Zuize 21
21
Bẽzamihĩ nhihudu norĩ mro da hã, pi'õ norĩ wasu'u
1Tawamhã Izaraéu nhihudu norĩ, ma tô aré Mispa ãma 'Re ihâimana u'âsi mono ma, ãne tinhimiropisudu hã 'manharĩ za'ra:
— Bẽzamihĩ nhihudu norĩ si'aibâ ma, wa norĩ, wa'ra sipi'õ wa te tãma 're isa'ré za'ra mono da hã mare di za, ãma 're mro za'ra mono da hã.
2Tawamhã a'uwẽ norĩ Bétéu u ma tô ai'aba'ré, tame 'Re ihâimana u'âsi mono nho're da'ãma ihâiwahâ pese za'ra zéb u dasi'ubumro da. Tawamhã ta norĩ hã robzé te, wawa 'rãihâ na 'ru'ru wa, 3ma tô ãne nharĩ za'ra:
— Uburé Danhib'apito, Izaraéu nhihudu norĩ te, 'Re ihâimana u'âsi mono, e marĩ wa, ma tô ãne hã wama tiromhâimana za'ra. E marĩ wa, te za wasiré a'uwẽ norĩ zô wawi sô tiro'wanhi'riti za'ra.
4Tawamhã Izaraéu nhihudu norĩ awẽm na awẽ wi utu za'ra wamhã, ma tô tame ẽtẽ za'ra hã siwi 'manha, 'Re ihâimana u'âsi mono ma. Tahawa ma tô duré tinhimizama zata na tinhoprubzém na ãma tinhoprub za'ra, danhoprubzé ãma irowẽ za'ẽtẽ na. 5Tawamhã te anharĩ za'ra ãne:
— Uburé Izaraéu nhihudu norĩ wa'õtõ 'remhã, e ma norĩ dame isi'aba'réi õ, Uburé Danhib'apito nho'a, Mispa ãma dasi'rã'õno ihâimanazéb u hã.
(Ta norĩ hã sena na ropisudu hã ma tô aré siwi 'manha, ãne: Ni'wa sô Mispa ãma dasi'rã'õno ihâimana ãma robaba wamhã, te za dasiwi wĩrĩ ni.)
6Tawamhã Izaraéu nhihudu norĩ, Bẽzamihĩ nhihudu norĩ ãma siwamri za'ra wa, ma tô ãne nharĩ za'ra:
— Ã bâtâ na Izaraéu nhihudu norĩ, misi tite a'uwẽ wamri hã ma tô simini za'ra. 7E niha wa za Bẽzamihĩ nhihudu norĩ si'aibâ isi'mairẽme za'ra ma hã, pi'õ hã tãma 'mai'âri za'ra ni, Uburé Danhib'apito ma, wa te ropisutu za'ra nherẽ, za wa'ra sipi'õ norĩ, wa te tãma 're isõmri za'ra mono õ na hã.
8Tawamhã te sisadanharĩ za'ra ãne:
— Izaraéu nhihudu norĩ 'remhã, e 'wam norĩ Mispa ãma Uburé Danhib'apito 're ihâimana mono zéb ãma hã isihâi'ré za'ra õ.
Tawamhã ma tô siwi waihu'u, Zabesi-Ziliadi ãma hã dasi'rã'õtõ u ida'maimorĩ õ na hã. 9Dahâiba hã da te sa'rata za'ra wamhã, ni'wa hã Zabesi-Ziliadi hawimhã sihâi'ré õ di. 10Tawamhã uburé ma tô ãma sisaze za'ra, 12 miu na aibâ norĩ hâiba na isiptete norĩ ãne rowaihu'u ré te te satõrĩ za'ra da hã:
— Mo oto ai'aba'réi wa'aba, Zabesi-Ziliadi ãma 're ihâimana za'ra mono norĩ hã asiwi uprosi aba da aibâ norĩ hã, pi'õ norĩ hã, duré ai'uté norĩ hã. 11Ãne te za i'manharĩ za'ra wa'wa za: Uburé aibâ norĩ hã te za asiwi i'uprosi 'wa, duré uburé pese pi'õ ihâiba ubuni'õ norĩ hã.
12Tawamhã Zabesi-Ziliadi ãma azarudu ihâiba ubuni 're ihâimana za'ra mono norĩ, ma tô 400 na ihâiba na ta norĩ hã sõpẽtẽ za'ra. Tahawa, ma tô Silo na 'ri nho'õmo nhisi ãma te te sima i'ri nhoré za'ra u te te simro, Cana'ã ti'ai ãma 're ihâimana mono u.
