Ichanohichuru 16

Faboro aina Silasi corihaniha cuha Timoteeone

1Nitohaneein cuhin jetaote, Derebeeu, chaaen Listrau, naaonjoaihun, turuha cue Faboro. Nii jana jetaote, cuu leeinjiin cacha Jesocurisito esenetaera Timoteeoneein curuajai Jorioo bene que nebaain Curieco que inacanaa ruha cue Faboro. Nii neba jetaote, Jesocurisito esenetaera ne. 2Satiin Listrau, Iconioo, naaonjoaihun nenacaauru Jesocurisito coreniha cana nejeraauru jetaote, “Aca jete, jataain, caohacha cachaneein ne”, naaure jetao que, coitucuureraauru. 3Niritiin, rai beeuruhane jaun jetaote, acaauru corihaniha cuha Timoteeone jere Faboro. Nitohaneein acaauru corihaneraanu que amaauruhane coina jetaote, Timoteeo jabereco cari jihununurateein, saerate Faboro. Nabana rautaelanaala, que nererojoecaauruha cuu nenacaauru Jorioocurune coataa jetaote, nitohaneein terate Faboro, inae, satiin cuu nenacaauru Jorioocuru, Curieconeein niha Timoteeo inacane coitucuuruhane jaun. 4Nitohaneein, acaauru aina Timoteeo amaain cuhin jetaote, situuruna jaun nenacaauru neseeuru naineein, Jorioniheichuru Jesocurisito esenetaerauru rai jetao, aitiin berateeuruha afosotooru aina Jerosaleeun nenacaauru Jesocurisito ranojoihunru coaaraaurune rijitojoeein beebejeein jetao cuujeeure. 5Nitohanihane jaun jetaote, jelai choae jauhecotojoeriin, esenetajeein cuujueein nejeeontejeein, sacuure Jesocurisito ranojoihunru.

Leeinjiin Masedonia cocoaicha que, Faboro notaaca Cana Coaunerane

6Asia batane que nenacaauru rene cuhin beebejeeuruhane jereniha Cana Coaunera Suujuane jaun jetaote, rauhijiriin cuure, Firijia batane, Galasia batane, naaonjoaihunri jeloon situhin. 7Nitohaneein jetaote, rauhijiriin cuhin, Misia batane nunuhe que turuha cuure. Jelai caje coaauneein jetaote, Bitiniau batane que turuha cunaa coaaucure niqui. Ne jetaote, cuuruhane caohate jetao, Jesoso Suujue. 8Nii jaun jetaote, nirijieein, rauhijiriin Misiau turue lanaala, rauhijiriin situhin, Toroasi cofauhanau, turuure. 9Ecu netiin jetaote, janotiin sinihu coetacai rijitojoeein leeinjiin cacha Masedonia cocoaicha que notaaca Cana Coaunerane jaun jetao, nii Masedonia cocoaicha aina, itaque tacaa cue Faboro. Que tacaain jetaote, nacatiha nichaauraain: “Atiin, Masedoniau, turuha uute, cuu canacaanu relaaicha”, nae jetao, Faboro sinihu. 10Nitohaneein notaaca Cana Coaunerane biha Faborone jaunne, nii rijijieein neruujueein, Masedoniau cuhacaanu. “Jerihane, cuu Jesocurisito que erejeein beebejenaa coinate, cuu cana cotiharate, Cana Coaunerara”, naaina, cuhacaanu.

Filipoo turuuruha Faboro aina Silasine

11Nitohaneeina, Toroasi cofauhanau caje, nesaruna leeinjiin bote cuhane fauhin, cucuana cuhane cuujueein, rauhijiriin Samotoroasi cobenau, tacanacanejeein cuhacaanu. Nii cojoanoo cuhine, turuha cuhacaanu Neapolisiahu. 12Jelai, cajena, atane choae cuhin, Filipoo turuha cuhacaanu. Nii Filipoo te, Masedonia batane que nenaa nese tabaaineein Romanocuru nejesina que cocoaichaquiin nenaane. Cuuna inata janojoeein, neeorihacaanu. 13Nitohaneeinna, cuu, nebetacanaa janonaa bana, naain nese udaa cuhacaanu, nucuhe auhaniha cuhin. Cuu niha netaojiaain Cana Coaunera bajaauruha Jorioocurune jaan coitucuhacaanune jaun. Cuuna turuhin, nelauriaain, cuu netaojianacaauru enecuru rai, Jesocurisito que ereerejeein beebejihacaanu. 14Nii cuu netaojianacaauru jana nenaa leinjiin ene curuaate, Lidia ne. Acate Tiatira nese caje unaaneein, cajione caohacha lanaajihojoaain que necoretiha nenaa ne. Nii enete, aihuruha Jorioocurune rijijieein, Cana Coaunera coroaera nihana jaun, coroatajane Cana Coaunera, rautaain, Faborohacha beebejei aonaane coina. 15Nii jaunte, saain loreri asae nenacaauru naraaichuru aina jiniiquiin, baotisanojoineein neeuruhane baiha:

“Esinaaen rauhijiriin Cana Curuaanaa esenetaeraneein nihanune esenetaaichene, coloheri asaae, siniha uuchera”, naain canacaanu chuna Lidiane jaun, cuu nihacaanulu.

16Inae, ita taojiaain Cana Coaunera bajaauruhane jaan cuhacaanune janate, leeinjiin ranuna coseenraneein nenaa aina ita eruhacaanu. Nii ranunate, saruha Moconajaerane que, enaacha, chaaelai nihane, cojoeluhinae. Nitohaneein, enaacha chaaelai nihane, cojoeluhinaane jaunte, que nihane, chaaelai cojoeluhinaerateein, coreniha arajiin coriqui nihane, raerajeeure, nii sirichaauru. 17Nii ranunate Faboro aina, cuujihacaanune jana, canacaanu caaijie uhin, ehequiin:

“Caa cachaaurute, acaihaniji Cana Coauneraneein nenaa aitoonjoa beebejeeureranera. Acaaurute, raotojoeein caseteco caje nichoteein jianacoon nenaa nainiha cachanejaan beeureranera”, nae, ehequiin nii ranuna.

18Nii jaun jetaote, cojoanoonetojoeein, niriti nejesina nihane jaun, ninauhene aonajenajaaocane baiha, inae tabiicha, coaetae Faboro, araai janohin, niritonajaaocane jaun, coetaain jetaote, nii chaaelai cojoeluhinaa enaacha nii ranunane jaan rai:

“Cana Coaunera Calaohi Jesocurisito coreniha, nii ranuna caje mituhin amuura”, naa Faborone rijijieein jetaote, caje mituhin amue, nii ranuna saruhera.

19Nii jaun jetaote, inae neniha saruherane jaun, chaaelai cojoeluhinasinihane coaracuruha nii ranuna sirichaaurune jaun inae coreniha coriqui erunaa nainecurenihane jaun jetaote, Faboro aina curuataain Silasi mucuure nii ranuna sirichaauru. Nitohaneein, mucunajaain jetaote, amanajaaunre, cocoainanacaihuri acatiha, naain nese cataaun nenaa ita colurujueeuruhane jaun amanajaaunre. 20Nitohaneein, amanajaain turuanajaain jetaote, joesiocuru rai, nechu jataain, acaauru cotaiha nohaneein jetao:

“Caa Jorioocurute, satiin canacaanu nese sacutaain, satiin cachaauru rerohecaaurera. 21Chaentechu, cana Romanonihacachene ichao corenaa jereein, nejelau ichaonaa que ichaohacachene coina, que cana relaaurera. Aihana jaun nainihei, nii que ereein, que cacha relaauruhane jerichaachenera. Nitohanei ichaonaa que ichaonaa nainihaacache, cana Romanonihacachene jaunta”, naaure jetao.

22Nii jaun jetaote, satiin acaauru aina obajeein jetao, mucunajaauruhane jana, acaauru cajione rocoerateein jetao, enuha que bisichatenajaaure joesiocuru. 23Nitohaneein, mainajeriin bisichatenajaauruhane baiha jetaote, caresero cuhane enohanajaaunre, caohatiin berainajaain caresero beraichane coina, aitiin. 24Niritiin suujuateein letoaauruha joesiocurune jaun jetaote, caresero fuuniha, tenajae, Sefo que acaauru tijia mucuerateein, nii caresero beraicha.

