AKEAI 2
2
Na Totoka ni Valenisoro Vou
1Ena i ka 21 ni siga ni i kavitu ni vula ena yabaki vata ga o ya, a sa vosa tale kina ko Jiova vei Akeai na parofita. 2A sa kaya vei Akeai me vosa mada vei Serupepeli na kovana e Juta, kei Josua na Bete Levu, ka vakakina vei ira na vo-ni-bula vei ira na lewenivanua, ka tukuna vei ira,
3 #
Esera 3.12
“E tiko beka e dua vei kemuni oqo e se nanuma vinaka tiko na lagilagi ni Valenisoro oqo eliu? Sa qai vaka tu beka evei na kena i rairai vei kemuni ena gauna oqo? E kena i rairai ni sa vaka me sega sara tu ga ni dua na ka. 4Ia oqo, ni kakua sara ni yalodatuvu, oi kemuni vakayadua kece sara. Ni qarava ga na kena cakacaka, ka ni'u sa tiko vata kei kemuni. 5#Lako 29.45,46Ena gauna o ni a biuti Ijipita mai kina, au a yalataka ni'u na dau tiko vata ga kei kemuni. Au se tiko ga oqo kei kemuni, o koya mo ni kakua sara kina ni rere.
6 #
Ipe 12.26
Ena sega ni dede au sa na vakayavalata na lomalagi kei na vuravura, na vanua mamaca kei na wasawasa. 7Au na vakatoboicutaka na veimatanitu kecega, ena qai kau mai ki ke na nodra i yau talei, ka me mai tawa na Valenisoro ena i yau. 8Sa noqu na siliva kei na koula kecega ni vuravura. 9Na Valenisoro vou ena totoka cake sara mai na ka makawa, e kea au na qai solia kina na tiko vinaka kei na sautu vei ira na noqu tamata.” Oqori na vosa i Jiova na Kalou cecere.
Sa Vakasalataki Ira na Matabete na Parofita
10Ena i 24 ni siga ni i kaciwa ni vula ena i karua ni yabaki ni veiliutaki vakatui i Taraiasi, a sa vosa tale kina ko Jiova ni lewevuqa vei Akeai na parofita. 11A sa kaya, “Mo tarogi ira mada na matabete na nodra vakataulewa me baleta na taro oqo:
12Ni kaya mada ni dua na tamata sa taura e dua na tiki ni lewe ni manumanu vakatabui mai na i cabocabonisoro, ka sa ologa ena dua na yasa ni nona kote me kauta yani. Ni kevaka e mani tara na nona kote e dua na madrai, se kakana buta, se waini, se waiwai, se dua tale na mataqali kakana — ena yaco tale beka ga ki na kakana oqori me sa vakatabui talega?
Ni sa tarogi na taro oqo, era sa qai sauma na bete ka ra sa kaya, “E segai.”
13 #
Tiko 19.11-22
A qai taro o Akeai ka kaya, “Ni kaya mada ni sa vakadukadukalitaki e dua baleta ni sa tara o koya na yago ni mate. Ia kevaka sa qai tara tale o koya e dua vei ira na kakana oqori, e sa na yaco tale beka ga me dukadukali na kakana o ya?”
Era sa qai sauma na bete, ka ra sa kaya, “Io.”
14A sa qai kaya o Akeai, “Sa kaya vakaoqo ko Jiova ni ka vata ga oqo sa yaco tiko vei ira na lewenivanua ni matanitu oqo kei na veika kecega era rawata mai; ni sa dukadukali na veika kecega era sa mai vakacabora ena i cabocabonisoro.”
Sa Yalataka ko Jiova na Nona Veivakalougatataki
15Sa kaya ko Jiova, “O ni bau kidava li na veika sa yacovi kemuni tiko oqo? Ni bera na nomuni tekivu tara vou tale na Valenisoro, 16o ni a dau lako ki na i binibini sila ka namaka voli yani mo ni rawata kina e 200 na kilokaramu, ia o ni yacova ga na 100. O ni sa dau lako mo ni takiva mai e 100 na lita na waini mai kena taqe, ia sa rawati wale ga e 40. 17Au a tala mai na cagi katakata kei na uca cevata me vakarusa na ka kecega o ni sa tea, ia o ni a sega ga ni bau veivutuni. 18Na siga edaidai sai koya na i ka 24 ni siga ni i kaciwa ni vula, na siga sa qai vakotori oti kina na yavu ni Valenisoro. Ni qai vakarau sarava oqo na veika ena yaco edaidai ka lako yani. 19E dina ga ni sa sega na sila e vo tu, ka ra se bera ni vua na veivaini, na veilolo, na pomekaraneti, kei na veiolive — ia mai na gauna oqo ka lako yani, au na vakalougatataki kemuni.”
Na Yalayala i Jiova vei Serupepeli
20Ena siga vata ga o ya, ena i ka 24 ni siga ni i kaciwa ni vula, a sa kaya tale kina vei Akeai ko Jiova na i karua ni tukutuku 21me tukuni vei Serupepeli na kovana e Juta: “Au sa vakarau tiko me'u vakayavalata na lomalagi kei na vuravura 22ka vakatoboicutaka na veimatanitu ka muduka vakadua na nodra kaukauwa. Au na vukici ira sobu na qiqinivalu kei ira na kedra i vakatawa; era na mate na ose ka ra na veivakamatei vakai ira o ira na dauvodo ose. 23Ena siga o ya, au na qai kauti iko, o iko Serupepeli na noqu dauveiqaravi, ka lesi iko mo veiliutaki ena vukuqu. Sa i iko ka'u sa digitaka.” Sa vosa vakaoqo ko Jiova ni lewevuqa.
Currently Selected:
AKEAI 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.