Vakatekivu 50
50
1A sa mokota na tamana o Iosefo, ka tagicaka, ka reguci koya. 2Sa qai vakaroti ira yani na nona vuniwai me ra vakarautaka na kena maroroi vakabalavu na yago i tamana. Era sa vakayacora vakakina na vuniwai ena yago i Jekope. 3A sa taura e 40 na siga na kena vakarautaki tiko na yagona. Era a vakalolokutaki koya voli na kai Ijipita me 70 na siga.
4Ni sa oti na gauna ni vakaloloku, a sa qai kaya o Iosefo vei ira na vakailesilesi ni tui, “Kevaka o ni lomani au, ni yalovinaka ni la'ki kaya vua na tui oqo: 5Ena gauna sa vakarau mate kina o tamaqu, a qai kaya me'u bubuluitaka vua ni'u na la'ki buluti koya ena i bulubulu sa kelia me kena i bulubulu ena vanua o Kenani. Au kerea me'u la'ki buluti tamaqu mai kea, au na qai lesu tale mai.”#Vteki 47.29-31
6Sa qai kaya na tui, “Lako ka la'ki buluti tamamu, me vaka o sa vosa ni bubului kina vua ni o na vakayacora.”
7Sa lako yani o Iosefo me buluti tamana, Era a lako vata kaya na vakailesilesi lelevu ni tui, kei ira na qase ena nona vale, vata kei ira na turaga ena vanua o Ijipita. 8Era sa lako talega na vuvale i Iosefo, kei ira na tuakana, vata kei na vuvale i tamana. Era sa qai vo ga ena vanua o Qoseni na gone, na nodra sipi, me, kei na bulumakau. 9Era sa lako talega na kareti, kei ira era vodo ose; ka sa dua na i lakolako vakaitamera.
10Ia ni ra sa yaco yani ki na vanua ni butu sila nei Atati, ena tokalau ni Joritani, era sa vakayacora kina e dua na somate balavu ka vakaciriloloma; ka tagicaki tamana kina o Iosefo me vitu na siga. 11Ena gauna era sa raica kina na kai Kenani na somate ena vanua ni butu sila nei Atati, era sa kaya, “Oqo e dua na vakaloloku ni mate bibi vei ira na kai Ijipita.” Oqo na vuna sa vakatokai kina na vanua o ya me o Epeli Misireimi.#50.11 Epeli Misireimi: Na yaca oqo e balebale vaka na “nodra vakaloloku na kai Ijipita” ena vosa vakaiperiu.
12Ia era sa vakayacora na luve i Jekope me vaka e sa vakarota vei ira; 13era sa colati koya ki Kenani ka buluti koya ena qara vatu mai Makipila, ena tokalau kei Mamire, na vanua e sa volia o Epara-ama mai vei Efironi na Itaiti me i bulubulu.#Caka 7.16 14Ia ni sa buluti tamana oti o Iosefo, sa lesu tale ki Ijipita vata kei ira na tuakana, kei ira kece sara era sa lako vata kaya ena veibulu.
Sa Vakadeitaki Ira na Tuakana o Iosefo
15Ni ratou sa raica na tuakai Iosefo ni sa mate o tamadratou, e ratou sa kaya, “Ena vakacava beka kevaka e sa cati kedatou tikoga o Iosefo, ka nakita me sauma lesu kece sara na veika ca e datou a cakava vua?” 16E ratou a mai vakauta yani e dua na i tukutuku vei Iosefo, ka vaka koto oqo, “Ni bera ni mate o tamamu, sa kaya vei keitou na ka oqo: 17Dou kaya vei Iosefo, ‘Au kerei iko mo vosota na nodratou cala, kei na nodratou ca na tuakamu, baleta ni ratou sa vakalolomataki iko.’ Ia oqo, mo yalo vinaka ka vosota na nodratou cala na tamata ni Kalou i tamamu.” Sa mai tekivu tagi yani o Iosefo ni ratou kaya na ka oqo vua.
18E ratou sa lako talega mai na tuakana ka cuva sobu vua ka kaya, “Keitou sa tu oqo e matamuni na nomuni tamata.”
19A sa qai kaya vei iratou o Iosefo, “Dou kakua ni rere, au na sega ni suguta na nona i tutu na Kalou! 20Dou sa nakita mo dou cakava vei au na ka ca, sa qai veisautaka na Kalou ki na vinaka me maroroi kina na nodra bula e vuqa na tamata, o koya era sa bula tu oqo ena vuku ni ka o ya. 21Ia oqo, dou kakua ni rere. Au na maroroi kemudou kei ira na luvemudou.” A sa vakataudeitaki iratou ka vakaceguya na yalodratou.
Na Mate nei Iosefo
22Ia sa tiko mai Ijipita o Iosefo vata kei na vuvale i tamana; a sa dua na drau ka tini na nona yabaki sa qai mate. 23A sa bula tiko ka raica na luve i Mekiri na luve i Manasa tagane era sa sucu ka okati ena vuvale i Iosefo. 24Sa qai kaya vei ira na tuakana, “Au sa vakarau mate, ia na Kalou ena talevi kemudou ka kauti kemudou tani mai na vanua oqo ki na vanua sa yalataka vei Epara-ama, Aisake kei Jekope.” 25A sa qai cakava o Iosefo me ratou bubului na luve i Isireli ka kaya, “Ena gauna sa na talevi kemudou tale mai kina na Kalou, dou qai kauta yani na suiqu mai na vanua oqo.”#Lako 13.19; Josua 24.32; Ipe 11.22 26A sa mate o Iosefo mai Ijipita ni sa yacova na 110 na nona yabaki ni bula. Era sa vakarautaka na yagona ena i valavala vaka-Ijipita me maroroi kina vakabalavu na yago ka biuta ena kato ni mate.
Currently Selected:
Vakatekivu 50: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.