Taniela 2
2
Tadra i Nepukanesa
1Ena i karua ni yabaki ni tui i Nepukanesa, a tadra kina o koya e dua na tadra. A vakaleqa vakalevu sara na lomana na tadra o ya ka sega kina ni mani moce rawa. 2A qai talatala me ra la'ki lako mai vua o ira na nona daukilakila, na daucaka mana, na daucaka i sausau kei ira na tamata vuku me ra mai vakamacalataka vua na nona tadra. Ia ni ra sa tadu yani, 3a qai kaya vei ira o koya, “Au a tadra e dua na tadra ka sa leqa tiko kina vakalevu na lomaqu. Au via kila se cava au a tadra o ya.”
4Era a qai sauma na vosa ni tui ena vosa vaka-Arameka,#2.4 Me tekivu eke ka yaco ki na wase 7, sa volai ga ena vosa vaka-Arameka, ka sega ena vosa vaka-Iperiu. ka ra kaya, “Mo ni bula na tui, ka sega ni mudu! Ni tukuna saka mai na nomuni tadra, ka keimami na qai vakamacalataka vei kemuni na kena i balebale.” 5A qai kaya vei ira na tamata vuku na tui, “Na noqu lewa sa vakaoqo: Kevaka o ni sega ni tukuna rawa vei au na noqu tadra kei na kena i balebale, o ni na basuraki bulabula ka na caka me benubenu na nomuni veivale. 6Ia kevaka e rawa ni o ni tukuna vei au na noqu tadra kei na kena i balebale, au na soli ka ni loloma, na i cocovi kei na ka ni veidokai vei kemuni. Ni kusa ka tukuna mai na tadra kei na kena i balebale.”
7Era a qai sauma tale na tamata vuku na vosa ni tui, ka kaya, “Mo ni tukuna mai vei keimami se cava o ni a tadra, keimami na qai vakaibalebaletaka vei kemuni.”
8E kea, sa qai kaya na tui, “Au sa kila oti ni na mai vakaoqo! O kemuni o ni via tovolea ga mo ni yaraka na gauna baleta ni o ni kila sa koto oti na i otioti ni noqu lewa. 9Kevaka o ni sega ni tukuna vei au na tadra, sa na duabau ga na i totogi ena tau vei kemuni taucoko. O kemuni, o ni sa vakadonuya vata kece mai mo ni mai vosa lasu vei au, de lakolako me na veisau kina na noqu lewa. Sa kena gauna oqo mo ni tukuna mai vei au na ka au a tadra, me'u kila kina ni na rawa vei kemuni mo ni vakaibalebaletaka vei au.”
10Era a qai sauma na tamata vuku na vosa ni tui ka ra kaya, “Sa sega saka ni dua ena dela i vuravura oqo me tukuna rawa vei kemuni na ka o ni via kila. E sega na tui — e sega sara mada ga ni o koya ka rogo levu ka qaqa duadua vei ira, e sa bau cikeva oti e dua na ka vakaoqo mai vei ira na nona daukilakila, na daucaka mana kei ira na vuku. 11Na ka o ni vinakata tiko na tui sa rui dredre ka na sega ni dua e rawata, qai vakavo ga o ira na kalou; ia o ira oqo era sega ni tamata me ra tiko kei keda” 12A qai waqa me vaka na buka na cudru ni tui ena vosa o ya, ka lavaka sara me ra vakamatei taucoko na tamata vuku kecega e Papiloni. 13A qai buli e dua na lawa vakaturi me tara kina na nodra vakamatei na tamata vuku, ka ratou wili talega kina o Taniela kei iratou na wekana lewe tolu.
