Ezodu 6
6
1Tawamhã Uburé Danhib'apito, te asa tãma tinha ãne, Mozésihi ma:
— A hã te za oto i'madâ Ezitu te apito ma, za te i'manharĩzé hã. Ĩwaihu'u pese zarina te tãma iwaihu'u zéb zarina te za ĩnhib'a'uwẽ norĩ si'aba'ré da hã oto tãma rowairébé za'ra. Ĩhe, ĩnhiptete zarina te za Izaraéu nhihudu norĩ ma hã rob'ru za'ra, ite ti'ai wa'õtõ nho'õmo hawi wairébé da hã oto.
'Re ihâimana u'âsi mono, Mozésihi zô ihârâzé wasu'u
2Tawamhã 'Re ihâimana u'âsi mono, te Mozésihi ma tinha ãne:
— Wa hã, Uburé Danhib'apito uptabi. 3Wa tô Abra'ãhã ma, 'Re ĩhâimana u'âsi mono ĩwaihu'u pese na tãma ĩsihâi'ré, Izaquihi ma, duré Zacoho ma hã. Tane nherẽ, Uburé Danhib'apito uptabi na ĩnhisi na tãma ĩsiwaihu'u za'ra õ di. 4Wa tô iwẽ na tãma ropisutu za'ra, Cana'ã na romnhisi ãma ti'a te tãma sõmri za'ra da, isiré a'uwẽ'õ norĩ iwa 're ihâimana za'ra mono zé hã. 5Ta hã wa hã, ãhã na awa'awi na wa tô Izaraéu nhihudu norĩ 're iwazidi za'ra mono zé hã wapa. Ta hã ezipsiu norĩ te te 're wada'uri pese za'ra mono wa, wa tô oto po're puru, tãma ĩnhimiropisutu za'ra zém na iwẽ na hã. 6Tahawa ãne Izaraéu nhihudu norĩ ma, ĩzadawa wasu'u za'ra na: “Wa hã Uburé Danhib'apito uptabi. Wa za ĩnhib'a'uwẽ norĩ hã sõ'reptu za'ra Ezitu hawi, ezipsiu norĩ pawa'âbâ ãna te te 're romhuri za'ra mono da, te te 're iwada'uri pese za'ra mono zém hawimhã. Tahawa wa za ĩwaihu'u pese ré ĩpaihi hã sarõtõ, ezipsiu norĩ nhisiwimhã ĩnhimihâzém na sa'ẽtẽ te hâ za'ra da hã. Tawamhã Izaraéu nhihudu norĩ si wa za asõ'reptu za'ra wa'wa za. 7Ĩnhib'a'uwẽ na 're anomro aba mono da, wa za ãne hã aima 'manharĩ za'ra wa'wa. Tawamhã wa hã ate za'ra wa'wa 'Re ihâimana u'âsi mono na wa za oto 're ĩhâimana. Duré tawamhã wa hã Uburé Danhib'apito, ate wa'wa 'Re ihâimana u'âsi mono, ezipsiu norĩ ma 're iromhuri za'ra wa'aba mono zém hawi te i'asõ'reptu za'ra wa'aba na hã te za oto tô a norĩ wa'wa asiwi ĩwaihu'u 'wa. 8Tawamhã wa hã wa za Abra'ãhã ma, Izaquihi ma, duré Zacoho ma, ti'a za te tãma isõmri za'ra zém na te iropisutu u hã te asimroi wa'wa. Tawamhã õ hã ti'a hã wa za aima sõmri za'ra wa'wa, ate na oto aima 're hâimana za'ra wa'aba mono da. Wa hã Uburé Danhib'apito.”
9Tawamhã te te tãma iwaihu'uzéb zarina, ma tô Mozési Izaraéu nhihudu norĩ ma sadawa wasu'u za'ra, 'Re ihâimana u'âsi mono hã. Tane nherẽ, te te sima wẽ za'ra õ di, te te siwi iwapari da hã. E marĩ wa. Tãma robzei ãna hâimana za'ra wa, pawa'âbâ ãna te te 're romhuri za'ẽtẽ za'ra mono wa.
10Tawamhã Uburé Danhib'apito te Mozésihi ma tinha ãne:
11— Mo oto Ezitu te apito ma nharĩ da aimorĩ, Izaraéu nhihudu norĩ ma, ite ti'ai wa'õtõ nho'õmo hawi wairébé da, te te tãma rowairébé za'ra da hã.
12Tane nherẽ, ma te Mozési, Uburé Danhib'apito hã ãne sada'â:
— Bété, Izaraéu nhihudu norĩ te te siwi ĩwapari da, te te sima wẽ za'ra õ wamhã, ãne wamhã, duré apito zama te te sima wẽ õ di za, taha zama te te ĩwapari da hã. Wa hã duré ĩmreme zani su'u õ di, duré ĩmreme zani tob di.