25Nii jana jetaote, cuu dede cataaun, Cana Coaunera bajaebajajeein, nenatecuruha Faboro aina Silasine jana jetaote, cuu aonajeeure, nii cuu nenacaauru leeochaauru casetecocuru. 26Nii jana jetaote, luhecotariin uhe carora, mijiaainetiin. Nii jaun jetaote, mijiaaineein nerurujuaa nii caresero cuhanaine jana jetao, nejoracaacoaa caresero bacuujuaarune jana, satiin nii cuu nenacaauru casetecocuru caje nerojoirojoiri nii acaauru biji ichoracuru cadenacuru. 27Nii jana jetaote, jitoroaa nii caresero beraicha notane jana, nii caresero coaraane jana, satiin jetao, nejoracaacoae nii caresero bacuujuaauru. Nii jaun jetaote, “Inae jecha sorooruha, nii casetecocuru”, naain jetao, rai esefara rocohite, raajenihane nesohin nijiaohane coina. 28Nii jana jetaote, rai ehequiin:

“Coa ichaajenihane, chatohaneein necunaitaara. Satiinne cau nihacaanura”, nae jetao, rai Faboro.

29Nii jaun jetaote, cono bajaain, soroneein cuhin, enohin jetao, Faboro aina Silasi acatiha, rijijijianeein coasina caaun jetao, acaauru acatiha neseonrae nii caresero beraicha. 30Nii baiha jetaote, caresero caje mitanajaain jetao:

“Cachaauru, cha ichareeun, nitajihanune coataa, nichotihanune coinata”, naain bajaane jana jetaote:

31“Cana Curuaanaa Jesocurisito esenetaaute, nichotei, ii sinijiera, ii calaohichuru, satiin ii loreri asaae nenacaauru, naaonjoaihunri ainara”, naain jetao, tonoraaure, Faboro aina Silasi. 32Niritiin tonoraain jetaote, rai Cana Curuaanaa Jesocurisito beratenojoi beebejeeure, satiin nii loreri asae nenacaauru raine maajeein. 33Nitohaneein, dede catairijihu nihanatiin jetaote, temuha acaauru que acaauru bisihuruhane jaunne jaun jetao, acaauru rai culeje nii caresero beraicha. Nii baiha jetaote, inae rai sinijiera aina, saain rai loreri asaae nenacaauru aina jiniiquiin, baotisanojoineein neeure. 34Nitohaneein jetaote, rai loreri asaae jetao, Faboro aina curuataain Silasi amaain jetao, coroaatenajae nii caresero beraicha. Nitohaneein jetaote, rai loreri asaae nenacaauru aina jiniiquiin satiin sinijiera aina jetao coroajeein, raotojoeein neeure, inae Cana Coaunera esenetaauruhane jaun.

35Inae jano jana jetaote, folisihacuru letoaaure jetao, joesiocuru, Faboro aina Silasi joracaeratiha cuuruha, caresero beraicha quene coina. 36Nii jaun jetao te:

“Caraite, nere letoaaure joesiocuru, inara joracaain, inara jianichaanune coinara. Aihana jaun, inae nainequiche, raotojoeein mituhin, amuhichenera”, naa nii caresero beraicha, Faboro raina jaun jetaote, 37nii folisihacuru rai jetao:

“Canacaanu Romanonihacaanu natiinte, caohachaain rautaain, canacaanu rai bajaaorihei amuneein, satiin coarajiha cachane notaracae canacaanu bisiin, canacaanu enoaerateeure caresero cuhanera. Nii natiinte, nechu jataain asinojoineein, inae canacaanu mitaeratenaa jerecurera. Aihana jaun coatiha miturihaacaanuhi, raajenihane uhin, canacaanu mitaa uuruhinera”, nae jetao, Faboro, nii folisihacuru rai.

38Nii jaun jetaote, turuhin beeuruha nii folisihacuru, joesiocuru raine jaun jetao, nesoonetoore jetao, Romano neeuruhane beeuruha acaauru raine beeuruha, nii acaauru letonocuru folisihacurune jaun. 39Nii jaun jetaote, raaje cuhin jetao, turuhin, Faboro aina Silasi joracaerateein jetao:

“Atiin, inara rai, baasoneein ichacaanuneque, canacaanu que inara suujua acateein, atiin, caaelai caje amuuche”, naaure jetao, nii joesiocuru, acaauru mitaain. 40Nitohaneein, caresero caje inae mitanajaauruhane jaun jetaote, mituhin jetao, Lidia rene, turuha cuure jetao, Faboro aina Silasi, cuu nenacaauru Jesocurisito coreniha cana nejeraauru coaraain, acaauru suujuateein, acaauru suujua lararajiaauruhane baiha jetaote, jelai caje amuure.

Currently Selected:

Ichanohichuru 16: URA

Highlight

Compare

Copy