Mateus 22
22
Dasina damrozém na, dasina damro ihâimanazé
Lucas 14.15-24
1Tawamhã Zezusi hã ma tô duré rowasu'u, romnhimiré'é na, ãne:
2— Hâiwa ãma 're Isãmra mono, da'ãma 're isib'a'uwẽ mono zé hã, aiwa apito te te irobza'ra pese ne, i'ra hã mro da, dasina damrozém na, dasa isa'ẽne hã te te 'manharĩ da. 3Tawamhã te te robza'ra parimhã, tite romhuri'wa norĩ hã ma tô satõrĩ za'ra, te te ipo're pu'u za'ra norĩ zô, sihutu da, i'ra za imrozéb u. Tane nherẽ, te te sima wẽ za'ra õ di, itẽme isihutu da hã. 4Tahawa, ma tô duré satõrĩ za'ra aimawi tite romhuri'wa norĩ hã, ãne: “Mo oto ai'aba'réi wa'aba, sô ĩhârâ za'ra norĩ u. Tãma rowasu'u za'ra wa'aba, uburé te irobza'ra pese na hã oto, dasa hã za ihâimanazéb da hã. Wa tô simro, powawẽ zapu ihâipese norĩ hã, duré powawẽ iba'u ihâipese norĩ zama. Wa tô robza'ra pese. We oto si'aba'ré, dato isa'ẽne za ihâimana u dasina damrozém na hã.”
5— Tane nherẽ, sô ihârâ za'ra norĩ hã te te ãma rosa'rata za'ra õ di, sô ihârâ za'ra zém na hã. Ni'wam norĩ hã tiburu u si ma tô ai'aba'ré. Duré ihâiba amo norĩ hã tite marĩ zarina si ma tô tihâimana za'ra. 6Aimawi norĩ hã ma tô romhuri'wa norĩ hã waibu za'ra. Ma tô hâ za'ra. Ma tô duré simro za'ra. 7Tawamhã apito hã ma tô ab'rui pese. Tahawa, ma tô ti'ru, dapãrĩ'wa norĩ hã da te simro da, duré ite za'ra 'ri wa'õno hã da te ãma tiwi sazu za'ra da. 8Tawamhã tite romhuri'wa norĩ ma, ma tô tinha, ãne: “Dasa isa'ẽne za ihâimanazé hã dasina damrozéb ãma hã tâibâ robza'ra hã. Tane nherẽ, sô ĩhârâ za'ra norĩ 'remhã, ni'wa hã sada hâimana õ di, sima 'matob'uzui õ wa. 9Tahawa, mo oto ropéi wa'aba mono, 'ri nhi'riti mono bâ. Dasa isa'ẽne za ihâimana u we dasihutu da, we dama rowasu'u za'ra wa'aba mono, danhopẽtẽ za'ra wa'aba mono sidâpâ.”
10— Tawamhã ite romhuri'wa norĩ hã ma tô ropé, 'ri nhi'riti mono bâ. Ma tô te te da'rã'õtõ za'ra, te te danhopẽtẽ za'ra mono sidâpâ, iwẽ norĩ hã duré iwasété norĩ zama. Tawamhã dasa isa'ẽne ihâimanazé 'ri 're wa'wa hã ma tô oto dasina 'masisi ni. 11Tawamhã apito hã isihutu norĩ te te a'madâ'â da, sébré wamhã, ma tô 'madâ, aibâ dasina damro wa da'uza ré ihâimana õ hã. 12Ta hã te apito sadanha, ãne: “Ĩsiwaihu, e niha ma we asé ãwamhã, dasina damro wa, da'uza hã asima sẽrẽ õ nherẽ.”
— Tane nherẽ, aibâ hã te te sada'âbâ õ di. 13Tahawa apito hã tite romhuri'wa norĩ ma, ma tô tinha, ãne: “Ma'ãpé, ã hã aibâ hã asiwi pawasisi aba. Duré asiwi hiwasisi aba, rob u asiwi mei wa'aba da, robra u, tame 're wawai u'âsi mono da, duré 're 'wasitete u'âsi mono da, te te oto 're robzépata za'ẽtẽ mono wa.”
14Tawamhã Zezusi hã ma tô timreme na 'rãsutu, ãne:
— 'Re ihâimana u'âsi mono hã, da'ahâ uptabi na te tô dazô 're hârâ. Tane nherẽ, da'umro na te te sima 're da'apisutu.