Vukei Taniela na Kalou
14A sa lako o Taniela ka vosa vakavuku ka yalomatua vei Erioki, na nodra turaga ni valu liu na sotia dauyadrava na tui o koya a sa vakaroti oti tu me vakayacora na veivakamatei. 15A tarogi Erioki o koya ka vaka, “A cava beka na vuna a vakarota kina na tui na lewa kaukauwa vaka oqo?” Sa qai tukuna vei Taniela o koya na veika kece sara a sa yaco oti. 16A mani qai lako o Taniela vua na tui ka kerea me sa tu mada vakawawa na nona lewa me solia vua na gauna me vakamacalataka kina vua na tui na i balebale ni nona tadra. 17Oti a qai lako ki na nona vale o Taniela ka la'ki tukuna vei iratou na nona i tokani, o ya o Ananaia, o Misaeli kei Asaraia na veika sa yaco oti. 18A qai vakaroti iratou matua o koya me ratou masu ka kerea na Kalou ni lomalagi me yalo loloma ka vakatakila vei iratou na ka vuni oqo me ratou kakua kina ni vakamatei kei ira na dauvakasala ni tui ena vanua o Papiloni. 19Ia ena bogi tikoga ni siga o ya, a vakaraitaki kina vei Taniela na ka vuni oqo ena dua na raivotu. A qai vakavinavinaka vua na Kalou ni lomalagi o Taniela, ka vaka:
20Sa vuku ka kaukauwa na Kalou;
Me vakavinavinakataki na yacana ka sega ni mudu.
21Sa lewa o koya na veigauna kei na dui draki;
Sa buli ira na tui ka vakasivoi ira.
Sa vu ni vuku kei na kila ka vei ira na tamata o koya.
22Sa vakaraitaka na veika sa titobu ka vuni tu,
Ka sa kila na ka sa vunitaki tu ena butobuto;
Sa vakavolivoliti koya na rarama.
23Kemuni saka na nodra Kalou na noqu qase, au sa vakavinavinaka ka vakarokoroko vei kemuni.
O ni sa solia vei au na vuku kei na kaukauwa;
O ni sa sauma mai na noqu masu
Ka vakaraitaka vei keitou na ka me keitou la'ki tukuna vua na tui.”
Tukuna o Taniela na i Balebale ni Tadra
24A qai lako o Taniela ka la'ki vosa vei Erioki, na turaga ni valu a lesia na tui me liutaka na veivakamatei, ka kaya vua, “Mo kakua mada ni vakamatei ira. Ia mo kauti au mada vua na tui me'u la'ki tukuna vua na i balebale ni nona tadra.” 25A qai kauti Taniela yani vakatotolo o Erioki vua na tui, ka la'ki kaya vua, “Au sa kunea ni sa dua vei ira na kai Jutia vesu e rawa ni vakamacalataka vei kemuni na tui na i balebale ni nomuni tadra.”
26A tarogi Taniela, a yacana talega o Pelitisasari, na tui, ka vaka, “E rawa li ni o tukuna na ka au a tadra kei na kena i balebale?” 27Sa qai sauma o Taniela, ka kaya, “Kemuni na tui, sa sega sara ni dua na vuku, na daucaka mana, na daukilakila, se o ira na dau tukuna na kalougata, e rawa ni tukuna vei kemuni na tadra oqori. 28Ia e dua ga na Kalou e tiko mai lomalagi sa dau vakatakila na veika sa vuni tu. Na Kalou ga oqo a vakaraitaka vei kemuni, Nepukanesa na tui, na ka ena yaco ena gauna mai muri. Ia na tadra se raivotu o ni a raica ni o ni a moce koto sa vakaoqo:
29Ni o ni a moce koto, o ni a tadra na gauna mai muri. Ia na Kalou, sa vakatakila na veika vuni, sa vakaraitaka vei kemuni na ka ena yaco mai muri. 30Na ka vuni oqo a vakatakila vei au o koya e sega ni baleta ni'u vuku cake mai vua e dua tale na tamata, ia me rawa ga kina ni vakaraitaki vei kemuni na tui na i balebale ni nomuni tadra, ka mo ni kila talega kina na nanuma ni lomamuni.
31Ena nomuni raivotu na tui, o ni a raica ni tu e matamuni e dua na matakau levu, e serau, tatalivaliva ka rerevaki na kena i rairai. 32Na ulu ni matakau o ya a buli ena koula dina. Na serena kei na ligana sa caka ena siliva, ia na tolona kei na sagana sa caka ena parasa. 33Na nona temo sa caka ena kaukamea ka sa buli na yavana ena kaukamea sa veiwaki kei na qele ni tuli kuro. 34Ia ni o ni a vakaraica tu na matakau o ya, a qai tatiki ga mai vakaikoya e dua na vatu levu ka lauta na matakau ka vorolaka vakamatailalai na yavana ka veiwaki tu ena kaukamea kei na qele. 35A mani vurumemea kina vakadua na kaukamea, na qele ni tuli kuro, na parasa, na siliva kei na koula ka yaco me tautauvata kei na qa ni raisi ena kena i qaqi ena vula i katakata. Era a dui cagina ka yali vakadua yani. A qai tubu na vatu a vorolaka na matakau me dua na ulunivanua ka robota na vuravura taucoko.
