Marcus 10
10
Zezusi hã damro rẽmezém na te te irowasu'uzé
Mateus 5.31-32; 19.1-12; Lucas 16.18
1Tawamhã Zezusi hã ta hawi te oto mo, Zudéa na ti'a nhisi u, Zodã pa zara u. Tame ma tô duré da'ahâ uptabi na itẽme tasi'rã'õtõ ni, imana wawi. Te te 're i'manharĩ u'âsi mono zéb zarina, ma tô duré dama rowahutu. 2Tawamhã nima norĩ farizeu norĩ hã ma tô itẽme sina rotété za'ra, te te siwi pibu da. Ãne te siwi sadanha:
— E i'ru zahi, aibâ hã timro te te irẽme da hã.
3Tawamhã Zezusi hã te asa sadanharĩ za'ra, ãne:
— E niha ma tô Mozési hã aima 'ru za'ra wa'wa.
4Tawamhã ãne ma ãma sada'âbâ za'ra:
— Mozési hã ma tô ti'ru, aibâ timro te te rẽme da wamhã, rob'ui'éré te te 'manharĩ da a'â, timro za te te irẽmezém na hã, taha parip si te te tãma rob'ru da.
5Tawamhã Zezusi hã te tãma nharĩ za'ra, ãne:
— Mozési hã, tane hã ma tô aima roti za'ra wa'wa, aipẽ'ẽ tete za'ra wa'aba wa. 6Tane nherẽ, 'Re ihâimana u'âsi mono te te i'aropoto na'rata zéb ãma, “Ma tô poto, aibâ duré pi'õ zama”. 7Tahawa, aibâ, timama duré tina hã te za rẽme zahuré, timro me, si'ãma hâiba sitob zahuré da. 8Tawamhã maparane ihâiba nherẽ, te za misi ihâiba na oto 're hâimana zahuré. Ãne wamhã, maparane ihâiba na oto 're hâimana zahuré mono õ di za. Misi oto ihâiba zahuré hã za. 9Tahawa, iwẽ hã ni'wa ãma isiwanhizari zahuré õ da si, 'Re ihâimana u'âsi mono, ãma isitobzé hã.
10Tawamhã 'ri u apâ sihutu wamhã, Zezusi hã, isiré 're inomro mono norĩ hã ma tô siwi sadanha, te te irowasu'uzém na hã. 11Tawamhã Zezusi hã ma tô tãma waihu'u za'ra, ãne:
— Aibâ hã timro te te rẽme wamhã, pi'õ aimawi na mro wamhã, timro zada te za tô tiwasédé hã 'manha. 12Duré tane pi'õ hã timro te te rẽme wamhã, aibâ aimawi na mro wamhã, tiwasédé te za 'manha.
Zezusi hã, ai'uté norĩ te te i'azawizé
Mateus 19.13-15; Lucas 18.15-17
13Taha pari, Zezusihi u ma tô ni'wam norĩ hã ti'ra hã ãwisi za'ra, ãma mreme za'ra da, 'Re ihâimana u'âsi mono iwẽ hã te te tãma apisutu da. Tane nherẽ, isiré 're inomro mono norĩ hã ma tô timreme hã tãma pẽtẽ za'ra. 14Tawamhã Zezusi hã te te 'madâ'â za'ra wamhã, te te tãma rowẽ õ di. Tahawa, te ãne tãma nharĩ za'ra:
— A'â we ĩtẽme si'aba'ré, ai'uté norĩ hã. Tiwi rosawi za'ra wa'aba tõ, ãne hã te te 'manharĩ za'ra tõ da hã. E marĩ wa. 'Re ihâimana u'âsi mono hâiwa ãma da'ãma 're isib'a'uwẽ mono zé hã, ni'wam norĩ hã ai'uté ne 're ihâimana za'ra mono norĩ te si. 15Tô sena, wa za aima waihu'u za'ra wa'wa, ãne: Ni'wa hã 'Re ihâimana u'âsi mono, da'ãma 're isib'a'uwẽ mono zéb zô, ai'uté ne sô tob'uzui õ wamhã, niwa iwa isébré da hã mare di.
16Tawamhã Zezusi hã, ai'uté ma tô tipa azaza. Tinhib'rada ma tô ãma aza'ra. 'Re ihâimana u'âsi mono ma, te duré ãma timreme za'ra, iwẽ hã te te tãma apisutu da.