13Taha pari uburé norĩ, ma tô romreme wẽ hã Bẽzamihĩ nhihudu norĩ ma, sõmri za'ra, ẽtẽ tõmo wawẽ Rimo na isisi ãma ihâimana za'ra norĩ ma hã, rowẽ na si si'wapéi ãna apâ siré 're hâimana za'ra mono da. 14Tawamhã Bẽzamihĩ nhihudu norĩ, ma tô apâ sina siri za'ra. Tahawa, Izaraéu nhihudu norĩ, Zabesi-Ziliadi hawimhã azarudu 400 na ihâiba na ma tô tãma sõmri za'ra, da te isimroi õ hã dazu. Tane nherẽ, uburé pi'õ norĩ za'rada hã aibâ hâiba za'rata wab õ di. 15Ãhã wa, Bẽzamihĩ nhihudu norĩ ãma hã ma tô aiwamri pese za'ra, Uburé Danhib'apito nhimi'manharĩzém hawim na Izaraéu nhihudu norĩ 'remhã misi a'uwẽ wamri zô ro'wanhi'riti wa, dawi. 16Tahawa te Izaraéu nhihudu norĩ nhib'ihâ'a hã nharĩ za'ra ãne:
— Bẽzamihĩ nhihudu norĩ nhipi'õ hã 'maihâimana õ di. E marĩ, wa za tawamhã 'manharĩ za'ra ni, aibâ isi'atarẽme norĩ ma, nima hawi pi'õ wa te we tãma i'mai'ãwisi za'ra da hã, ãma mro mono da. 17Izaraéu nhihudu norĩ 'remhã 12 na tite a'uwẽ wamri hâimana za'ra nherẽ, te te siwi i'manhimini da hã mare di. Tahawa Bẽzamihĩ nhihudu norĩ si'utõrĩ tõ da wa za niha hã wasiwi 'manharĩ ni. 18Tane nherẽ, wa'ra norĩ sipi'õ na 're mro za'ra mono da, wa te tãma 're isõmri za'ra mono da hã, mare di za.
E marĩ wa, ma tô ãne hã sima nharĩ za'ra. Ta norĩ hã ma tô aré ãne ropisudu hã siwi 'manha: Ni'wa hã Bẽzamihĩ nhihudu ma, pi'õ te te tãma isõmri ma hã te za ropire hã niha na hã da te tãma 're pisutu. 19Tahawa te duré ãne nharĩ za'ra:
— Wahup sidâpâsi Uburé Danhib'apito te, dato isa'ẽne hã 'rinho'u Silo ãma 're ihâimana mono zéb u hã romhuture di oto.
(Silo hã Bétéu hâiwa nhimire niwĩ te 're hâimana, Rebona hâiwa nhimi'e niwĩmhã, duré bâdâdi bâtâ pusizém niwĩ Bétéu hawi Siquẽ u inomro hã.)
20Tawamhã Izaraéu nhihudu norĩ nhib'ihâ'a, te Bẽzamihĩ nhihudu norĩ ma nharĩ za'ra ãne:
— Mo oto ai'aba'réi wa'aba, uva 'ru ãma aima'uri za'ra wa'aba da, 21ta hawi asimiza'rese sina rob'madâ'â za'ra wa'aba da. Tawamhã Silo ãma azarudu 're ihâimana za'ra mono, dato isa'ẽtẽ siwaprã si'rẽne sina wairébé wamhã, a norĩ wa'aba zama te za duré uva 'ru hawimhã aiwairébé 'wa za. Ãhã wa, aihâiba mono bâ azarudu waibui aba mono wamhã, te za asima isimroi wa'aba mo za, õne haré Bẽzamihĩ nhihudu norĩ nhipti'ai u hã. 22Tawamhã ãne zarina imama norĩ, duré isisãnawã norĩ wama siwapsari za'ra da, we si'aba'réi wamhã, wa za ãne tãma nharĩ za'ra ni za: “Ma'ãpé wazawi za'ra na hã ãma wama rowairébé za'ra wa'aba, si'ubumro da. E marĩ wa. Zabe-Ziliadi wa te 'wapé za'ra wamhã, uburé Bẽzamihĩ nhihudu norĩ ma da hã, pi'õ norĩ ibâ na wa te wasiwi waibui õ di. Duré a norĩ wa'wa hã ropisudu ihâimanazém na hã ãma upa za'ra wa'aba dai õ di. E marĩ wa. A norĩ wa'wa hã õ norĩ ma, ai'ra tãma sõmri za'ra wa'aba õ wa. Õ norĩ hã aima sa'rese za'ra wa'aba õ di. Pi'uriwi ma tô dasiwi waibu za'ra ni.”
23Ãne ma tô, Bẽzamihĩ nhihudu norĩ hã siwi 'manha. Hâiba mono bâ azarutu norĩ si'wapsisi mono ré, timro da hã ma tô te te sima pisutu. Taha pari, ma tô oto te te simro apâ. Tawamhã tirob u apâ te te sina siri za'ra wamhã, ma tô apâ 'rinho'u hã te te 'ri téb za'ra, tiza'rui mono bâ iwa 're ihâimana za'ra mono zéb da hã. 24Taha ré, ma tô Izaraéu nhihudu norĩ hâiba amo hã wairé. Tahawa, tite a'uwẽ wamri mono bâ 're ihâimana za'ra mono zéb u ma tô apâ ai'aba'ré õne haré, ti'ra norĩ u, duré tinhipti'a za'ra u.
25Tawamhã tô taha mono na hã, Izaraéu nhihudu norĩ nhib'apito hã tãma 're hâimana za'ra mono õ di. Hâiba mono bâ ma tô te te sima 're iwẽ za'ra mono zéb zarina si uburé marĩ hã te te sima 're 'manharĩ za'ra.
Currently Selected:
Zuize 21: xavBP
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc.