13Tawamhã Uburé Danhib'apito, ma tô Mozési norĩ ma tãma waihu'u zahuré Arãhã me, Izaraéu nhihudu norĩ ma, te te tãma rowasu'u za'ra da hã, duré Ezitu te apito Fara'oho ma te te tãma nharĩ zahuré da hã, Izaraéu nhihudu norĩ, ti'ai wa'õtõ nho'u Ezitu hawi te te isani za'ra zém na hã.
Mozésihi norĩ hi'rata wasu'u, Arãhã hi'rata me
14Ã hã rob'ui'éré hã Mozési norĩ hi'rata za'ratazé, Arãhã hi'rata me ãne: Rubẽ, Zacoho 'ra poto 'rada, maparane si'uiwa na i'ra nhisi norĩ hã ãne: Enoqui, Palu, Hezirõ, Carmi. Ã norĩ hã Rubẽhẽ hawi a'uwẽ poto upsãtã na ma tô tihâimana za'ra. 15Ãne Simiãhã 'ra norĩ nhisi hã: Zemu'é, Zami, Oade, Zaquĩ, Zoa, duré Sau hã, cananeu norĩ sipi'õi zé're hawi ai'uté. Ã norĩ hã Simiãhã hawi a'uwẽ poto upsãtã na ma tô tihâimana za'ra. 16Ã hã Levihi 'ra norĩ nhisi ipoto mono bâ hã ãne: Gésõ, Coate duré Merari. Tawamhã Levihi ãma 're hâimana mono ré ma tô ãma tiwahu, 137 na. 17Gésõ hã maparane i'ra norĩ, ãne isisi norĩ mama na ma tô tihâiba: Libni duré Simei. Ta norĩ hã sihudu ahâ uptabi zahuré di. 18Ã hã duré Coatehe 'ra norĩ, ãne isisi za'ra hã: Anrã, Isa, Hebrõ duré Uzi'é. Coatehe ãma ma tô 133 na ãma tiwahu. 19Merari maparane i'ra norĩ, ãne isisi norĩ mama na ma tô tihâiba: Mali duré Musi. Ã hã Levihi hawi a'uwẽ, isihudu norĩ.
20Tawamhã Anrã, ma tô tina wapté Zoquebede na ĩsisi na timro. Ta hawimhã ma tô duré Arã norĩ hã, Mozésihi me tipoto zahuré. Tawamhã Anrã ãma hã, ma tô tiwahu, 137 na. 21Isa si'ubdatõ i'ra norĩ, ãne isisi norĩ mama na ma tô tihâiba: Cora, Nefegue duré Zicri. 22Tawamhã Uzi'é zama hã, ma tô si'ubdatõ i'ra norĩ, ãne isisi norĩ mama na tihâiba: Mizaéu, Elzafã duré Sitri. 23Tawamhã Arã, ma tô Eliseba, Aminadabihi 'ra, Nasõhõ hidiba na timro. Ta hã maparane si'uiwa na i'ra hã. Nadabe, Abiu, Eliaza duré Itama. 24Cora ma tô si'ubdatõ i'ra norĩ, ãne isisi norĩ mama na tihâiba: Assir, Eucana, Abi'asape. Ã norĩ hã Cora hawi a'uwẽ poto upsãtã na ma tô tihâimana za'ra. 25Tawamhã Eliaza, Arãhã 'ra hã ma tô Puti'éhé 'ra sipi'õ na timro. Ta hã ma tô ti'ra hã sisi, Finéa na. Duré ã norĩ hã ma tô levita norĩ wa'õtõ nhib'ihâ'a na tãma 're hâimana za'ra.
26Ã norĩ hã Arã norĩ, Mozésihi me ma tô Uburé Danhib'apito, ãne na tãma waihu'u zahuré: “Izaraéu nhihudu norĩ, Ezitu hawimhã te za i'awazere 'wa.” 27Ta norĩ hã ma tô Ezitu te apito Fara'oho u tineb zahuré, ta hawi Izaraéu nhihudu norĩ te te awazere zahuré da hã.
'Re ihâimana u'âsi mono, Mozésihi ma, te te inharĩzé wasu'u
28Uburé Danhib'apito, Mozésihi ma, Ezitu ãma te te tãma nharĩ wamhã, 29ma tô ãne tãma tinha:
— Wa hã Uburé Danhib'apito. Ma'ãpé Ezitu te apito Fara'oho ma tãma ĩzadawa wasu'u na, uburé te aima iwaihu'uzém na hã.
30Tane nherẽ tawamhã Mozési, ma tô ãma tãma wa'rã ãne:
— Ĩnhib'apito, wa hã ĩmreme tété hâ di, duré ĩmreme zani su'u õ di. E niha te za tawamhã apito ĩwapari waihu'u, ãne nherẽ.
Currently Selected:
Ezodu 6: xavBP
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc.