Rob'uiprazé, danhib'apito ma, da te 're i'arĩ za'ra mono zé
Marcus 12.13-17; Lucas 20.20-26
15Tawamhã farizeu norĩ hã ma tô oto wairé. Si'rã'õtõ wamhã, ma tô sima ãma rowa'õtõ za'ra, Zezusi hã niha na timreme na te te upai wa, te te siwi âri da. 16Taha pari, Zezusihi u ma tô 'mazatõrĩ za'ra, tizadawa zapari'wa norĩ hã, duré apito Erodihi nhimiroti wẽ 'wa norĩ zama. Tawamhã ãne ma tô ta norĩ hã siwi sadanha:
— Rowahutu'wa, wama aiwaihu'u pese za'ra di, i'uwaibaba si 're i'aihâimana mono na hã. Tô sena te iwẽ na si dama 're irowasu'u u'âsi mo, 'Re ihâimana u'âsi mono te bâdâdi na hã. Duré danhimirosa'rata zarina 're i'aihâimana mono õ na hã. Duré 're da'a'madâ'â mono õ di, niha na 're idahâimana za'ra mono zéb zarina. 17Tahawa, ma'ãpé wama waihu'u za'ra na, e niha aima hã. E i'uwaibaba rob'uiprazé arĩ hã, apito Cézaha ma, wa te 're iwa'âbâ za'ra mono da hã. E mare di.
18Tane nherẽ, Zezusi hã ma tô waihu'u za'ra, te te waihu'u pese za'ra nherẽ, senai õ na te te siwi isadanharĩ na hã. Tahawa, ma tô ãne tãma nharĩ za'ra:
— Aihâimana si'amoi pese na 're i'aihâimana za'ra wa'aba mono! E marĩ da, te asiwi ĩpibui wa'wa, te i'upazéb zô! 19Ma'ãpé we ĩma 'mai'âri aba rob'uiprazé isapotore hã, Roma 're danhib'apito ma, da te 're arĩ za'ra mono wa, da te tãma 're iwa'âbâ za'ra mono zé hã.
Tahawa rob'uiprazé isapotore hã ma tô tãma 'mai'âri za'ra. 20Tawamhã Zezusi hã ma tô ãma sadanharĩ za'ra, ãne:
— E 'wai podo, rob'uiprazé isapotore na hã. E 'wa nhisi na duré ãma rob'ui'éré.
21Tawamhã ãne ma tô ãma siwi sada'â:
— Apito Cézaha podo.
Tawamhã Zezusi hã ma tô tãma waihu'u za'ra, ãne:
— Apito Cézaha ma 're sõmri za'ra wa'aba mono, marĩ Cézaha te hã. Tane duré, 'Re ihâimana u'âsi mono ma 're sõmri za'ra wa'aba mono, marĩ 'Re ihâimana u'âsi mono te hã.
22Tawamhã farizeu norĩ zadawa zapari'wa norĩ hã ãne na te te wapari za'ra wamhã, ma tô ãma titob'uzu za'ra. Tahawa ma tô oto siwi tirẽ, Zezusi hã. Ma tô oto apâ ai'aba'ré.
Dahâiwa'utuzém na, Zezusi hã saduceu norĩ te te siwi isadanharĩzé
Marcus 12.18-27; Lucas 20.27-40
23Tô taha bâtâ 'remhã, saduceu norĩ hã ma duré itẽme aihutu Zezusihi u, apâ 're idahâiwa'utu waihu'u za'ra mono õ na te te dama 're irowasu'u za'ra mono norĩ hã. 24Ta norĩ hã ma tô siwi sadanha, ãne:
— Rowahutu'wa, Mozési hã 'Re ihâimana u'âsi mono nhimiroti zahi na ma tô ãne rob'ui'éré: “Aibâ hã dâ'â wamhã, timro, 'ra ãna te te rẽme wamhã, isisãnawã hã ãma mro da. Tawamhã 'ra wamhã, i'ra norĩ hã isisãnawã idâ'â 'ra uptabi ne 're hâimana za'ra mono da.” 25Ãne wa za aima wasu'u za'ra ni: Wa'reb za'ra hã ma tô 're hâimana za'ra, aibâ norĩ 7 na ihâiba za'ra sisãnawã si hã. Ipoto'rada hã ma tô timro. Tane nherẽ, ma dârâ, 'ra õ ré. Ãne wamhã, ti'amo'wa hã ma tô sipara tirẽ, isõsi hã ãma mro da. 26Isõsibi ma hã tô õne ma duré tiromhâiba, duré inoi ma zama. Tawamhã tô õne si ma tô uburé tãma tiromhâimana za'ra. 27Uburé si'utõrĩ parimhã, pi'õ zama ma duré oto dârâ. 28Tahawa, 'Re ihâimana u'âsi mono te te ida'ahâiwa'utuzé bâtâ ãma hã, pi'õ hã e 'wai mro na te za tihâiba, 7 na uburé ãma imro za'ra 'remhã.