36Sa i koya saka o ya na tadra. Ia, au sa na tukuna oqo vei kemuni na tui na kena i balebale. 37O kemuni na tui, o ni rogo ka qaqa duadua vei kemuni kecega na tui. Sa buli kemuni o koya na Kalou ni lomalagi mo ni tui ka solia vei kemuni na kaukauwa, na qaqa kei na dokai. 38Sa buli kemuni mo ni tui e vuravura taucoko, mo ni nodra tui talega na manumanu yava i va kei na manumanu vuka kecega. Na ulu koula ni matakau o ya, sai kemuni na tui. 39Ena qai taravi kemuni e dua tale na matanitu, ia ena sega soti ni rogo ka qaqa me tautauvata kei na nomuni matanitu, ka na qai kena i katolu mai e dua na matanitu, ka caka ena parasa, me na lewa na vuravura taucoko. 40Ena qai tubu mai e muri sara na i kava ni matanitu ka na kaukauwa me vaka na kaukamea. Ia me vaka ni rawa ni vorolaka ka qaqiraka na kaukamea na veika kecega, sa na vorolaka ka vakarusa talega vaka kina na veimatanitu e liu na matanitu oqo. 41O ni a raica ni a veiwaki na kaukamea kei na qele ni tuli kuro ena yava kei na i qaqalo ni matakau. A kena i balebale ni na veisei na matanitu oqo. Sa na so na tikina e vaka na kaukauwa ni kaukamea baleta ni rau sa veiwaki na kaukamea kei na qele ni tuli kuro. 42Ia na i qaqalo talega ni matakau era buli mai na kaukamea sa veiwaki kei na qele. A kena i balebale ni na kaukauwa na matanitu oqo, ia ena kavoro ga vakarawarawa. 43O ni a raica ni rau veiwaki na kaukamea kei na qele. O ira na tui ni matanitu oqo era na tovolea me ra tiko veilomani ena nodra veiwatini veicurumaki vakai ira, ia era na sega ga ni rawata, me vaka ga ni rau sega ni cokovata rawa na kaukamea kei na qele. 44Ena gauna ni nodra veiliutaki na veitui oqori, sa na tauyavutaka kina na Kalou ni lomalagi e dua na matanitu ena sega ni oti rawa. Na matanitu oqo ena sega ni rawai rawa ka na vaqeyavutaki iratou vakadua yani na veimatanitu e liu ka me qai bula tu o koya ka sega ni mudu. 45O ni a raica na kena tatiki tani vakaikoya ga na vatu o ya ka vorolaka na matakau a buli ena kaukamea, na parasa, na qele, na siliva kei na koula. Sa tukuna tiko vei kemuni na tui o koya na Kalou na veika ena yaco ena gauna mai muri. Na veika kece sara ga o ni a tadra, au sa qai tukuna oti oqo vei kemuni; ka'u sa vakaraitaka talega vei kemuni na kena i balebale dina.”
Loloma vei Taniela na Tui
46Sa cuva sobu ki na qele o Nepukanesa na tui ka vakarokoroko vei Taniela; ka vakarota me vakacabori vua na i madrali kei na ka boi vinaka. 47A qai kaya na tui vei Taniela, “Sa uasivi ka kaukauwa duadua na nomu Kalou vei ira na kalou tale eso, na nodra Turaga na tui kecega, o koya sa dau vakatakila na veika vuni.” 48A qai solia vei Taniela na tui e dua na i tutu cecere, ka solia talega vua e vuqa na i loloma uasivi. A vakatikori koya me lewa na yasana o Papiloni ka lesi koya talega me liutaki ira na dauvakasala e Papiloni taucoko. 49Ena kerekere i Taniela, sa qai lesi iratou o Setareki, o Mesake kei Apeteniko na tui me ratou liutaka na cakacaka vakamatanitu ena yasana o Papiloni ka me tiko ga o Taniela ena valenitui.
Currently Selected:
Taniela 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.