Kolosa 1
1
1Mai vei Paula, e dua na i apositolo i Karisito Jisu ena lewa ni Kalou, kei Timoci talega na tacida.
2Vei ira na tamata ni Kalou mai Kolosa, o ira na veiwekani yalodina sa tu vata kei Karisito:
Me nomuni na loloma kei na vakacegu mai vua na Kalou o Tamada.
Na Masu ni Vakavinavinaka
3Keirau sa dau vakavinavinaka tikoga vua na Kalou na Tama i Karisito Jisu na noda Turaga, ka dau masulaki kemuni ena veisiga. 4Keirau sa mai rogoca na nomuni vakabauti Karisito Jisu, kei na nomuni dauloloma vei ira kecega na tamata ni Kalou, 5na vakabauta kei na loloma sa vu mai na ka o ni sa nuitaka ka sa maroroi tiko mai lomalagi me nomuni. O ni a sa rogoca na ka sa nuitaki tiko oqo mai na i tukutuku dina, na kosipeli 6sa yaco yani vei kemuni. Sa tete tikoga yani ki vuravura taucoko na kosipeli oqo, ka sa tu na vuana, ka sa tubu tikoga, me vaka ga sa yaco tiko vei kemuni me tekivu mai na matai ni siga o ni rogoca kina na nona loloma-savu na Kalou, ka kila rawa sara na kena dina. 7#Kolo 4.12; Fmoni 23O ni a vakatavulici kina mai vei Epafura, na neirau i tokani lomani. Sa i talatala yalodina i Karisito o koya ena vukuda, 8ka sa mai tukuna vei keirau na nomuni loloma ena Yalo Tabu.
9Sa i koya oqo na vuna keirau sa sega ni cegu kina ena masulaki kemuni, me tekivu sara mai na siga keirau a rogoca kina na veika me baleti kemuni. Keirau sa kerea vua na Kalou me vakasinaiti kemuni ena kila-ka mo ni kila kina na lomana, ka vakakina na vuku vakayalo kei na yalomatua. 10O ni na qai cakava rawa kina na i valavala e kilikili kei na Turaga, ka na vinakata sara o koya, ka tu na vuamuni ena veicakacaka vinaka kecega, ka tubu cake tikoga na nomuni kila na Kalou. 11Mo ni vakaukauwataki ena kaukauwa kecega sa taka mai na nona kaukauwa lagilagi, mo ni colata rawa kina na veika kecega ena vosota kei na reki. 12Ni vakavinavinaka vua na Tamada, o koya sa vakarautaki kemuni me da wasei rawa ena nodra i votavota na yalosavasava ena matanitu ni rarama. 13Sa vakabulai keda o koya mai na vakatulewa ni butobuto ka kauti keda tani ki na nona matanitu na Luvena lomani, 14#Efe 1.7o koya eda sa sereki kina, ka sa bokoca na noda i valavala ca.
Na i Tutu kei na Cakacaka i Karisito
15Ni sai Karisito na i yaloyalo ni Kalou sa tawa raici, na ulumatua ni veika buli kecega. 16A sa buli na veika kecega ena vukuna: na veika eso mai lomalagi kei vuravura, na kena era sa raici rawa se tawa raici, se ra i tikotiko vakatui se ra veimatanitu, se ra turaga vakaliuci se ra turaga kaukauwa. A sa bulia na Kalou na veika kecega ena vukuna, ka me nona talega. 17A sa bula na Karisito ni bera na veika kecega, ka sa vakataudeitaki na ka kecega ni sa semati ki vua. 18#Efe 1.22,23Ni sa ulu ni yago, na i soqosoqo lotu, na Karisito; sai koya na i vakatekivu, na nodra ulumatua o ira sa vakaturi cake tale mai na mate, me cecere duadua kina o koya ena ka kecega. 19Ni sa vinakata na Kalou me vakasinaiti na Luvena ena i tovo kecega ni Kalou, 20#Efe 2.16ka me vakaveivinakatitaki ira na veika kecega ena vukuna, na veika e vuravura se mai lomalagi, ka sa ia na veivinakati oqo ena vuku ni nona dra sa tiri mai na kauveilatai.
21Ena dua na gauna o ni a yawa tani sara mai vua na Kalou ka veimecaki kei koya baleta na nomuni dau kitaka ka vakanananutaka na veika ca. 22Ia oqo, sa vakaveivinakatitaki kemuni o koya ena vuku ni yago i Karisito sa mate, ka me vakatakila kina ni o ni sa yalosavasava ka sega ni beitaki rawa ka sega ni vunauci rawa e matana. 23Sa dodonu kina mo ni vakataudeitaka sara me kaukauwa vinaka na nomuni vakabauta, ka me tomani tikoga oqo, ka me kakua ni yavalati ka toso tani mai na i nuinui sa yalataki ena kosipeli. Sa i koya oqo na kosipeli o ni sa rogoca ka sa vunautaki vei ira na tamata kecega ena ruku i lomalagi, ka'u sa kena i talatala oi au, o Paula.
Na Veiqaravi nei Paula ena i Soqosoqo Lewenilotu
24Au sa marau ni'u sa vakararawataki ena vukumuni. Mai na veika mosimosi e sotava na yagoqu, sa rawa kina vei au me'u tomana tikoga kina na nona vakararawataki na Karisito ena vuku ni yagona, na i soqosoqo lotu. 25Ni ka'u sa lesi me'u dauveiqaravi ni soqosoqo lotu mai vua na Kalou, o koya sa solia vei au na i tavi oqo me'u vakayacora me baleti kemuni. Oqo na i tavi ni kena vunautaki me kilai vakavinaka sara na vosa ni Kalou, 26na ka vuni ka se vunitaki tu mai vakabalavu vei ira na veitabatamata e liu, ia sa qai vakaraitaki mai oqo vei ira na tamata ni Kalou. 27Ni sai naki ga ni Kalou me vakatakila vei ira na veimatanitu na talei kei na lagilagi ni ka vuni oqo, o ya ni sa tiko na Karisito ena lomamuni, ka kena i balebale ni o ni na vota vata kei koya na lagilagi ni Kalou. 28O koya oqo keitou sa vunautaki Karisito kina, ka ia na veivakasalataki kei na veivakatavulici vei ira na tamata yadua ena vuku kecega, me rawa ni ra yalomatua ka vinaka sara ena vuku i Karisito. 29Ena kena rawati oqo, au sa cakacaka ga kina vakaukauwa ka sasaga vagumatua ena veivuke ni kaukauwa i Karisito sa cakacaka yaco tiko vei au.
Currently Selected:
Kolosa 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.