29Tawamhã Zezusi hã ma ãma sada'âbâ za'ra, ãne:
— Ma ãma i'upa za'ra wa'wa, aima waihu'u za'ra wa'aba õ wa, Ibaihâ Iwazé pese na rob'ui'éré hã duré 'Re ihâimana u'âsi mono waihu'u pese uptabi na 're ihâimana mono zé hã. 30E marĩ wa. 'Re ihâimana u'âsi mono hã idâ'â za'ra norĩ te te ahâiwa'utu wamhã, hâiwa ãma romhuri'wa ne, te za oto 're hâimana za'ra. Ni'wa hã mro õ di za oto. 31Duré apâ 're idahâiwa'utu za'ra mono zém na rowaihu hã, e niwa sõré za'ra wa'aba ã bâ, ãne 'Re ihâimana u'âsi mono te te inharĩzé hã: 32“Wa hã Abra'ãhã te 'Re ihâimana u'âsi mono, duré Izaquihi te 'Re ihâimana u'âsi mono, duré Zacoho te 'Re ihâimana u'âsi mono.” 'Re ihâimana u'âsi mono hã idâ'â norĩ tei õ di. Dâ'â ãna 're ihâimana za'ra mono norĩ te hã.
33Tawamhã da'ahâ uptabi na idahâimana za'ra, ãne hã da te wapari za'ra wamhã, ma tô ãma tatob'uzu za'ra ni, isimirowahutu na.
'Re ihâimana u'âsi mono nhimiroti, danhipai u ipire uptabi
Marcus 12.28-34; Lucas 10.25-28
34Tawamhã, farizeu norĩ hã ma tô si'rã'õtõ, rowasu'u te te wapari za'ra wamhã, saduceu norĩ, Zezusi te te siwi isada'âbâ waihu'u õ na hã. 35Tawamhã 'Re ihâimana u'âsi mono nhimiroti zahi na dama rowahutu'wa hã, tô farizeu norĩ siré hã, ma tô Zezusi sadanha, te te ãma tãma upa zô, te te pibu da, ãne:
36— Rowahutu'wa, e ma hã bété, danhipai u ipire uptabi, 'Re ihâimana u'âsi mono nhimiroti zahi na Mozési te te ãma irob'ui'érézé hã.
37Tawamhã Zezusi hã ma ãma sada'â, ãne:
— “'Re sawi pese mono, Uburé Danhib'apito ate 'Re ihâimana u'âsi mono hã, uburé aipẽ'ẽ na, uburé aihâimanazé aipẽ'ẽ 're i'rowi uptabi na, duré uburé asimirowaihu'u na zama.” 38Ã hã 'Re ihâimana u'âsi mono nhimiroti zahi imorĩ'rata na 're ihâimana mono, duré danhipai u ipire uptabi. 39Duré 'Re ihâimana u'âsi mono nhimiroti zahi isãna're ãma, imorĩ'rata ne hã tô, ãne: “'Re da'azawi pese mono, 'râwi 're i'asisawi pese mono ne.” 40Ã norĩ hã maparane ihâimana zahuré, 'Re ihâimana u'âsi mono nhimiroti zahi hã ma tô a'rã'õtõ zahuré, uburé 'Re ihâimana u'âsi mono nhimiroti zahi na Mozési te te ãma i'arob'ui'érézé hã duré isadawa 'mahârâ'wa norĩ te te ãma irob'ui'éré za'ra zéb zama.
Cristu hã apito Davihi nhib'apito te 're hâimana
Marcus 12.35-37; Lucas 20.41-44
41Tawamhã Farizeu norĩ hã zahadu siré hâimana za'ra wa, ma tô Zezusi hã sina sadanharĩ za'ra, ãne:
42— E niha ma tô ãma 're irosa'rata za'ra wa'aba mo Danho'reptui'wa da, 'Re ihâimana u'âsi mono te te ipisutu ãma hã. E 'wa sihudu na ma tô ãma 're irosa'rata za'ra wa'aba mo.
Tawamhã Farizeu norĩ hã ma tô ãma sada'âbâ za'ra, ãne:
— Apito Davihi nhihudu.
43Tawamhã Zezusi hã ma tô duré apâ sadanharĩ zahu za'ra, ãne:
— E niha tawamhã, Davi hã, 'Re ihâimana u'âsi mono Pẽ'ẽzani te te tãma iwaihu'uzéb zarina, ma tô Danho'reptui'wa hã sisi Tinhib'apito na. Ãne ma tô tinha:
44“Uburé Danhib'apito hã ma tô Ĩnhib'apito ma tinha, ãne:
‘Ĩnhimire niwĩ asãmra, asitob'ru norĩ hã te isõrézéb u, aipara zahâpâ.’ ”
45Tahawa, Davi hã Danho'reptui'wa Tinhib'apito na te te sisi wa, e niha te tawamhã Danho'reptui'wa hã Davihi nhihudu 're mo.
46Ãne wa, ni'wa hã te te ãma sada'âbâ waihu'u õ di. Tahawa ta hawim haré, ni'wa hã sada si'aibâ õ di, te te isadanharĩ zahu da hã.
Currently Selected:
Mateus 22: xavBP
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc.