Aibâ ihâiba té isibro pe
Mateus 19.16-30; Lucas 18.18-30
17Tawamhã Zezusi hã morĩ da, oto watobro wamhã, aibâ hã ma tô itẽme wara. Hi'rãtitõ ipapara ma aime. Ãne te sadanha:
— Rowahutu'wa i'aiwẽ a hã. E marĩ wa za 'manha, dahâimanazé isi'utõrĩ'õ te ĩsina uwaimrami da wamhã.
18Tawamhã Zezusi hã ma ãma sada'â, ãne:
— E marĩ da, te ĩwẽ na ĩ'mahâ. 'Re ihâimana u'âsi mono si iwẽ uptabi hã. Ni'wa isine hã hâimana õ di. 19Aima waihu'u pese di, 'Re ihâimana u'âsi mono nhimiroti zahi hã, ãne: “Da'maiwĩrĩ tõ. Damro na dawi asipsaihuri tõ. Marĩ simi'uri tõ. Tô senai õ nherẽ, niha na dawasu'u tõ. Dama rob'rãmi tõ. Aimama 're wazé pese mono, ana zama.”
20— Rowahutu'wa, ĩzapore hawim haré, wa tô uburé te 're a'madâ'â pese, isimiroti zahi hã. — Ãne te Zezusihi ma siwasu'u.
21Tawamhã Zezusi hã ma tô 'madâ, ãma siwamri sina, aibâ ihâiba téb ãma hã. Tahawa te ãne tãma tinha:
— Marĩ zô te misi aiwi rowaptâ, i'manharĩ da hã. Ma'ãpé asimarĩ hã uburé wede za'ra na, iwa'â rob'uiprazé isimarĩ'õ norĩ ma, sõmri mono da. Ãne hã 'manharĩ wamhã, marĩ iwẽ uptabi hã hâiwa ãma hã te za asô 're hâimana. Taha parip si, we aimorĩ, ĩsiré 're aimorĩ da.
22Tawamhã ãne hã aibâ te te wapari wamhã, ma tô tiwi tirobzei'õ pese. Sibro pese uptabi wa, ma tô oto mo, robzei ãna. 23Tawamhã Zezusi hã simana wawi ma tô rob'madâ. Tahawa isiré 're inomro mono norĩ ma, te ãne tinha:
— E niha ipire uptabi, isibro pese norĩ hã 'Re ihâimana u'âsi mono, da'ãma 're isib'a'uwẽ mono zéb u 're isisisi mono da hã.
24Tawamhã isiré 're inomro mono norĩ, ãne hã te te wapari za'ra wamhã, ma tô tãma a'rãmi za'ra. Tane nherẽ, ma tô Zezusi hã ãma uzusi ãne:
— Ĩ'ra norĩ, e niha ipire uptabi, 'Re ihâimana u'âsi mono da'ãma 're isib'a'uwẽ mono zéb u 're idanhisisi mono zéb da hã. 25Awaru ba'õmore hã isi'uwazi zazahâ hâibabarĩzé para'õtõ zapu'u 're, isébré waihu'u õ nhipai u, isibro pe hã sébré waihu'u õ di, 'Re ihâimana u'âsi mono da'ãma 're isib'a'uwẽ mono zéb u hã.
26Tawamhã ãne hã imreme te te wapari za'ra wamhã, ma tô tãma a'rãmi pese za'ra. Tahawa te sisadanharĩ za'ra, ãne:
— Õne wamhã bété, e 'wa hã tinho'reptuzé te te sina uwaimrami da bâ.
27Tawamhã Zezusi hã te 'madâ'â za'ra. Tahawa ma tô tãma waihu'u za'ra, ãne:
— Ti'ai ãma a'uwẽ norĩ ma hã pire uptabi di, ã hã. Tanei õ di, 'Re ihâimana u'âsi mono ma hã wapu di. Marĩ hã 'Re ihâimana u'âsi mono ma, i'manharĩ waihu'u õ hã 'maihâimana õ di.
28Tawamhã Pedru hã te tãma tinha, ãne:
— Wa norĩ hã uburé marĩ, wa tô rẽme za'ra ni, asiré 're wanomro mono da.
