Joaancha Letoai Nichataja 1
1
Caiho coroaeca Joaane
1Canu inara bichauhenaneeine, caa quiricha laenaain letoareeunni jataain esinae rauhijiriin quiicha belaai Caiho rai.
2Cana Coaunera coreniha quiicha belaai Caiho, icheine Cana Coaunera bajaaun ichorataanihane, nii ena caohatiin jeriha rai Suujuane rijijieein neeine tocohaneein raotojoeein raurohin neeine coina. 3Jerichanejeein caohachaain rauhijiriin ii suujua corelanaala Cana Coaunera aitoonjoan tonoraain neeine beeuruha cana nejeraauru tabaauru turuhinne jaunna, nii coitucuhin jataain rachoojoeeun. 4“Esinaete chuhisi aitoha Cana Coaunerane tonoraajeein neeure Cana Coaunera coreniha cacalabihuru”, naaina jataain rachoojoeeun.
5Casuujua aina cutaain quiicha belaai, jataain caohatiinte erenaa tonoraain nii cana letoaa Cana Coaunerane jaan ichaain neei. Leeochaauru cana nejeraauru coroatajaneein, nii coriajai caje uhin turunacaauru cana nejeraaurune maajeein coroatajaneeine jaunte, jataain jelai amuritoheriin caohacha ichaai. 6Nii jaunte, turuhin satiin aonajeeuruha Cana Coaunera ranojoineein nenacaaurune jana, jataain acaauru belaain caohatiin ichaain neeine beebejeeure. Atiin chaaelai latecuruha namuna jaan raine quene acaauruacha latei teeu, jeriha Cana Coaunerane rijijieein. 7Acaaurute Jesocurisito que erenaa beebejenaa que amihanenaa ichaa nii uure. Coatiha acaauru coroatajanena jerecuruha Cana Coaunera coitucuhichurune jana jerecuruhi. 8Nii jaunte, cana itolere que acaauru coroatajanichaachene caohachae, aina raotojoeein abaantaain Cana Coaunera ere beebejeeuruhane coina.
Baasoneein ichaa Diotrefesine jana, caohacha ichaane coaaratiha Demetirione
9Cana Coaunera rai ita taojiaain Cana Coaunera bajaaurera raina leinjiin quiricha laenaain letoaaunlu. Nete cocoainanohineein nihacaanune ere tonorana jerene Diotrefesi, acaacha cacha letoaane rautatohane jaun. 10Chaaente jataain casajenetiin, nechu jataain joaenreein canacaanu ere rocohin canacaanu irijiae. Nii jaunna rautaenihacaanu. Chaaen jetaote, Cana Coaunera coroaecuruhane coina ita taojiaauruhane jana turuuruha cana nejeraaurune, enooruhane caohateein sitanajae. Chaaen jetaote, niha cotijiaain ranajaerane caohate. Niine jataain rautaenihanune jaun, inae turuha uhanune bana cotijiaain rai aitoreeunni.
11Aonaaun canejera. Jiaonriha ii netonai, nitohaneein baaso jeloon ii suujua cuaain neeine. Caohachaacha que ii suujua coaraain neeun. Caohacha ichaera cachate, Cana Coaunera aina nereein. Jana baaso ichaera cacha, Cana Coaunera aina nerinaain. 12Satiin cachaaurute caohachaain suujua coaara cachaniha Demetirione beeure, esinae rauhijiriin caohachanejein nihane jaun. Canacaanu netonainechu caohachanijihane bihacaanu. Iite chabana nohanelanaala irihacaanune coitucuhi.
Niicha laenai quiricha satono tiha Joaane
13Jataainte ne banejelanaala ichei irihanune jaanu. Nena quiricha cuhane cuaain ichei aitona jereneeun. 14Nii jaunne ena ichoharaa unaa jereeun, caraajenihane ichei aitocoaaunne coina.
15Chaque tonajelanaala raotojoeein neeun. Satiin cana belaichaaurute ii coaaucure. Atiin, “Inara coaaucuruhajera”, naain nii cuu nenacaauru cana belaichaauru rai beeu.
Currently Selected:
Joaancha Letoai Nichataja 1: URA
Highlight
Copy
Compare
Share
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.