MACIU 1
1
Na i Vola ni Kawa i Jisu Karisito
(Luke 3.23-38)
1Na i vola ni kawa i Jisu Karisito, na luve i Tevita, na luve i Epara-ama.
2E tama i Aisake o Epara-ama, ka tama i Jekope o Aisake, ka tama i Juta kei iratou na tuakana kei iratou na tacina o Jekope, 3e tama i Peresi kei Sera o Juta, ka tinadrau o Tema, ka tama i Eseroma o Peresi, ka tama i Erami o Eseroma, 4ka tama i Amenatave o Erami, ka tama i Nasoni o Amenatave, ka tama i Salimoni o Nasoni, 5ka tama i Poasa o Salimoni, ka tinana o Reapi, ka tama i Opeti o Poasa, ka tinana o Ruci, ka tama i Jese o Opeti, 6ka tama i Tevita na tui o Jese.#2Tui 24.14,15; 2Vei 36.10; Jere 27.20
E tama i Solomoni o Tevita na tui, ka tinana na wati Uraia, 7ka tama i Reopoama o Solomoni, ka tama i Apaijia o Reopoama, ka tama i Asa o Apaijia, 8ka tama i Josefati o Asa, ka tama i Jorami o Josefati, ka tama i Usaia o Jorami, 9ka tama i Jocami o Usaia, ka tama i Aasi o Jocami, ka tama i Esekaia o Aasi, 10ka tama i Manasa o Esekaia, ka tama i Emoni o Manasa, ka tama i Josaia o Emoni, 11ka tama i Jekonaia kei iratou na tuakana kei iratou na tacina o Josaia, donuya na gauna ni nodra kau yani ki Papiloni.
12Ia ni ra sa kau ki Papiloni sa qai sucu o Salacieli na luve i Jekonaia, ka tama i Serupepeli o Salacieli, 13ka tama i Apiuta o Serupepeli, ka tama i Elaiakimi o Apiuta, ka tama i Asori o Elaiakimi, 14ka tama i Setoki o Asori, ka tama i Akeimi o Setoki, ka tama i Iliuta o Akeimi, 15ka tama i Iliesa o Iliuta, ka tama i Matani o Iliesa, ka tama i Jekope o Matani, 16ka sai Jekope na tama i Josefa na wati Meri, ka a sucu mai vua ko Jisu, o koya ka vakatokai na Mesaia.
17O koya oqo, sa tinikava taucoko kina na i tabatamata mai vei Epara-ama kivei Tevita, ka tinikava na i tabatamata mai vei Tevita ki na gauna ni tiko vakabobula mai Papiloni, ka tinikava na i tabatamata ni oti na gauna o ya ki na sucu ni Mesaia.
Na Sucu i Jisu Karisito
(Luke 2.1-7)
18Sa vakaoqo na sucu i Jisu Karisito. A sa musuki o Meri na tinana vei Josefa, ia ni se bera ni rau vakawati, a sa votu na nona bukete mai vua na Yalo Tabu.#Luke 1.27 19Ia o Josefa, ena nona yalododonu, a sa sega ni vinakata me vakamadualaki Meri, ka sa mani lomana kina me sa tamusuka lo ga na nodrau veimusumusuki. 20Ia ni sa vakananuma tiko o koya na ka oqo, sa qai rairai vua ena tadra e dua na agilosi ni Turaga, ka kaya, “I Josefa na luve i Tevita, kakua ni rere ni tauri Meri me watimu, ni sa mai vua na Yalo Tabu na gone sa kunekunetaka. 21Ena vakasucuma o koya e dua na gonetagane, ka mo vakayacani koya ko Jisu, ni sai koya ena vakabulai ira na nona tamata mai na nodra i valavala ca.”#Luke 1.31
22A sa yaco na ka kecega oqo me vakayacori kina na vosa ni Turaga, ka a tukuna na parofita:
23“Raica, ena bukete e dua na goneyalewa ka na vakasucuma e dua na gonetagane,
Ka na vakayacani o Imanueli,”
a kena i balebale, “Na Kalou sa tiko vata kei keda.”#Aisea 7.14 (LXX)
24Ni sa yadra mai na moce o Josefa, sa vakayacora sara na ka sa vakarota vua na agilosi ni Turaga; ka sa tauri Meri me watina. 25Ia e rau sa sega ni veiyacovi, ka yacova ni sa vakasucuma oti o Meri na luvena tagane. A sa vakayacana na gone o Josefa me ko Jisu.#Luke 2.21
Currently Selected:
MACIU 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.