SEFANAIA 3
3
Na Valavala Ca i Jerusalemi kei na Nona Vakabulai
1Ena ca o Jerusalemi, na koro dukadukali ka talaidredre o ya ka sa dauvakasaurarataki ira na nona tamata. 2A sa sega tiko ni dau vakarorogo vei Jiova se ciqoma na nona veivakavulici. Sa sega ni dau vakararavi vei Jiova se me daukerea na nona veivuke. 3Era sa vaka na laione dautagi na kena i vakalesilesi; o ira na kena turaganilewa era sa vaka na olifa sa viakana, era sa sega ni rawa ni vakavoca e dua na sui me yacova na mataka ka tarava ena levu ni nodra kocokoco. 4O ira na kena parofita sa sega ni dinata na nodra i tavi ka dauveivakaisini; o ira na bete era sa vakacacana na veika sa vakatabui, ka vakatanitaka na Lawa ni Kalou me ganiti ira ga vakai ira. 5Ia sa tiko ga ena loma ni koro ko Jiova; sa vakayacora ga o koya na veika dodonu ka sega sara na ka e ca. A sa dau tauca ga na lewa dodonu vei ira na nona tamata ena veimataka kece sara ka sega ni dua na siga me lutu. Ia, o ira na tamata tawa dodonu mai kea era sa ia tikoga na caka cala ka sega ni maduataka.
6Sa kaya ko Jiova, “Au sa vakarusa oti na veimatanitu eso; au sa vakacacana oti na nodra veikoro lelevu ka laiva me rusa tu yani na nodra bainikoro kei na nodra veivaleniyadra cere i cake. Sa laladidi na kena gaunisala, ka sega na tamata e vo tu kina. 7Au a nanuma ga ni ra na qai rerevaki au kina na noqu tamata ka ciqoma na noqu i vakavuvuli, ka sega ni guilecava na veika ka'u a vakatavulica vei ira. Ia sa qai leqa ga vakalevu na nodra bula ni sa ca vakalevu sara na nodra i valavala.
8A sa kaya ko Jiova, “Ni waraki au mada. Ni wawa me yacova na siga ka'u na duri cake kina me'u beitaki ira na veimatanitu. Sa dei tu na lomaqu me'u soqoni ira vata na veimatanitu kei na veivanua ka laiva me ra tovolea mada na kaukauwa ni noqu cudru. Na waqa ni noqu cudru ena vakarusa na vuravura taucoko.
9“E muri au na qai vakayacora na veisau vei ira na lewe ni veimatanitu, era na masuti au duadua ga ka segai vei ira na kalou tale eso. Era na talairawarawa kece vei au. 10Mai na vanua yawa sara o Eciopea, era na kauta mai kina na noqu tamata era sa veituyaki tu na i madrali me ra vakacabora vei au. 11Ena gauna o ya, kemuni na noqu tamata, sa dodonu me oti kina na nomuni maduataka na nomuni a vorati au. Au na kauti ira tani kece na tamata dokadoka ka qaciqacia, ka o ni na sega vakadua tale kina ni vorati au ena noqu ulunivanua tabu. 12Au na qai biuta ga na tamata yalo rawarawa ka yalomalumalumu me ra tiko e kea, o ira era na lako mai vei au me ra vukei. 13#Vtaki 14.5O ira na vo-ni-bula e Isireli era na sega sara ni caka ca vua e dua tale, se vosa lasu, se veivakacalai. Era na vutuniyau ka tiko dei, ka sega ni dua na tamata me ra rerevaka.”
A Sere ni Marau
14Mo ni sere ka kaila ena marau, oi kemuni na Isireli!
Mo reki ena lomamu taucoko, o iko Jerusalemi!
15Sa muduka ko Jiova na nomu cudruvi;
Sa kauti ira tani na kemu meca kece o koya.
Ko Jiova, na tui Isireli, sa tiko kei kemuni;
Sa sega na i ulubale mo ni se rere tikoga kina.
16Sa voleka mai na gauna me ra kaya kina vei Jerusalemi,
“Mo kakua ni rere, na koro o Saioni!
Kakua ni vakamalumalumutaka na ligamu me damele tu!
17Sa tiko vata kei kemuni na nomuni Kalou ko Jiova,
Na nona kaukauwa sa solia vei kemuni na qaqa.
Ena marautaki kemuni ga ko Jiova,
Ena solia vei kemuni na bula vou ena nona loloma.
Ena laga sere ka mamarau ena vukumuni,
18Me vakataki ira sa mamarau ena dua na solevu.”
A sa kaya ko Jiova,
“Au sa tarova na nomuni vakarusai
Ka kauta laivi na nomuni madua.
19Sa lako tiko mai na gauna!
Au na totogitaki ira na dauvakasaurarataki kemuni;
Au na vakabulai ira kece mai na lokiloki
Ka vakalesui ira mai na vakabobulataki ki na nodra vanua.
Au na vukica na nodra madua me ra dokai,
Ka na vakacaucautaki ira o vuravura taucoko.
20Sa lako tiko mai na gauna!
Au na vakalesui ira kina sa veituyaki ki na nodra vanua;
Au na vakarogoi kemuni kina e vuravura taucoko
Ka vakayacora mo ni bula sautu tale mada.”
A veika oqo sa kaya ko Jiova.
Currently Selected:
SEFANAIA 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.