1 Corĩtu 3

'Re ihâimana u'âsi mono ma romhuri'wa norĩ

1Ĩsisãnawã norĩ, te aima roti waihu'u za'ra wa'aba õ di, ni'wam norĩ 'Re ihâimana u'âsi mono Pẽ'ẽzani ré 're ihâimana za'ra mono norĩ ma, te 're iroti mono ne hã. Tazahã, a norĩ wa'wa hã ti'ai ãma isazei'õ'wa 're ihâimana za'ra mono norĩ ma, te 're iroti mono ne, wa aima roti za'ra wa'wa, Cristu asina 're i'umnhasi za'ra wa'aba mono zém na ai'uté ne 're i'aihâimana za'ra wa'aba mono ma. 2Ai'uté norĩ, tina hâiwa'u na si 're isaihuri mono ne, wa tô aima roti za'ra wa'wa, zahadu asaihuri waihu'u aba õ wa, dasa itete na hã. Ãhã na zama zahadu sadai õ di, isadaihu'u wẽ za'ra wa'aba da hã. 3E marĩ wa. Zahadu 're aihâimana za'ra wa'aba mono wa, ti'ai ãma isazei'õ'wa siwa'ru 're ihâimana za'ra mono ne.

Asi'umnhasi pe, duré 're i'asiwasu za'ra wa'aba mono zéb zama aima 're hâimana za'ra wa'aba mono wamhã, e tawamhã ãne na aihâimana za'ra wa'aba zé hã te te aiwasu'u za'ra wa'aba ã bâ, zahadu ti'ai ãma isazei'õ'wa ne 're i'aihâimana za'ra wa'aba mono na hã, duré ta norĩ hâimanazéb zarina, uburé marĩ 're i'manharĩ za'ra wa'aba mono na hã. 4Ni'wa hã ãne te te nharĩ wamhã: “Wa hã Pauluhu niwĩmhã”, duré ni'wa aimawi hã te te nharĩ wamhã, ãne: “Wa hã Apoluhu niwĩmhã”, ãne 're aihâimana za'ra wa'aba mono wamhã, e 're 'manharĩ za'ra wa'aba mono ã bâ, ti'ai ãma isazei'õ'wa 're ihâimana za'ra mono norĩ ne.

