MACIU 2
2
O Iratou na Vulagi mai na Tokalau
1A sa sucu ko Jisu mai Peceliema e Jutia ena gauna i Eroti na tui. Ni oti ga o ya, e ratou sa yaco yani ki Jerusalemi eso na tamata vuku#2.1 Se dauvakadidike kalokalo; Vakirisi magi mai na yasana vaka ki na tokalau, 2ka taroga, “E vei o koya sa sucu me nodra tui na Jiu? Keitou a raica na nona kalokalo mai na tokalau, ka keitou sa lako mai oqo me sokalou vua.”
3Ni sa rogoca na ka oqo o Eroti na tui, sa leqa na lomana ka vakakina o Jerusalemi taucoko. 4Sa qai vakasoqoni ira vata kecega na bete levu kei ira na nodra daunilawa na tamata, ka vakataroga vei ira, “Ena sucu beka evei na Mesaia?”
5Era sa qai kaya vua, “Mai na koro o Peceliema e Jutia, ni sa vola tu vakaoqo na parofita:
6 #
Maika 5.2
‘O iko Peceliema, ena vanua o Juta,
ko sa sega ni lailai sobu mai vei ira na veikoro e Juta;
Ni na tubu mai vei iko e dua na dauveiliutaki
me na liutaki ira na noqu tamata na Isireli.’ ”
7Sa qai kacivi iratou na tamata vuku o Eroti ka taroga matua vei iratou na gauna ka a rairai kina na kalokalo. 8Sa qai talai iratou ki Peceliema, ka kaya, “Dou la'ki vakasaqara matua sara na gone lailai; ia, ni dou sa kunea, dou qai tukuna mai vei au, me'u bau la'ki vakarokoroko talega vua.”
9Ni ratou sa rogoca oti na vosa ni tui, e ratou sa mani lako sara. Ia ni ratou sa lako tiko e ratou sa raica na kalokalo ga e ratou a raica mai na tokalau. E toso tiko ki liu na kalokalo ka la'ki tu vakadua donuya na vanua e koto kina na gone. 10Sa levu dina na nodratou marau ena gauna e ratou raica kina na kalokalo. 11Ia ni ratou sa curu ki vale, e ratou sa raica na gone kei Meri na tinana. E ratou sa tekiduru ka vakarokoroko vua. E ratou sa qai dolava na nodratou taga ka cabora vua na nodratou i loloma; na koula, na ferekiniseni, kei na mura.
12E ratou sa qai lesu tale ki na nodratou vanua ena dua tani tale na sala; me vaka ni a kaya vei iratou na Kalou ena dua na tadra me ratou kakua ni lako tale vei Eroti.
Dro ki Ijipita
13Ia ni ratou sa lesu tale, sa qai rairai vei Josefa e dua na agilosi ni Turaga, ka kaya, “Mo cavutu, ka kauta na gone lailai kei tinana, ka dro ki Ijipita, ka mo tiko ga kina me yacova ni'u sa tukuna tale vei iko e dua na ka; ni sa vakarau oqo me vakasaqara na gone lailai o Eroti me vakamatea.”
14Sa cavutu o koya ka kauta na gone lailai kei tinana ena bogi, ka lako ki Ijipita, 15ka tiko kina me yacova na mate i Eroti. Sa yaco o ya me vakayacori kina na vosa ni Turaga ka a kaya na parofita, “Au a kaciva na Luvequ mai Ijipita.”#Osea 11.1
Na Nodra Vakamatei na Gone Lalai
16Ia o Eroti, ni sa qai kila ni ratou sa vakaisini koya o iratou na tamata vuku, sa cudru vakalevu sara. A vakarota me ra vakamatei o ira kece na gonetagane lalai era yabaki rua ka lako sobu mai Peceliema kei na veivanua vakavolivolita, ka yaco oqo me veidonui kei na gauna ka a vaqaqai iratou matua kina na tamata vuku o koya.
17Sa qai vakayacori sara kina na vosa i Jeremaia na parofita, ni a kaya,
18“Sa rogo e dua na domo mai Rama,
A qoqolou kei na tagi lagalaga,
E tagicaki ira na luvena o Rejieli;
Ka bese ni vakacegui kina, ni ra sa yali.”#Jere 31.15
Lesu mai Ijipita
19Ni sa mate o Eroti, sa rairai vei Josefa ena tadra mai Ijipita e dua na agilosi ni Turaga, 20ka kaya, “Cavutu, ka kauta na gone lailai kei tinana, ka lako ki na nodra vanua na Isireli, ni ra sa mate o ira era a via vakamatea na gone.” 21A sa qai cavutu o koya ka kauta na gone lailai kei tinana, ka lako ki na nodra vanua na Isireli.
22Ia ni sa rogoca ni sa tui tiko mai Jutia o Arikeleo me i sosomi kei Eroti na tamana, sa rere ni lako kina; ia ni sa vakasalataki kina ena tadra, sa mani lako sara ki na yasayasa vaka-Kalili, 23ka la'ki tiko ena koro ka yacana o Nasareci, ka me vakayacori sara kina na vosa era a kaya na parofita, “Ena vakatokai o koya me kai Nasareci.”#Mari 1.24; Luke 2.39; Joni 1.45
Currently Selected:
MACIU 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.