Ezodu 5

Mozési norĩ, Arãhã me, Ezitu ãma apito ma, te te tãma irowasu'u zahuré zé wasu'u

1Tawamhã Mozési norĩ Arãhã me, ma tô Ezitu te apito u tineb zahuré. Tahawa, te ãne tãma rowasu'u zahuré:

— Uburé Danhib'apito, Izaraéu nhihudu norĩ te 'Re ihâimana u'âsi mono hã te tinha ãne: “Ĩnhib'a'uwẽ norĩ ma, te za irowairé, rop si 're irosa'wari mono u si'aba'ré da, tame niha bâtâ na ĩ'ãma 're iwata za'ra mono zém na dato isa'ẽne te te sima 're 'manharĩ za'ra mono da.”

2Tawamhã apito Fara'o te ãma sadanharĩ zahuré ãne:

— E 'wa hã bété Asib'apito wa'wa, imreme te iwapari da hã, duré Izaraéu nhihudu norĩ ma, te iwaprosi da hã, ã hawi wairébé da. Asib'apito wa'wa hã ĩma waihu'u õ di. Tahawa Izaraéu nhihudu norĩ ma, ã hawi wairébé da, te tãma irowairébé za'ra da hã mare di za.

3Tawamhã Mozési norĩ Arãhã me, ma te ãma tãma wa'rãmi zahuré ãne:

— Ebreu norĩ te, 'Re ihâimana u'âsi mono, ma tô wei watẽme mo, te te wama nharĩ da. Tahawa, ma'ãpé wama waprosi za'ra na, si'ubdatõ bâtâ 're wazâmorĩ da, rop si 're irosa'wari mono u, Uburé Danhib'apito, wate 'Re ihâimana u'âsi mono ma, ãma tãma wanhoprub za'ra da, danhimizama zata na hã. Wasi'aba'réi õ wamhã, wahâzé na, duré dasi'wapé na te za wama rob'manharĩ za'ra, wasi'utõrĩ da hã.

4Tawamhã Ezitu te apito, te Mozési norĩ ma, Arãhã me tãma nharĩ zahuré ãne:

— E marĩ da, ma tô Izaraéu nhihudu norĩ nhimiromhuri hã i'wa'rutu 'wa. Tahawa te za apâ romhuri u dasi'aba'ré da hã dama irowairébé 'wa.

5Tahawa, te duré tãma nharĩ zahuré ãne:

— Ãhã na awa'awi na Izaraéu nhihudu norĩ, ã hã ti'ai wa'õtõ nho'õmo 're, daza'rui mono bâ ahâ na 're hâimana za'ra mono nherẽ, te a norĩ wa'wa tinhimiromhuri te te wawi rẽme za'ra da hã asima iwẽ wa'wa.

6Tawamhã tô taha bâtâ na ma tô apito, dapawa'âbâ ãna dama rob'rui'wa norĩ ma duré danhib'ihâ'a norĩ ma ãne tãma waihu'u za'ra:

7— Ã hawimhã a'uwẽ norĩ ma, amnho teihi tãma 're sõmri za'ra wa'aba mono õ di za, ti'ai u'ẽne te te ãma 're 'manharĩ za'ra mono da hã. Õ norĩ hã te za oto si'uihâ na te te sima 're ubumro za'ra, za te te ãma 're iromhuri za'ra mono da hã. 8Tane nherẽ, te za a norĩ wa'wa õ norĩ ti'ai u'ẽne te te 're i'manharĩ za'ra mono hã aiwab zô 're isa'rata za'ra wa'aba mo za, sizaba'a ãna te te 're i'manharĩ za'ra mono zô. E marĩ wa. Wa'a za'ra wa, te nasi hã ãne: “Oto danhimizama zata na wate 'Re ihâimana u'âsi mono ma hã wanhoprub za'ra wa'aba!” 9Ã hã a'uwẽ norĩ romhuri ipire na te te 're rob'ma'wamarĩ mono da, te za apâ ãma tãma 're ihâimo za'ra wa'aba mo, isimiromhuri za'ra zé hã. Ãhã wa, dazadawa nhipese na rowasu'u hã te te duré iwapari za'ra da hã mare di za.

10Tawamhã dapawa'âbâ ãna dama rob'rui'wa norĩ, danhib'ihâ'a norĩ me ma tô oto wairé, apito Fara'oho hawimhã. Ãne te tawamhã tãma sadawa wasu'u za'ra, Izaraéu nhihudu norĩ ma:

— Ãne apito ma tô waihu'u, amnho teihi wa te aima 're sa'wari za'ra wa'aba mono tõ da oto. 11Õ hã ma tô ti'ru, asi'uihâ na tô asima 're ubumro za'ra wa'aba mono da, nima me amnho teihi 're isõpẽtẽ za'ra wa'aba mono zéb ãma. Tane nherẽ, te za tô ti'ai u'ẽtẽ 'manharĩ na aiwap si 're irob'ma'wamarĩ aba mo.