29Tawamhã Zezusi hã ma tãma waihu'u za'ra, ãne:
— Tô sena wa za ãne hã aima waihu'u za'ra wa'wa. Ni'wam norĩ hã ĩ'u'âbâ duré Rowasu'u wẽ itéb u'âbâ, tinhorõwa, tisisãnawã norĩ, tihidiba norĩ, tina, timama, ti'ra norĩ duré niwamhã tinhipti'a norĩ te te 're rẽme za'ra mono wamhã, 30te za te te 're waibu marĩ iwẽ ahâ uptabi na, ãme ti'ai ãma 're hâimana za'ra mono ré hã. Te za te te 're waibu 100 na ãma isisiwi na tinhorõwa hã, tisisãnawã norĩ, tihidiba norĩ, tina, ti'ra norĩ, tinhipti'a norĩ zama. Duré isu hã te za te te 're sépata za'ra, marĩ da te tãma 're i'manharĩ wasété za'ra mono zé hã. Tawamhã romhutu'õmhã, ta norĩ hã te za sina uwaimrami za'ra, dahâimanazé isi'utõrĩ'õ hã. 31Tahawa da'ahâ na ãhã na imorĩ'rata na idahâimana za'ra hã, da'rãsutu'u te za oto tahâimana za'ra ni za. Duré ãhã na da'rãsutu'u idahâimana za'ra hã, imorĩ'rata na te za oto tahâimana za'ra ni za.
Zezusi hã duré isiwasu'uzé, tidâ'âzém na duré za apâ tihâiwa'utuzém na zama
Mateus 20.17-19; Lucas 18.31-34
32Tawamhã Zeruzalẽ u te bâdâdi na oto sai'uri za'ra. Zezusi hã te isõwa timorĩ za'ra. Isiré 're inomro mono norĩ hã ma tô tãma a'rãmi pese za'ra. Duré isiré idasi'aba'ré norĩ hã dapahi za'ra di. Tawamhã Zezusi hã isiré 're inomro mono norĩ zô te hâ, isababa si'aba'ré da. Tahawa ma tô duré tãma siwasu'u za'ra, za tãma iromhâimanazém na hã.
33— Ma'ãpé ĩwapari pese za'ra wa'aba. Ãhã na hã Zeruzalẽ u, wa ai'aba'ré ni. Tame te za Ti'ai ãma Dasiré Ipodo hã hâiba nhomri ni, sasedoti nhib'ihâ'a norĩ ma, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ ma zama. Tawamhã ta norĩ hã te za iwasédé hã ãma siwi tihi. Taha zarina, te za dama 'ru za'ra, da te wĩrĩ da. Taha pari te za siwi hâiba nho, zudeu'õ norĩ ma. 34Ta norĩ hã te za ãma tiwa'ẽ za'ra. Tizadaipro na te za nasi siwi upto. Abazei hâ nhorõ 'manharĩ na dapré'ézém na te za duré te te siwi 're pré'é. Taha pari te za siwi tiwĩ. Tane nherẽ, si'ubdatõ bâtâ ãma, te za apâ hâiwa'udu.
Tiagu norĩ hã Zuwãhã me, Zezusihi wi te te irowaptẽrẽ zahuré zé
Mateus 20.20-28
35Taha pari, Zebedeu 'ra norĩ hã Tiagu norĩ Zuwãhã me, Zezusihi u ma tô sina rotété zahuré, ãne te te tiwi rowaptẽrẽ zahuré da:
— Rowahutu'wa, wa wasima wẽ ni, wa te aiwi iwaptẽrẽzé hã, ãma wama uwaimrami da za.
36Tawamhã Zezusi hã ma ãma sada'âbâ zahuré, ãne:
— E marĩ te asima iwẽ wa'wa, te ãma aima i'uwaimrami aba da hã.
37Tawamhã ma ãma sada'âbâ zahuré, ãne:
— Niwa dama aipire uptabi na danhib'apito simasisizém na asãmra wamhã, ma'ãpé wama pisutu, ni'wa asimire niwĩ asababa sãmra da, duré asimi'e niwĩ.
38Tawamhã Zezusi hã ma tãma waihu'u zahuré, ãne:
— Aima waihu'u aba õ di, ĩwi iwaptẽrẽ aba zé hã, marĩ te te iwasu'u hã. E sada asiptete wa'aba di, uva 'rãi wa'u isé ihâsi wa'aba da hã, za te ihâ'rẽne ne hã. Duré e te za irobzépata 'wa, za te i'manharĩ ne hã.
39Tawamhã ma ãma sada'âbâ zahuré, ãne:
— Ĩhe. Wa te hâsi waihu'u pese di.
