Roma Na i Vakamacala Taumada
Na i Vakamacala Taumada
Na i vola i Paula vei ira mai Roma sa volai me vakarautaka na sala me baleta e dua na veisiko sa nakita o Paula me cakava ki na i soqosoqo lotu mai Roma. A nakita me la'ki cakacaka mada vakalailai vei ira na tamata lotu Vakarisito mai kea ka me na rawa ni qai gole sara yani ki Sipeini ena nodra veivuke. E a volavola yani me vakamacalataka na ka e kila me baleta na vakabauta Vakarisito kei na kena vakayacori sara ena nodra bula na tamata lotu Vakarisito. Na i vola oqo sa koto kina na i vakamacala taucoko ni nona i tukutuku.
Ni sa oti na nona vakabula vei ira na tamata vakabauta mai Roma kei na nona tukuna vei ira na nona dau masulaki ira, sa qai tukuna o Paula na i ulutaga ni nona i vola: “Sa vakarautaki ena i Tukutuku Vinaka na sala sa rawa ni vakadonui keda kina na tamata na Kalou, o ya ni sa ia na veivakadonui na Kalou ena vuku ni vakabauta duadua ga.” (1.17)
Sa qai mai vakamacalataka o Paula na nona i ulutaga. Na veimata tamata kecega, o ira na Jiu kei ira na veimatanitu tani era sa gadreva me ra vakadonui mai vua na Kalou ena vuku ni vakabauti Jisu Karisito ni da sa tautauvata kecega na tamata ni da sa vesuki tu ena kaukauwa ni valavala ca. Eda sa vakadonui na tamata mai vua na Kalou ena vuku ni vakabauta. Tarava o ya sa qai vakamacalataka o Paula na bula vou ena tu vata kei Karisito ka sa rawa mai na veimaliwai vou kei na Kalou. Na tamata sa vakabauta sa veisaututaki kei na Kalou ka sa sereki koya na Yalo Tabu mai na kaukauwa ni valavala ca kei na mate. Ena wase e 5-8 sa vakamacalataka talega kina o Paula na i naki ni Lawa ni Kalou kei na kaukauwa ni Yalo ni Kalou ena nona bula na tamata vakabauta. Sa qai mai goleva yani na i apositolo na taro me baleta na noda veimatanitu tani me baleta na i naki ni Kalou ena vuku ni tamata kecega. A qai tinia ena nona kaya ni nodra cati Jisu na Jiu sa tiki ni naki ni Kalou me kauti ira mai kina na tamata kecega me ra veitaratara kei na loloma ni Kalou ena vuku i Jisu Karisito. E vakabauta talega o koya ni ra na sega ni cati Jisu tikoga na Jiu. E a qai tinia o Paula ena nona tukuna na i vakarau ni bula ena bula Vakarisito ka vakauasivi me baleta na loloma ena noda bula veimaliwai kei ira na tani. E a goleva na veiulutaga me vaka na cakacaka vua na Kalou, na i tavi ni tamata lotu ki na matanitu kei ira na tani kei na taro eso me baleta na lewa e loma. A tinia na nona i vola ena nona i tukutuku vakai koya kei na vosa ni vakacaucautaki vua na Kalou.
Na Lewe ni Vola
Na i vakamacala taumada kei na i ulutaga 1.1-17
Gadreva na tamata me vakabulai 1.18–3.20
Na sala ni nona veivakabulai na Kalou 3.21–4.25
Na bula vou ena vuku i Karisito 5.1–8.39
O Isireli ena loma ni naki ni Kalou 9.1–11.36
Na i tovo Vakarisito 12.1–15.13
Tinitini kei na Vakanuinui Vinaka 15.14–16.27
Currently Selected:
Roma Na i Vakamacala Taumada: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.