Ichanohichuru 14

Iconio turuuruha Faboro aina Berenabeenne

1Antioquihau neeuru baiha, jelai caje amuhin jetaote, Iconioo turuure jetao Faboro aina Berenabeen. Nii Iconioo turuuruhane jana jetaote, nii cuu nenaa ita taojiaauruha jaan sinacoca asaae netaojiaaure Jorioocuru. Nii jana jetaote, cuu turuhin, enohin, Jesocurisito beratenojoi beebejeeuruha rauhijiriin, rauhi cuhane cuaaine jaun jetao, esenetaacoaaure arajiin Jorioocuru, Jorioniheichuru naaonjoainuri netonaine maajeein, esenetaacoaaure arajiin. 2Nii jana, esenetaaichuru Jorioocuru jetaote, nii Jorioniheichuru suujuateeure jetao, esenetaauruhane coataa, baasoneein Faboro aina Berenabeen que ereein, nechu jataain acaauru cotaiha. 3Nejetaote, cuu carajaain acaauru aina neeururejetocurelu jetao, nii Jesocurisito letonocuru afosotooru. Nitohaneein jetaote, acaauru coroatajanerichaain Cana Curuaanaane coitucuuruhane jaun jetao, cuu neein Cana Curuaanaa ere beebejerejetocurelu jetao, nii afosotooru. Nii jaun jetaote, acaauru coroatajaniha Cana Curuaanaane jaun jetao, jataain cacha belaiha Cana Coaunerane beebejeein jetao, cunaitenacaauru rautaain cacha notaacure, esenetaauruhane coina, Faboro aina Berenabeen. 4Ne jetaote, nelerujuacoaaure, nii jelai nese cocoaichacuru cachaauru. Tabaauru jetaote, Jorioocuru cocoaeratiha jetao, jelai teein nelerucure nejesinajeein. Nii jana, afosotooru cocoaaerateeurera netonai jetao, jelai teein nelerucure. 5Nitohanihane jaun jetaote, cocoainanacaainuri aina ita suujuau tacaaure jetao Jorioocuru Jorioniheichuru aina, Faboro aina Berenabeen que nejerateein, ajeri que bodoosinajaain sonajaauruhanene coina niqui. 6Nii jana jetaote, nii coitucuuriin jetao, Iconio caje, Licaoniha batane cuhin, Listrau, Derebeeu, naaojoaihunri rohan nenacaauru neseeuru cuhin jetao sorohin, 7amuhemujueein, Jesocurisito beratenojoi erenaa caohati beebejeeure jetao.

Listrau, Faboro bodoosihuruha ajeri quene

8Nitohaneein, nii Listrau turuuruhane jana jetaote, ecu ne leeinjiin bacosaneein nejanoanaa cacha. Nii jetaote, chabana nichaauraain amuhene, nejanoha caje coaauneein. 9Aca jetaote, Cana Coaunera ere beebejiha Faborone jana, rautatiin, cuu lauhequiin aonaje. Nii jana, rautaain coaraa Faborone jana jetaote, esinae rauhijiriin, nerautaane esenetana nainihane coarajiha, suujua cuhanena jaun jetaote, 10rai tonijiaain:

“Nimichuhin nichaauraute coaracaara”, naa rai Faborone rijieeoritiin jetaote, chujuleneein, jeluhatiin inae ruharujuae nii cacha. 11Nii coaraain jetaote, ita rijitiin jachaleneein jetao, nere cuhane cuaain jetao:

“Chosichurute cacha neein cana rai faaurera”, naaure jetao, Licaoniha ere cuhane cuaain.

12Niritiin jetaote, nii acaauru ichanohineein nenaa, acaauru chosineein acaauruacha tei Seoso jecha naaure jetao, Berenabeen que. Jana Faboro que jetaote, leeocha chosi Eremesi jecha, naaure jetao, aca irihane jaun. 13Nii jana jetaote, turuha uhe jetao, nii nese coenorau nenaa acaauru chosi Seoso rai Teenforo rai saseredote. Nii saseredote jetaote, Seoso rai, lenone nihane sohin, mocohin tenajaaocane tocohaneein tajiha itolere torocuru, chaaen, caohatiin curuteein rucuhenohineein nenaa enuha juane, naaonjoaain uhaain turuha uhe jetao, que Faboro aina Berenabeen belaain coroaecuruhane coina. 14Nii jana jetaote, nii coaraain, acaauru chosiniha benajaauruhane que, inae nainacorichure jetao, Faboro aina Berenabeen. Nitohaneein, nainacoriin jetaote, nobiri soaisoaain jetao, acaauru jana cuhin, acaauru rai nujuaaen soaisoaain:

15“Chanuna nitohanai ichana jeriquiche, inara rijijieein, cacha neein nihacaanu natiin. Nitohaneein neeichene jianequichene coinana turuha uhacaanu, inara rai bihacaanune, nii jianeein neeichene coinara. Nii jianecuchera. Coatiha chaaelai que nelatejeehai nita. Inae nii jianeein, Cana Coaunera esine itolere dede, cana rai chauratane, cucuana, nii cuhane coneracuru, naaonjoaain coaunera- Cana Coaunera coroajeein, nere tonoraain neeuchera. 16Inoaenlute niqui, niicha jerei ichaa cachane nihanatiin, inauheneecha coarajerejetelu Cana Coaunerara. 17Coatiha, chaaelai janonaa bana, caohacha ichaain nihane jianihei Cana Coaunerata. Nete, ‘Naaonjoaaine neeunra’, naain chabana necoharaeratene cacha notajaaincha. Acate, inara coroatajane, temulejaain naaonjoaaineeichenera. Inara temule setejiaeraanuque, elo letoaain naaonjoaera. Setejiaane, caoachaain omarohin, caohatiin tihane, jeeojoiriin nihane, raotojoeein quihajeein aina raotojoeein neeichene jaan teraneein nenaanera”, 18naain acaauru rai beeuruha Faboro aina Berenabeenne sainejeein jetaote, erenaa tonorae lanaala jetao, acaauru chosi rai ichara tocohaneein jetao, nii irihuru sohin, mocohin, acaauru coroajeeun, acaauru belaain, acaauru ranaa jerecure.

19Nii jana jetaote, Antioquiha caje, Iconio caje, naaonjoaain caje uhin, tajiha turuha uure Jorioocuru. Nitohaneein, turuhacoaain jetaote, nii ecu nenacaauru suujua elonaauruhane jaun jetaote, ajeri que Faboro bodoosiin jetao soore. Nitohaneein sohin jetaote, “Inae jecha atinaauruha”, naain jetao, tararaain amaain, nii nese caje, naain jaoha cuure. 20Nii jana jetaote, sacuhin, curuhacaain netaojiaain coarajeeuruha Jesocurisito ranojoihunrune jana jetao, nimichujuaainte Faboro. Nitohaneein nimichuhin jetaote, coaiteen nii neseu cue. Nii cojoanoo jetaote, Berenabeen aina, naain Derebeeu cuure.

21Nii Derebeeu turuhin, cuu raotojoeein, Cana Coaunera Ere Caohati beebejeeuruhane jaun jetaote, Jesocurisito esenetaeraneein nedaaure arajiin cachaauru. Nitohanihane jaun jetaote, cuu neeure arajiin Jesocurisito ranojoihunru. Nii Derebeeu, cacha relaauruhane baiha jetaote, Listrau, Iconioo, Antioquihau, naaonjoainuri coaiteen cuure. 22Cuuru turuhin jetaote, Jesocurisito esenetaerauru suujuateeure jetao, caohatiin, nirijieein jianelanaala, esenetaain tonoraauruha, caoachaain rauhijiriine coina. Nitohaneein jetaote: “Cana Coaunera Cojoanonaa que ichaonaa jerichaane, itolere necairichanaa coaraain, necairichanaa abaantaacanete nera”, naain jetao, suujuatenajaaunre. 23Niritiin, suujuatenajaain jetaote, le laurichuru Jesocurisito ranojoihunru nainetiin, acaauru coaaraaurune que, acaauru bichauhenaauru tihacoaaure. Nitohaneein, tihacoaain jetaote, acaauru coroatajaniha Cana Coaunerane coina, suri couu neein cosinacaain, Cana Coaunera bajaain, nii acaauruacha esenetai Cana Curuaanaa bijiu tenajaain ratirinajaaure.

Siria batane que nenaa Antioquihau jelaiha cuuruha Faboro aina Berenabeenne

24Pisidia batane choae situhin cuhin jetaote, Paanfiliau turuure. 25Inae Paanfiliau batane turuhin jetaote, nii neseu Perejeu, Jesocurisito beratenojoi beebejeeure, nii cuu nenacaauru rai. Nii baiha jetaote, Italiau cuure jetao, Faboro aina Berenabeen. 26Caje coaauneein jetaote, bote cuhane fauhin cuhin, Antioquihau turuure. Nii neeuruhane jana, acaauru teeuruhalu acaauru leeochaauru, Cana Coaunera icharatenojoi ichacuruhane coinana jaun jetao, turuure, inae nii niicha icharatenojoi jitaauruhane jaun. 27Nitohaneein cuhin jetaote, inae Antioquihau turuhin jetao, jitariin cuu nenacaauru Jesocurisito ranojoihunru taojiaain jetao, acaauru rai, acaauru coroatajaniha Cana Curuaanaa Cana Coaunerana jaun, Jorioniheichuru netonai rai suujua coreein, inae esenetaauruhane beebejeeure Faboro aina, Berenabeen. 28Nitohaneein jetaote, cuu acaauru aina, carajaain neeururejetecurelu Faboro aina Berenabeen.

Currently Selected:

Ichanohichuru 14: URA

Highlight

Compare

Copy