Marcus 5

Zezusi hã, aibâ wa'uburé ré hã te te ipesezé

Mateus 8.28-34; Lucas 8.26-39

1Tawamhã Zezusi hã, isiré 're inomro mono norĩ me ma tô saprĩ za'ra â zara u uba're na, Zeraza na ti'a nhisi u. 2Tame Zezusi hã uba're hawi watobro wamhã, aibâ wa'uburé ré 're imorĩ hã ma tô sina uzusi, adâ'â 'ru hawi. 3Aibâ hã adâ'â 'ru ãma te 're sãmra. Ni'wa hã te te 're pawasisi waihu'u mono õ di ipara zama, isi'uwazi na hã. 4Da te 're pawasisi mono wamhã, ipara ãma zama ma tô isi'uwazi hã te te sina 're anhinarĩ. Tahawa ni'wa sada hâimana õ di, te te isõwada da hã. 5Bâtâ na, duré mara na te 're hâimana sadari sina, adâ'â 'ru ãma duré ẽtẽ 'rãihâ norĩ wa'wa. Ẽtẽ'wa na te duré 're sisihâri. 6Tawamhã aibâ hã romhâ na Zezusi te te sãmri wamhã, ma tô itẽme wara. Hi'rãtitõ ma tô ipapara aime. 7Tawamhã te sa'ẽtẽ 'mahâ, ãne:

— Zezusi, 'Re ihâimana u'âsi mono danhipai u 're isãmra mono 'ra, e marĩ te ĩ'ãma asima iwẽ. 'Re ihâimana u'âsi mono nhisi na wa aiwi waptẽ, ĩma rob'manharĩ tõ.

8Ãne hã ma tô tãma tinha, Zezusi hã wa'uburé ma, te te rob'rui wa, aibâ hawi watobro da, ãne: “Wa'uburé, aibâ hawi aiwatobro!”

9Tawamhã Zezusi hã te ãne sadanha:

— E niha asisi hã.

— Ahâ na, ĩnhisi hã. E marĩ wa. Wa'ahâ uptabi wa.

10Tawamhã Zezusihi wi, ma tô sadawa za'réi ãna tiwi waptẽrẽ za'ra, õ hã ti'a nhizâri hawimhã te te tãma rob'ru za'ra tõ da. 11Tamemhã te 'râwi uhâbâ zari hã 're hâimana, sa'a ãma. 12Tawamhã wa'uburé norĩ hã sadawa za'réi ãna ma tô Zezusihi wi waptẽrẽ za'ra, ãne:

— Ma'ãpé wazatõrĩ za'ra na, uhâbâi wa wanhisisi da.

13Tahawa ma tô tãma rowairébé za'ra, aibâ hawi wairébé da, uhâbâi wa, sisisi da. Uhâbâ zari hã 2 miu na ihâiba za'ra hã rob'rehâ u ma tô sisa're, âi ba. Tame ma tô ai'utõ.

14Tawamhã aibâ norĩ uhâbâi 'madâ'â'wa hã ma tô sisa're, 'ri wa'õtõ u. Tame ma tô rowasu'u na ropé za'ra, rom na 're idahâimana za'ra mono norĩ ma zama. Tahawa da'ahâ uptabi na ma tô ai'aba'ré ni, da te 'madâ'â za'ra da, iromhâimanazé hã. 15Tawamhã Zezusihi u da te dasina rotété za'ra wamhã, aibâ hã ma tô dasiwi 'madâ'â ni, wa'uburé norĩ ré aré 're ihâimana mono hã. Uza ré te oto nhamra, rowẽ na. Tahawa ma tô tapahi pese za'ra ni. 16Te te i'madâ'â za'ra norĩ hã ma tô dama rowasu'u pese za'ra, aibâ ma iromhâimanazé hã duré uhâbâ norĩ ma zama. 17Tawamhã te Zezusihi ma nharĩ zahi za'ra ni, danhipti'ai hawi watobro da.

18Tawamhã Zezusi hã uba're wa oto sébré wamhã, aibâ wa'uburé ré aré 're imorĩ hã ma tô sina tizadahutu'õ, isiré morĩ da.

19Tane nherẽ, Zezusi hã te te tãma rowairébé õ di. Tahawa, te ãne tãma tinha:

— Asõrõwa u aimorĩ, Uburé Danhib'apito, iwẽ te te aima i'manharĩzé hã wasu'u da, asiré a'uwẽ norĩ ma.

20Tawamhã aibâ hã ma tô mo. Decapoli ãma, ma tô te te dama wasu'u, Zezusi hã te te tãma i'manharĩ zé hã. Tahawa isimirowasu'u na, ma tô ãma tatob'uzu za'ra ni.

Zezusi hã, Zairuhu 'ra te te ihâiwa'utuzé duré pi'õ te te ipesezé

Mateus 9.18-26; Lucas 8.40-56

21Tawamhã Zezusi hã zara u apâ te te saprĩ wamhã, da'ahâ uptabi na ma itẽme tasi'rã'õtõ ni, â zaihâ u. 22Tawamhã ma tô itẽme wi, Zairu na isisi hã Zudeu norĩ te, rowahutuzé 'madâ'â'wa hã. Zezusi te te sãmri wi, ma tô ipapara hi'rãtitõ aime. 23Ma tô tiwi waptẽ sadawa za'réi ãna, ãne:

— Ĩ'ra sipi'õ hã te za ĩwi ai'utõ. Ma'ãpé we ĩsiré aimorĩ, asib'rada hã ãma hiri da, pese da, duré a'â 're hâimana mono da.

