1 SAMUELA 3
3
Rairai vei Samuela ko Jiova
1Ena gauna o ya, ena nona qaravi Jiova tiko na cauravou lailai o Samuela ena veituberi nei Ilai, sa vakavudua sara na kena voqa mai na vosa i Jiova ka sa sega ni levu na raivotu. 2Ena dua na bogi, a davo koto ena nona loga o Ilai, ni sa buwawa sara mai na matana. 3A sa davo koto ena Vale i Jiova o Samuela, oqori ena tikina e koto kina na Kato ni Veiyalayalati. Ni voleka ni kida cake na mataka ni se bera ni boko na cina, 4a sa kacivi Samuela ko Jiova, ka kaya, “I Samuela! I Samuela!” A sa kaya o koya, “Sai au oqo!” 5Sa cici yani vei Ilai, ka kaya, “Sai au oqo, o ni a kacivi au.”
Sa kaya vua o Ilai, “Au a sega ni kacivi iko, mo la'ki davo tale.” A mani lesu tale o Samuela me la'ki davo.
6A kaci tale ko Jiova, ka kaya, “I Samuela!” A tucake o Samuela ka lako vei Ilai, ka kaya, “Sai au oqo, o ni a kacivi au?”
A sauma o Ilai ka kaya, “Au a sega ni kacivi iko na luvequ; mo la'ki davo tale.” 7Ia a sega mada ni se kilai Jiova o Samuela, ka sega talega ni se vakatakilai vua na vosa i Jiova.
8A kacivi Samuela tale ena i katolu ni gauna ko Jiova. A tucake o koya, ka lako vei Ilai, ka kaya, “O ni kacivi au, sa i au oqo.” A qai kila e kea o Ilai ni sai Jiova dina ga ka a kacivi Samuela tiko. 9A sa kaya vei Samuela o Ilai, “Mo la'ki davo ga; ia kevaka e mani kacivi iko tale o koya, mo kaya vakaoqo, “Mo ni vosa mai, Jiova, ni'u sa vakarorogo na nomuni tamata!” Sa qai lako o Samuela ka davo ena nona i davodavo.
10A sa lako mai ko Jiova, ka tucake tu, ka kaci vaka e liu, “I Samuela! I Samuela!”
A sauma o Samuela, “Mo ni vosa mai, ni'u sa vakarorogo na nomuni tamata.”
11A qai tukuna ko Jiova vei Samuela, “Raica, au na cakava e dua na ka levu ka vakadomobula e Isireli ena kidroa kina na tamata kecega era rogoca. 12Ena siga o ya, au na vakayacora vei Ilai na veika kecega au a sa tukuna oti ena vukudra na nona lewe ni vuvale, mai na kena i tekivu ki na kena i tinitini. 13Ni'u sa tukuna oti vua ni'u na totogitaki ira na nona lewe ni vuvale ka tawa mudu ena vuku ni valavala ca sa kila o koya, me baleta na nodrau vosacataka na Kalou o rau na luvena tagane ruarua, ka qai sega sara ni tarovi rau o koya. 14Ia oqo, au sa bubului kina ena vukudra na lewe ni vuvale i Ilai ni na sega tale ni qai buluti na i valavala ca oqo mai na vakacaboisoro se madrali.”
15A davo koto o Samuela me yacova na mataka; a sa qai duri cake ka dolava na i sogo ni vale i Jiova. A sa rere ni vakatakila na nona raivotu vei Ilai. 16A kacivi Samuela o Ilai, ka kaya, “I Samuela na luvequ!”
A sauma mai o Samuela, “Oi au saka oqo.”
17A sa kaya vua o Ilai, “A cava sa tukuna vei iko ko Jiova? Mo kakua ni vunia vei au e dua na ka. Ena cudruvi iko na Kalou kevaka o sega ni tukuna kece vei au na vosa e cavuta vei iko.” 18Sa qai tukuna na veika kece o Samuela ka sega ni vunia e dua na ka. A sa kaya o Ilai, “Sa i koya ga ko Jiova; ena vakayacora ga o koya na ka e vinaka ki vua.”
19Ni sa tubu cake voli o Samuela, a sa tiko ga kei koya ko Jiova ka vakavuna me yaco dina sara na veivosa kece e tukuna o Samuela. 20Era sa qai kila kecega na Isireli ka me vakatekivu mai dua na yasa ni vanua ki na dua tale ni sa parofita vakaidina i Jiova o Samuela. 21A sa vakatakilai koya tikoga ko Jiova mai Sailo, o ya mai na vanua ka a rairai kina vei Samuela ka vosa talega kina vua. Ia ni sa vosa o Samuela, era sa vakarorogo kecega o ira na Isireli.
Currently Selected:
1 SAMUELA 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.