Tawamhã Zezusi hã te tãma nharĩ zahuré, ãne:
— Te za tô ĩsine ihâsi wa'wa, uva 'rãi wa'u isé hã, za te ihâ'rẽne ne hã. Te za duré robzépada hã i'manharĩ 'wa za, te i'manharĩ ne hã. 40Tane nherẽ, ĩsi'uihâ na te aipisutu waihu'u aba õ di, dama aipire wa'aba na 're aimasisi aba mono da hã ĩnhimire niwĩ, duré ĩnhimi'e niwĩ. 'Re ihâimana u'âsi mono si ma tô pisutu siro, ni'wam norĩ hã za isimasisi da hã. Taha si te za tisõ, ni'wam norĩ ma, te te sima iwẽzéb zarina.
41Tawamhã Zezusihi siré 're inomro mono norĩ 10 na ihâiba za'ra, ãne hã te te wapari za'ra wamhã, ma tô Tiagu norĩ da Zuwãhã me, tinhiti'ru za'ra. 42Tahawa, Zezusi hã ma tô 'râwi sitẽme sô tihârâ za'ra. Ãne ma tô tãma waihu'u za'ra:
— Aima waihu'u pese za'ra wa'aba di. Ti'ai ãma roti'wa norĩ hã isimiroti 're, te za 're hâimana za'ra isib'a'uwẽ norĩ hã. 43Tane nherẽ, ai'reb za'ra wa'aba hã, ãne hã 're romhâimana mono tõ. Iwa'rãmi te za 're i'manharĩ za'ra wa'aba mo. Ni'wa hã dama pire da wamhã, dama romhuri'wa na te za 're hâimana. 44Duré ni'wa hã imorĩ'rata na hâimana da wamhã, wada'uri zarina titede'wai ma romhuri'wa ne, te za dama 're hâimana. 45Tane, Ti'ai ãma Dasiré Ipodo hã da te tãma 're romhuri za'ra mono da, wei morĩ õ di. Te te dama 're romhuri mono da, ma tô wei mo, duré tihâiba te te dazada sõmri da, da'ahâ uptabi na te te da'anho'reptu da.
Zezusi hã Bartimeu te te ito pesezé
Mateus 20.29-34; Lucas 18.35-43
46Tawamhã Zezusi hã duré tisiré 're inomro norĩ me, ma tô aihutu, Zerico na 'ri nho'õmo nhisi u. Tawamhã da'ahâ uptabi na isiré idasi'aba'ré norĩ me, Zerico hawi wairébé wamhã, ma tô Zezusi hã sõpẽtẽ, aibâ itob'a Bartimeu na isisi, Timeu 'ra hã. Aibâ itob'a hã bâdâdi zababa te nhamra. Te nasi da'awa. 47Tawamhã te te wapari wamhã, Zezusi Nazaré ãma iprédu te te iro'razâri na hã, ma tô i'mahârâ na sãna'rata, ãne:
— Zezusi, Davihi nhihudu, ĩ'ãma aipẽ'ẽzé na.
48Tawamhã da'ahâ na ma tô damreme hã nasi tãma 'marõpãrĩ za'ra ni, ari'iwi sãmra da. Tane nherẽ, te nasi sa'ẽtẽ 'mahâ:
— Davihi nhihudu, ma'ãpé ĩ'ãma aipẽ'ẽzé na.
49Tawamhã Zezusi hã ma tô mazazâ. Ãne te dama tinha:
— Sô ai'maihârâ aba.
Tahawa, ma tô sô ta'maihârâ ni:
— Asib'ru na. Ma'ãpé, aiwahutu. Te we asô hâ.
50Tawamhã Batimeu hã ti'uza ihâpa ma tô time. Si'aba'ré na ma wahudu. Zezusihi u ma tô mo.
51Tawamhã Zezusi hã te sadanha, ãne:
— E marĩ te aima 'manharĩ da, te asima iwẽ.
— Rowahutu'wa, apâ te 're rob'madâ'â mono da, wa ĩsima wẽ. — Ãne ma sada'â.
52Tawamhã Zezusi hã te tãma tinha, ãne:
— Aimorĩ oto. Asina ĩ'umnhasizé hã ma aipese.
Tawamhã awa'awi pesere ma tô apâ rob'madâ'â wẽ. Tahawa te Zezusihi zarina mo, bâdâdi na.
Currently Selected:
Marcus 10: xavBP
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc.