24Tawamhã Zezusi hã ma tô isiré mo. Da'ahâ uptabi na ma tô isiré ai'aba'réi ni. Tahawa ma dasiwi hõti pese ni.

25Tame ma tô dasiré mo pi'õ hã, 12 na ãma iwahu pi'õi hâzé ãma 're hâimana mono ré hã. 26Ma tô te te 're robzépata za'ẽtẽ. Tinhimarĩ hã ma tô duré uprosi, dawede'wa norĩ hã te te siwi 're iwede mono zém na. Tãma rowẽ da newa, tane nherẽ, te tiwi pire u'âsi. 27Ta hã pi'õ, Zezusihi wasu'u te te wapari wamhã, isarina ma tô mo dawa'wa, ibabarãi hawi. Te te itẽme sina rotété wamhã, ma tõ i'uza hã upi, 28ãne te te sima rosa'rata sina: “I'uza si te upi wamhã, wa za ĩpese.” 29Tawamhã te te upi wamhã, awa'awi pesere ihâzé hã ma tô tãma mazazâ. Tahawa ma tô siwaihu'u, ipese na hã. 30Tawamhã awa'awi pesere, Zezusi hã ma tô duré siwaihu'u, ihawi iwaihu'u pe iwatobro na hã. Tahawa, ma aipi'ra, da'ahâ wa'wa. Ãne te anha:

— E 'wa hã ma tô ĩ'uza hã upi.

31Tawamhã isiré 're inomro mono norĩ hã ma sada'âbâ za'ra, ãne:

— Ma tô ida'a'madâ, da te dasiwi i'aihõti pese na hã. E niha te tane nherẽ asinha, ni'wa te te ai'upi zô.

32Tane nherẽ, Zezusi hã ma tô da'a'madâ simana wawi, ni'wa hã te te i'upi zô. 33Tahawa, pi'õ hã siwaihu'u pese wa, te te i'manharĩ zém na hã ma tô Zezusihi u sina rotété, rẽrẽ'ẽ sina, pahi te. Hi'rãtitõ ma ipapara aime. Tahawa ma tô tãma siwasu'u pese. 34Tawamhã Zezusi hã ma tô tãma tinha, ãne:

— Ĩ'ra, asina ĩ'umnhasizé hã ma tô aipese. Rowẽ sina aimorĩ. 'Re irobzépata mono zé wi, te za oto rowẽ na 're aihâimana mo.

35Tawamhã Zezusi hã zahadu pi'õi ma te te nharĩ ré, ma tô aihutu, nima norĩ romhuri'wa hã Zairuhu ma. Ãne te tãma rowasu'u za'ra:

— Ai'ra azarudu hã ma tô ai'utõ. Si'wa'rutu nherẽ, Rowahutu'wai ma, nharĩ zahu tõ, asõrõwa u morĩ da hã.

36Tane nherẽ, Zezusi hã rowasu'u na te te rosa'rata õ di. Tahawa, te Zairuhu ma tinha, ãne:

— Aipahi tõ. Ĩ'umnhasi.

37Tawamhã Zezusi hã te te rowairébé õ di, ni'wa isiré imorĩ da hã. Pedru, Tiagu duré ino Zuwã norĩ si ma tô te te siré simro. 38Tawamhã Zairuhu nhorõwa u sihutu wamhã, Zezusi hã ma tô da'a'madâ. Rob'ru te, te ta'ru'ru ni, dawawa 'rãihâ na. 39Tawamhã Zezusi sébré wamhã, ma tô ãne dama tinha:

— E marĩ da, te rob'ru te, aiwawa 'rãihâ na ai'ru'ru wa'wa. Azarudu hã dâ'â õ di. Taré te nhono.

40Tane nherẽ, ma tô Zezusihi ãma aihâ za'ra ni. Tawamhã Zezusi hã ma tô dama rob'ru, rob u dawairébé da, uburé. Azarutu mama duré ina, isiré 're inomro mono norĩ zama isiré isi'aba'ré norĩ si ma tô asisi, azarudu inomrozéb u hã. 41Tawamhã ma tô pa'â. Ãne te tãma tinha:

— Talita cumi.

Ãne ãma isaprĩzé hã: “Azarudu, wa aima ti'ru: Ai'utu!”

42Tawamhã awa'awi pesere azarudu, 12 na ãma iwahu hã ma tô udu. Ma tô oto 're mo. Tawamhã uburé ma ãma tatob'uzu za'ra ni. 43Tawamhã Zezusi hã ma tô sawi pese imama norĩ wi, rowasu'u na te te ropé zahuré tõ da. Ma tô duré tãma 'ru zahuré, azarutu ma, ĩsa te te a zahuré da.

Currently Selected:

Marcus 5: xavBP

Highlight

Copy

Compare