetonaine, iriha nii cachane aohana jereeunra”, nae jetao, curuaana reey Aquirifa, Feseto rai. Nii jaun jetaote:

“Eresite aohariquiincha”, naain jetao tonorae Feseto.

23Nitohaneein jetaote, nii cojoanoo, ita taojiaauruha cachaaurune jaan coloheri asae, netaojiaauruhane jana, enoha cuure jetao, jataain nelateineein neeuruhane coaarateein Berenisi aina, reey Aquirifa, chaaen soondarooru curuaanaacuru aina nii cuu nenacaauru nese cocoaichacuru, jataain nelateein nenacaauru naaonjoainuri aina jiniiquiin. Nii jana jetaote, Faboro joracaerateein jetao, raerate caresero caje, Feseto. 24Nii jana jetaote, inae turuaauruhane jana:

“Reey Aquirifa, satiin cau canacaanu aina netaojiaain nenacaauru, nocoa caa cacha colurujuenojoi. Satiin Jorioocurute, carai colurujueeure. Saain Jerosaleeun nenacaauru, cau Sesareea nenacaauru, naaojoaihurite nujuae soaisoaihanaain, ‘Sohin joaerateeura’, naain jataain ohane jerecure. 25Nete, chatohaneein baaso ichaene, caa cacha. Nihein sohin jaoha cachana jaan leranu carai. Nete raajenihane rucuheca cana curuaanaa Romanocuru curuaanaa eenferadorone coina, bajaane jaun, inae nii jerichaaune jaun, ucuae letoareeunicha”, nae jetao Feseto. 26Niritiin jetaote:

“Nete nene, ‘Naaonjoaain que situhin, naaonjoaain ichana jaunte, caa cacha colurujeeurera’, naain beein, laenaain, canu curuaanaa Romanocuru curuaanaa enferadoro rai, beein quiicha letoaaene. Nii jaunna, satiin cau neeichene jaun, caa raerateeun, caohachaain, ii cau neeina jaunra curuaanaa Aquirifa. Inara acatiha teein, bajaanune, raotojoeein tonaain ereeuruhane, laenaain letoanaa nainichaaun, cana curuaanaa enferadoro raine coinara. 27Jana, ‘Naaonjoaain corenihane, caa ii rene, caa cacha letoaaura’, naain chaaelai que tonaain benihanunete, ‘Chanuna joaereein, caa cacha letoae, lera colane’, naain nii que, nererojoecare cana curuaanaa Romanocuru curuaanaara”, nae jetao Feseto.

Currently Selected:

Ichanohichuru 25: URA

Highlight

Compare

Copy