12Tahawa ma tô Izaraéu nhihudu norĩ, Ezitu ti'ai 'remhã te te sô ropé, amnho teihi da te 're itehâri si'atarẽme mono zô si'uihâ na te te sima 're ubumro za'ra mono da. 13Tawamhã apito Fara'oho zapari dawada'uri'wa norĩ hã ma tô nasi awẽ sidâpâsi ti'ai u'ẽne aiwap si te te nasi 'manharĩ za'ra da hã nasi ãma wapsé za'ra, Izaraéu nhihudu norĩ hã amnho teihi te te nasi sima i'ubumro za'ra na. 14Apito zapari dawada'uri'wa norĩ, Izaraéu nhihudu norĩ nhib'ihâ'a romhuri te te sima 're i'madâ'â za'ra mono norĩ hã te nasi hâ za'ra. Tahawa, te duré nasi sadanharĩ za'ra ni ãne:

— E marĩ wa, iwana ne aiwap si ti'ai u'ẽne 're i'manharĩ za'ra wa'aba mono ne hã, ahâmhâ hã, duré ãhã na zama asiwi 'manharĩ aba õ di.

15Tawamhã danhib'ihâ'a tisiré Izaraéu nhihudu norĩ te te 're iwada'uri za'ra mono norĩ hã ma tô ai'aba'ré, Apito Fara'oho u, tãma siwapsari za'ra da. Ãne te tawamhã tãma nharĩ za'ra:

— E marĩ da, ma tô ãne na hã wama irob'manharĩ za'ra. Wa norĩ hã aima romhuri'wa za'ra 'wa. 16Amnho teihi hã da te oto wama 're ubumro za'ra mono õ di. Tane nherẽ, te tô da te 're wawada'uri pese za'ra, ti'ai u'ẽtẽ 'manharĩ na wa te tô ãma 're uzusi za'ra mono da hã. Tane nherẽ, te duré wawada'uri'wa norĩ hã nasi wahâ za'ra. Tahawa asapari aima dawada'uri'wa norĩ hã ãma wama i'upai'wa na hã te tihâimana za'ra.

17Tawamhã apito Fara'o, ma asa ãma sada'âbâ za'ra ãne:

— A norĩ wa'wa hã aiwa'a za'ra wa'aba di. Duré asima wẽ za'ra wa'aba õ di romhuri hã. Tahawa te aima iwaprosi za'ra wa'aba zé hã te nasi ĩwi iwaptẽrẽ za'ra wa'wa, ai'aba'réi wa'aba da, 'Re ihâimana u'âsi mono, Asib'apito za'ra wa'aba ma, asimizama zata na tãma ãma 're asõprub za'ra wa'aba mono da. 18Apâ ai'aba'réi wa'aba, romhuri za'ra wa'aba da. Amnho teihi hã tô da te aima i'ubumro za'ra wa'aba da hã mare di za. Tane nherẽ, te za tô aiwap si ti'ai u'ẽne hã 're i'manharĩ za'ra wa'aba mo.

19Tawamhã Izaraéu nhihudu nhib'ihâ'a norĩ wi hã ma tô tiwi tirowaihu'u õ pese za'ra, bâtâ bâre iwana ne aiwap si ti'ai u'ẽne za te te 're i'u'ẽtẽ za'ra mono da, da te tãma inharĩ za'ra zé hã te te sina wapari za'ra wa. 20Tawamhã apito Fara'oho hawi oto wairébé wamhã, ma tô Mozési norĩ hã Arãhã me oto siwi sõpẽtẽ, õ norĩ zô isimipari zahuré zéb ãma. 21Tahawa, ma tô tãma nharĩ zahuré ni duré ãne:

— Uburé Danhib'apito, marĩ i'manharĩ aba zé hã ma tô 'madâ. Tahawa te za duré ai'ahâri 'wa. Ai'u'âbâ wa'aba ma tô apito hã duré tãma romhuri'wa norĩ zama wazada tinhiti'ru za'ra. A norĩ wa'wa ma tô isimirosa'rata wasété za'ra hã wazada tãma isõmri 'wa, te te wa'uprosi da.

Mozési, 'Re ihâimana u'âsi mono ma, te te duré irobzanhamrizé wasu'u

22Tawamhã Mozési, Uburé Danhib'apito ma te duré tãma tinha ãne:

— 'Re ihâimana u'âsi mono, e marĩ da, ma tô ã hã asib'a'uwẽ norĩ ma hã irob'manharĩ wasé. E marĩ zô, te tawamhã we ĩzatõ ãwamhã. 23Ezitu te apito ma, asisi na te tãma irobzanhamri hawi ma tô õ hã ã hã a'uwẽ norĩ ma hã rob'manharĩ wasété za'ra. Tane nherẽ, a hã ãma aime zara õ di. Duré sõ'reptu za'ra õ di.

Currently Selected:

Ezodu 5: xavBP

Highlight

Copy

Compare