Joaancha Letoai Leinjiin 2

Cana Coaunera acatiha cana rai cha rucuheranu Jesocurisito

1Cana Coaunera coreniha cacalabi rijijieein nenacaauru, nabana Cana Coaunera ere lacohin, chatohaneein neosateein neeichene coataane catohaneein laenaain letoaaun. Chunocoha chatohaneein baaso ichaain osa que nesaruhin nihane, niha cana rai Cana Coaunera acatiha nii rucuheranu Jesocurisito esinae rauhijiriin caohacha esine coitucuhin rucuheraneein nenaa. 2Osaotohacachene caje cana que suujua acatiha Cana Coaunerane coinate raajenihane netelu Jesocurisito, coroso que teein atinaauruhane coina. Coatiha leinjiin cana corenihacha aiheilu. Satiin caa chauratane sacutaain que nenacaauru caje osa berotihane coinate nitohaneein nelu.

3Esinae rauhijiriin naitoonjoan tonoraacachenete, esinae rauhijiriin Cana Coaunera coitucuera nihacachene coitucunaa nainerichaacheein. 4Jana tabaauru: “Cana Coaunera coitucuhanu”, naa natiin naitoonjoan tonoraenihanete, nechu jataain casajenetohane jaun aitoreein. 5Esinae rauhijiriin, nere tonoraerate esinae rauhijiriin Cana Coaunera belaichaneein nihane coitucunaa nainereein. Nii ainate esinae rauhijiriin jiniiquiin, aina nihacachene coitucunaa nainichaache. 6Chunocoha “Jeriha Cana Coaunerane rijijieeine ichaaon”, naain erei, nii ichaohalu Jesocurisitone rijijieein ichaohine.

Ena nenaa Cana Coaunera aitoonjoan

7Chasocuru, caa inara rai canuhacha laenai canuhacha letoai Cana Coaunera aitoonjoan, coatiha ena ecoonaneein nihei. Acate inoaelu caje coaauneein, inara rai beratenojoineein nenaane. Nii Cana Coaunera aitoonjoante, inae inoaelu caje coaauneein inae inaraacha aonai ne. 8Nete laen, caa ena inara rai quiicha laenai quiicha letoaite, ena Cana Coaunera aitoonjoan- ena nenaa ne. Esinae rauhijiriin Curisito aina jiniiquiin nenaa neein, inae nocohena caje mituhajeein, jianacoon jiichoo mituhichene jaunte, inara raajenihane nii coaraain coitucunaa naineriquicheein.

9“Cana Coaunera cono conohanau neeine, jianacoon teteriin chachaain neeun”, naa natiin nejelau namute cacha belainiha chunocohanete, jaiti moconajaaera aina nocohenaana nihane jaun aicheein. 10Chunocoha nejelau namute cacha belaain neite, jianacoon ichaohane coaaratiha aicheein. Nitohaneein ichaohane nerinaain chuni osa que sarunaa nainera. 11Jana, namute cachaauru aina nejerateein belaiheite, nocohenaana joaenreein moconajaaera aina jaiti amuhemujue aiha maosane rijijieein, nii nocohena rai suujua aninoaane jaun.

12Nii jaunna, cacalabihuru rijijieein neiniquichene rai caritiin rauhijiriin inara rai beein laenaain letoaaun, inoaelu beratihalune tocohaneein nere nainaane coina, Acaneein nihane aina cuaain inara caje inara osa beroteratiha Cana Coaunerane coitucuhichene coina. 13Saain ichauhenaauru, inara rai netonaine caa laenaain letoaaun, inoaelu caje coaauneein nii nesina coitucuhin neeichene jaun. Saain enamanacaauru raine maajeeinne, caa caritiin laenaain letoaaun moconajaaera amuritiin ichoae iniichene jaun.

14Cana Inaca Cana Coaunera coitucuhin neeichene jaunna, caa caritiin inara rai laenaain letoaaura cacalabihuru. Saain inara ichauhenaneeichene raine maajeeinne laenaain letoacaanu, nii inoaelu caje coaauneein nii nesina coitucueraneein neeichene jaun. Saain enamanacaauru raine maajeeine letoaaun, chaae inara coichana aina cutaain Cana Coaunera Ere esenetaain, caohachaain laraajiin moconajaaera choae iniichene jaun.

