ROMA 2
2
Na Cudru ni Kalou
1O koya oqo, sa sega kina na nomu i ulubale, o iko na dauveivakalewai, veitalia ga se o cei o iko. Ni o sa vakalewai ira na tani, ka qai cakava tale na veika era sa vakayacora, o sa vakavuna ga vakataki iko na nomu cudruvi.#Maciu 7.1; Luke 6.37 2Eda sa kila ni sa dina tiko na Kalou ena nona cudruvi ira era sa vakayacora na ka oqo. 3Ia o iko, na wekaqu, o sa dau vakayacora na veika o vakalewa vei ira na tani! O sa nanuma beka kina ni o na dro bula mai na cudru ni Kalou? 4Se o sa rairai beca na yalovinaka ni Kalou, kei na nona dauveiciqomi, kei na nona dauvosota vakadede? Io, o iko o sa kila vakavinaka ni sa yalovinaka na Kalou, ka sa nona i naki me tuberi iko mo yaco rawa kina mo veivutuni. 5Ia sa kaukauwa ga ka rui dredre na yalomu, ka o sa binia tikoga kina na nomu i totogi me bibi cake sara ena Siga sa na vakaraitaki mai kina na cudru kei na lewa dodonu ni Kalou. 6Ni na sauma na Kalou vua na tamata yadua na i sau ni nona i valavala.#Same 62.12; Vbale 24.12 7Eso na tamata era sa ia tikoga na i valavala vinaka, ka vakasaqara na lagilagi, na dokai kei na bula tawamudu. Ia ena solia dina vei ira na Kalou na bula tawamudu. 8Eso era sa nanumi ira ga vakataki ira ka cata na ka e dodonu, me rawa ni ra cakava kina na ka ca. Ia ena sovaraka vei ira na nona cudru waqawaqa na Kalou. 9Ena yaco na veika rarawa kei na yaluma vei ira na tamata i valavala ca kecega, ena liu vei ira na Jiu, ka na qai vakakina vei ira na kai veimatanitu tani. 10Ia na Kalou ena qai solia na veivakalagilagi, na dokai kei na nona vakacegu vei ira kece era sa cakava na ka dodonu, ka na liu vei ira na Jiu, ka qai vaka talega kina vei ira na kai matanitu tani. 11Ni sega ni dau vakaduiduitaka na tamata na Kalou.#Vrua 10.17
12O ira era i valavala ca ena taudaku ni Lawa i Mosese era na rusa ena taudaku ni Lawa. Ia o ira era sai valavala ca ena ruku ni Lawa era na lewai ena loma ni Lawa. 13Ni ra na sega ni vakadonui ena mata ni Kalou o ira kecega era sa rogoca na Lawa, era na vakadonui ga o ira era muria na Lawa. 14E sega ni a soli vei ira na kai matanitu tani na Lawa i Mosese, ia ena gauna kecega era cakava kina vakai ira e dua na ka me vaka na veika sa tu ena Lawa era sa yaco ena gauna o ya me ra Lawa vei ira vakataki ira, e dina ga ni sega vei ira na Lawa i Mosese. 15Na veika era cakava e vakaraitaka ni sa volai tu e lomadra na ka e vakaroti ena Lawa. Sa tukuna talega na nodra lewa e loma ni dina na ka oqo, ka ni so na gauna sa dau beitaki ira ka so na gauna e dau taqomaki ira. 16Ia ena siga o ya, me vaka na i Tukutuku Vinaka au vunautaka tiko ena veilewaitaka na veika vuni kecega ka tu ena vakasama ni tamata ko Jisu Karisito ena vuku ni Kalou.
O Ira na Jiu kei na Lawa
17Ia me da tauri iko mada me kena i vakaraitaki. O sa vakatokai mo Jiu; o sa dau vakararavi tu ena Lawa, ka o sa dau dokadokataka na nomu Kalou; 18o sa kila tiko na ka e vinakata na Kalou mo cakava; ka o sa vulica rawa mai na Lawa mo digia na ka e dodonu mai na ka e cala, 19sa vakadinata ni sai iko na dauveituberi vei ira era mataboko ka vu ni rarama vei ira era tiko ena butobuto; 20o sa dauveivakadodonutaki vei ira na lialia, ka qasenivuli vei ira na yalowai ena veika vakayalo. O sa vakadinadinataka ni sa tu na ka dina taucoko sara kei na veika me kilai ena Lawa i Mosese. 21O sa dau vakavulici ira na tani, a cava o sega mada ga ni vakavulici iko kina? O sa dau vunautaka me kua na butako, ia o sega li ni dau butako o iko? 22O sa kaya me kua na veibutakoci, ia o sega li ni ia na veibutakoci o iko? E dau ka vakasisila vei iko na kalou matakau eso, ia o sega li ni dau butako mai na burekalou o iko? 23O sa boletaka ni tu vei iko na Lawa ni Kalou, ia o sega li ni dau vakamadualaka na Kalou ena nomu basuka na nona lawa? 24Ni sa kaya na i Vola Tabu, “Ena vukumuni na Jiu, era sa vosa vakacacataka kina na Kalou o ira na kai matanitu tani.”#Aisea 52.5 (LXX)
25Kevaka o sa muria na i vunau i Mosese, sa na yaga na nomu cilivi; ia kevaka o sega ni muria na Lawa, e vinaka cake ga mo a kua ni cilivi. 26Ia kevaka sa muria na Lawa e dua na kai matanitu tani, ka se sega tu ni cilivi, ena sega li ni na okati koya na Kalou me vaka e dua sa cilivi? 27Ena ka oqo, era na vakacalai kemuni kina na Jiu o ira na kai matanitu tani baleta ni o ni sa dau voroka na Lawa, ka veitalia ga na kena sa volai tu kei na nomuni sa cilivi oti; ia era sa muria na Lawa o ira, ka dina ga ni ra tamata tawa cili. 28Ni sa sega ni Jiu dina sara o koya sa Jiu ga ena tamata e sau, ka sa sega talega ni cilivi dina na ka sa caka ena yago e sau. 29Ia na Jiu dina sara sai koya ka sa Jiu ena tamata e loma, ka kena i balebale o ya ni sa cilivi na yalona, ka sa yaco rawa oqo ena cakacaka ni Yalo ni Kalou, ka segai ena vuku ni Lawa sa volai. Na tamata oqo sa sega ni dokai mai vei ira na tamata, ia sa dokai ga mai vua na Kalou.#Vrua 30.6
Currently Selected:
ROMA 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.