Taniela 1
1
Rawai Jerusalemi O Nepukanesa
1 #
2Tui 24.1; 2Vei 36.5-7 Ena i katolu ni yabaki ni tui Juta tiko o Jo-akimi, a lako sobu ki Jerusalemi o Nepukanesa na tui Papiloni, ka sa buku na druadrua ni koro. 2#2Tui 20.17,18; 24.10-16; 2Vei 36.10; Aisea 39.7,8A sa vakatara na Turaga vei Nepukanesa na tui me vesuki Jo-akimi na tui Juta ka me kauta talega vakaitoki ni valu eso na i yaya tabu ni valenisoro. A sa kauti ira lesu talega eso na kaivesu ki na burekalou ni nona kalou eso, ka biuta na i yaya tabu ni valenisoro sa tauri vakavesu mai ki valeniyau ni nona kalou eso.
Digitaki Eso Na Cauravou ni Jiu
3Sa qai vakarota na tui vei Asipinasi na vakailesilesi liu ni valenitui me digitaka mai eso na bobula mai Isireli era kawa ni tui se ra kawa turaga. 4O ira oqo me ra cauravou rairai vinaka, bulicaki vinaka, yalomatua, i tovo vinaka ka totolo ena vuli, ka me rawa ni ra rawata na cakacaka ni tiko vakavuli me ra na dauvakasala vua na tui. Ia me i tavi sara ga nei Asipinasi me vakatavulici ira ena vosa, na wili i vola kei na volavola vaka-Papiloni. 5A vakarota talega na tui me dau soli vei ira na kakana kei na waini vata sara ga era dau vakayagataka ena veisiga o ira na cakacaka ena valenitui. Ni sa cava na yabaki tolu ni nodra tiko vakavuli, era sa na qai nona vakailesilesi na tui. 6Vei ira na digitaki e ratou sa vakabau kina e lewe va na cauravou ni Jutia, o ya o Taniela, o Ananaia, o Misaeli kei Asaraia. 7A qai vakayacani iratou vou tale na cauravou oqo o Asipinasi ena yaca vaka-Papiloni. O Taniela me yacana o Pelitisasari, o Ananaia me o Setareki, o Misaeli me o Mesake, kei Asaraia me yacana o Apeteniko.
Bese ni Kania na Kakana mai Valelevu
8Ia o Taniela sa bulia oti e lomana me kakua ni vakadukadukalitaki koya ena kakana kei na waini mai na valenitui. Sa mani kerei Asipinasi na vakailesilesi liu me vukei koya. 9Ena kaukauwa ni Kalou, sa kauwaitaki Taniela kina o Asipinasi ka via vukei koya; 10ia a mani kaya ga vua, “Au sa rerevaka na turaga na tui. A vakarota oti o koya na ka mo ni kania ka gunuva, ia ke o sega ni rairai bulabula me tautauvata kei ira na vo ni cauravou, sa na rawa ni vakarota me'u vakamatei!”
11Sa qai la'ki kerekere tale o Taniela vua na i vakatawa a lesia o Asipinasi me dau vakatawai koya kei iratou na kai nona e lewe tolu, 12A kaya vua, “Tovolea mada mo vakani keitou ga ena kakana draudrau kei na wai me tini na siga. 13Ni oti oqori mo qai vakatautauvatani keitou kei ira na cauravou era kania tiko na kakana mai Valelevu ka me qai tau na nomu lewa ena duidui ni keimami i rairai.”
14A mani vakadonuya o koya na yadra me caka na vakatovotovo oqo me siga tini na kena dede. 15Ni oti na gauna oqori, e ratou a bulabula cake ka kaukauwa o iratou oqo mai vei ira era a kania tiko na kakana mai Valelevu. 16A qai vakasuka na kedratou kakana kei na medratou waini o koya na i vakatawa, ka solia ga vei iratou na kakana draudrau.
Kau Na Cauravou Vua na Tui
17Sa qai solia na vuku kei na kila ka kece vaka-Papiloni na Kalou vei iratou na cauravou e lewe va oqo, ka sa solia talega vei Taniela me dau vakamacalataka na i balebale ni tadra kei na raivotu kecega. 18Ni cava na nodra vuli yabaki tolu na cauravou ka vakarota o Nepukanesa me caka, a qai kauti ira yani vua o Asipinasi. 19A veivosaki na tui kei ira kecega na cauravou, ka kunea ni ratou vinaka cake o Taniela, Ananaia, o Misaeli kei Asaraia mai vei ira kecega na kena vo. E ratou a mani curu me ratou dauvakasala vua na tui. 20Ia a veitalia ga se taro cava a taroga na tui, se ka dredre cava a vakavotuya mai me veivosakitaki, a kunea o koya ni ratou vinaka cake vakatini na lewe va oqo mai vei ira kecega na daukilakila kei ira na daucaka mana ena nona matanitu taucoko. 21Sa mani tiko ga o Taniela ena valenitui ka yacova na i tekivu ni gauna e tui kina e Papiloni o Tui Sairusi.
Currently Selected:
Taniela 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.