15Coa nechu jataain cacha sarueraanu que caa chauratane curuaanaa moconajaaera tenojoin nichaae inara suujua letoaache. Chunocoha nii moconajaaera tenojoin itolere nichaae suujua letoaerate, nechu Cana Coaunera que jaolequiin belainihane jaun aicheein, 16Cana Coaunera caje nenaa neniha nii chauratane que tenojoine jaun. Nii chauratane que tenojoite, nechu jataain osa que cacha sarueraanu que nenaa ne. Acate cana nota rai caohati tocohanihane nichaae suujua letoaera, niicha sirii aina cuaain leeochaauru amurijiriin nenaa coacuhin, naaonjoaain niha cachane jaan tera ne. 17Nete inae cuu tihane bana, chauratane aina jiniiquiin nitajiha cureein, nii satiin cacha sarueraanu tera moconajaaera. Nete laen chaaelai janonaa bana nitajenaa charaneein niha cuurureein Cana Coaunera jerenohi ichajeein ichaonacaauru.

Esinae rauhijiriin nohanelanaala niha leinjiin ereeine, nii caje mitunaa naineniha casajene.

18Aonacuche cacalabihuru. Inae besaute nichaae cuujiha cana janonaa. Nii jaunte, inae uhe lalaje nii Curisito aina nejerateein nenaa cacha cairichaera moconajaaera. Nitohaneeinte, inae caa arajiin ocoojoacoaaure Jesocurisito que nejerateein nenacaauru. Nii cajete inae besaute nichaae cuujiha cana janonaane coitucuhacache. 19Cana ainate neeururejete niqui, nete mituhin amuurelu cana caje. Coatiha acaauru, cana suujua rijijieein coacuhin neeuruhilu. Bana cana suujua rijijieein coacuhin aihuruhalunete enanetojoeein cana aina neeurure. Nitohaneeinte neeurelu, acaauru caje esinae rauhijiriin cana suujua rijitojoeein neeureniha cana aina nenacaaurune coitucunaa coina.

20Nitohaneeinte inara rai Cana Coaunera Suujue teein nelu Curisito, aina cuaain inara itolere coitucuhin neeichene coina. 21Esinae nohanelanaala erenaa niha Curisito que erenaane coitucuheneeichene jauna caritiin inara rai laenaaun, coatiha coitucuheneeichene jaun nihei. Nitohanihane jaun inarate coitucuhiche, casajenelanaala nenaa caje mitunaa naineniha casajene. 22Aihana jaun, chateeinti casajenetiin ichoae, niite: “Canaacha cohajei Mesihasi nihei Jesocurisito”, naain Jesocurisito esenetaelanaala que erereein. Acatechu, nii rai Inaca Cana Coaunera aina rai Calaohi Jesocurisito batohin acaauru que nejeratenaaneein ne. 23Chunocoha cacha, Jesocurisito coitucunaa jerenihanete, acaaentonai ranaa jerenereein rai inaca Cana Coaunera. Nete laen chunocoha, nii rai Calaohi Jesocurisito coitucuhin leeochaauru que coitucuerateraneein nihane, acaaentonai coitucuhin rareein rai Inaca Cana Coaunera.

24Nii inoaelu caje coaauneein, inara rai beratenojoi inaraacha aonai rucujueein sirichuche, inara suujua cuhaneeicha. Chaaen jiaohine Cana Coaunera Calaohi caje naluhichene. Aihate Cana Coaunera caje netonai naluheneeiche. 25Nii cana rai tihane coina aitoha Jesocurisitone jaante chabana nitajenaacharanejeein nenaa ichaonaa esine ne.

26Nabana inara coritacuruha nii inara coritana jereraaurune coataane, caa inara rai aitiin laenaaun. 27Nete laen inara, inara relaain inara suujuateraanu lateneeiche, Jesocurisitohacha teratenojoin, Cana Coaunera Suujue siriin neeichene jaun. Nii inara rai niicha teratei Cana Coaunera suujuete, caohachaain rauhijiriin inara relaa cureein, inara suujuateein. Inara rai cha bihane, coatiha nohanenaa nerinaain. Esinaete erenaa nereein. Aihana jaun, Curisito esenetaaichene jianena coacuelanaala aina jiniiquiin neein inara relaa rai Suujuane rijijieein ichaaoche.

28Aihana jaun cacalabihuru, enene caje coaauneein, jiaohine Jesocurisito esenetaaichene jianeein neeichene. Aihate chaque casiin necoatelanaala jiniiquiin queecha jaaequiin, niheichu Jesocurisito que coejelanaala nihacache enacoaauneein turu bana. 29Inarate raotojoeein esinae rauhijiriin caohacha ichaeraneein ichaoha Jesocurisitone coitucuhin neeiche. Nii rijijieein techu, baaso ichaelanaala esinae rauhijiriin caohacha nejesina ichara cacha, Cana Coaunera calaohineein inae nihane coitucuhin neeiche.

Currently Selected:

Joaancha Letoai Leinjiin 2: URA

Highlight

Copy

Compare