5Tawamhã bété, e 'wa hã Apolu. E 'wa hã duré Paulu. Wa norĩ hã taré 'Re ihâimana u'âsi mono ma romhuri'wa na si, 're iwahâimana mono. Duré wazadawa hawi isaze za'ra wa'wa, Wanhib'apito hã. Wahâiba si'uiwa na romhuri, wa wa te 're 'manharĩ, Wanhib'apito te te wama 're i'anhomri mono hã. 6Wa hã wa rob're. Tawamhã Apolu te rob're nasi di'i. Tane nherẽ, 'Re ihâimana u'âsi mono si ma tô a'manha, prédu wẽ za'ra da. 7Rob're'wa hã duré robdi'i'wa hã pire na 're hâimana zahuré mono õ di. 'Re ihâimana u'âsi mono si ipire hã, taha si te te 're 'manharĩ mono wa, 're prédu wẽ za'ra mono da. 8E marĩ wa. Rob're'wa nhimiromhuri hã duré robdi'i'wa nhimiromhuri hã aiwab zahuré wa. 'Re ihâimana u'âsi mono hã te za te te dama 're awa'âbâ, romhuri dahâiba mono bâ da te 're i'manharĩ za'ra mono zarina. 9E marĩ wa. Wa norĩ hã 'Re ihâimana u'âsi mono ma romhuri na, wasiré romhuri'wa na 're wahâimana mono wa. A norĩ wa'wa hã rob're da, ti'a ne te 're aihâimana za'ra wa'aba mo, 'Re ihâimana u'âsi mono te te aiwa 're irob're za'ra wa'aba mono. 10'Re ihâimana u'âsi mono hã te ãma 're romhuri mono da, tinhoprubzé iwẽ te te ĩma isõmri zarina, wa tô 'manha 'ri nhana'rada hã, 'ri'wa isimiromhuri wẽ ne. Tane nherẽ, aimawi norĩ hã te 'ri hã te te siwi 're 'manharĩ, ã hã 'ri nhana'rata nhisiwimhã. Tane nherẽ, tô dahâiba mono bâ da te ãma 're ipibui pese za'ra mono da si, da te 're i'ri nharĩ za'ra mono na hã. 11E marĩ wa. 'Re ihâimana u'âsi mono hã Zezu Cristu te te sãrĩ pari wa, misire 'ri nhana'rata ne 're hâimana mono da. Tahawa aimawi hã isine hã 'maihâimana waihu'u õ di za, 'ri nhana'rada hã. 12Ni'wam norĩ hã ẽtẽ waipo pré oru na niwamhã ẽne iwa'âbâ za'ẽtẽ na niwamhã ẽtẽ waipo prã prata na te te 're 'ri za'ra, 'ri nhana'rata nhisiwimhã. Duré ni'wam norĩ hã wede na niwamhã du'wa na te te 're 'ri za'ra, niwamhã 're'õmop su na. 13Dahâiba mono bâ da te 're iromhuri za'ra mono zé hã te za sõ'awi tihâimana za'ra za, Wanhib'apito te bâtâ ãma za sihâi'ré za'ra wa. Ã hã bâdâ hã te za wi za, unhama na. Tawamhã uzâ hã te za pibu za'ra za, dahâiba mono bâ danhimiromhuri hã sena zô. Te za ahâi'ré, niha na danhimiromhuri hã. 14Ni'wa hã 'ri nhana'rata nhisiwi te te i'ri hã unhama na ro'o nherẽ, tiwi sab u'âsi wamhã, tawamhã ta hã tipawa'â te za ti'â za. 15Tazahã, 'ri'wa nhimiromhuri, uzâ te te uprosi wamhã, tawamhã ta hã te za simini za, tipawa'â. Tane nherẽ, ta hã te za tinho'reptuzé hã sina uwaimra, unhama ro'o 'rowi, ni'wa te te ro'razâri wẽ wa, isisõ'reptu ne. 16E aima waihu'u za'ra wa'aba ã bâ, a norĩ wa'wa hã 'Re ihâimana u'âsi mono 're isãmra mono zé 'ri iwẽ uptabi na 're i'aihâimana za'ra wa'aba mono na hã, duré 'Re ihâimana u'âsi mono Pẽ'ẽzani aiwa 're ihâimana za'ra wa'aba mono na hã. 17Ãne wa, ni'wa hã 'Re ihâimana u'âsi mono 're isãmra mono zé 'ri iwẽ uptabi te te pru wamhã, 'Re ihâimana u'âsi mono te za uprosi za, ta hã. E marĩ wa. 'Re ihâimana u'âsi mono 're isãmra mono zé 'ri iwẽ uptabi hã aimawi wazé pese na tãma 're hâimana mono wa, a norĩ wa'wa hã tô 'Re ihâimana u'âsi mono 're isãmra mono zé 'ri iwẽ uptabi na 're aihâimana za'ra wa'aba mono wa.

18Ni'wa hã 'râwi sima sadawa nhipese tõ! Ni'wa hã asiré za'ra wa'aba hã ti'ai ãma danhimirowaihu'u zarina, rowaihu'u pese 'wa na 'râwi te te sina 're rosa'rata mono wamhã, ta hã tô ti'ai ãma dama hã 'rãsiwamnarĩ na 're hâimana mono, rowaihu'u wẽ 'wa na sena na 're hâimana mono da. 19E marĩ wa. Ti'ai ãma rowaihu hã tarére wa, 'Re ihâimana u'âsi mono tõmo nho'a hã. 'Re ihâimana u'âsi mono mreme na Ibaihâ Iwazé pese na rob'ui'éré hã te tinha, ãne: “'Re ihâimana u'âsi mono hã ti'ai ãma rowaihu'u'wa norĩ ma, te te 're arob'manharĩ, tinhimirowaihu'u na 'râwi 're siwaibui mono da.” 20Duré ãne na rob'ui'éré te tinha: “Uburé Danhib'apito hã rowaihu'u'wa norĩ nhimirosa'rada te te waihu'u pese di, marĩ dai õ na hã.” 21Tahawa, da'ãma asima 're rowẽ za'ra wa'aba mono tõ. E marĩ wa. Uburé marĩ ate za'ra wa'aba wa, 22tô Paulu, niwamhã Apolu duré Pedruhu zama, duré ã hã ti'a hã, dahâiba ré dahâimanazé duré dadâ, duré awa'awi hã duré romhutu'õmhã. Uburé ã norĩ hã aima za'ra wa'aba, te 're hâimana za'ra. 23Duré a norĩ wa'wa hã Cristuhu te hã. Duré Cristu hã 'Re ihâimana u'âsi mono te.

Currently Selected:

1 Corĩtu 3: xavBP

Highlight

Copy