Cakacaka 22

Na Vosa i Paula vei Ira na Jiu

1“Oi kemuni na wekaqu kei kemuni na qase, ni rogoca mada na veika dina au via tusanaka me baleti au.”

2Ia ni ra sa rogoca ni vosa vei ira o koya ena vosa vakaiperiu, era sa tiko lo sara.

Sa qai vosa o Paula ka kaya, 3“Oi au e dua na Jiu, au a sucu mai Tarisu mai Silisia, ia au a susugi ga ena koro oqo, ka'u a gonevuli nei Kamelieli me baleta na kena muri vakadodonu sara na nodra Lawa na noda qase. Au sa dau qarava vagumatua na Kalou me vakataki kemuni kecega o ni tiko eke edaidai.#Caka 5.34-39 4Au a dau vakacacani ira vakaukauwa sara na tamata era sa muria na Sala, ka ra la'ki mate sara kina eso. Au a vesuki ira na tagane kei na yalewa ka biuti ira ki valeniveivesu.#Caka 8.3; 26.9-11 5E rawa sara ga ni ra vakadinadinataka ni sa dina na noqu i tukutuku oqo o ira na Bete Levu kei ira kece na lewe ni Matabose. Ni'u a dau taura mai vei ira na nodra i vola vei ira na Jiu mai Tamasiko, ka'u sa dau lako sara me'u la'ki kauti ira mai vakavesu na tamata o ya ki Jerusalemi me ra mai totogitaki kina.”

Sa Tukuna o Paula na Nona Veisau

(Caka 9.1-19; 26.12-18)

6“Ia ni'u sa lako tiko ka'u sa voleka yani ki Tamasiko ena dua na sigalevu tutu, sa qai cila vakavolivoliti au vakasauri e dua na rarama levu mai lomalagi. 7Au sa qai bale sobu ki na qele ka'u a qai rogoca e dua na domo ni kaya mai vei au, ‘I Saula! I Saula! A cava o sa vakacacani au tiko kina?’ 8Au a qai sauma, ka kaya, “O cei oi kemuni, Turaga?’ Sa qai kaya mai vei au o koya, Oi au o Jisu na kai Nasareci, o koya o sa vakacacana tiko.’ 9E ratou a raica na rarama o ya o iratou ka tiko vata kei au, ia e ratou a sega ga ni rogoca na domo i koya ka a vosa vei au. 10Au sa qai kaya tale, ‘Kemuni na Turaga, a cava me'u cakava?’ Sa qai kaya vei au na Turaga, ‘Mo tucake, ka lako i Tamasiko. Ena qai tukuni vei iko maikea na ka kece sara sa lesia oti tu vei iko na Kalou mo cakava.’ 11A sa mataboko na mataqu baleta ni sa rui ramase na rarama o ya, ka ratou sa mani tuberi au ga kina o iratou ka tiko vata kei au me yaco sara ki Tamasiko.

12“A tiko voli ena koro o ya e dua na tamata, o Ananaiasa na yacana; e tamata daulotu ka dau muria vakadodonu na noda Lawa, ka sa dokai vakalevu sara o koya vei ira kecega na Jiu era tiko kina. 13E a lako mai vei au ka mai tu e yasaqu, ka kaya, ‘I Saula na taciqu, mo rai tale!’ Ena tiki ni gauna vata sara ga o ya, sa rai vinaka tale kina na mataqu ka'u raici koya sara. 14Sa qai kaya vei au o koya, ‘Na Kalou ni noda qase sa digitaki iko mo kila na lomana, mo raici Koya na Yalododonu, ka rogoca na voqa ni domona. 15Ni o na dau tukuna vei ira kecega na tamata na veika o sa raica ka rogoca. 16Ia oqo, a cava tale mo waraka? Mo tucake, ka papitaisotaki, ka me vakasavasavataki laivi na nomu i valavala ca mai na nomu masuti koya.’

Sa Kacivi o Paula me La'ki Vunau Vei Ira na Kai Matanitu Tani

17“Ia ni'u sa lesu tale mai ki Jerusalemi, au a mani la'ki masu tiko ena Valenisoro. Au a qai raica e dua na raivotu. 18Au a raica na Turaga ni kaya tiko vei au, ‘Vakatotolo ka biuti Jerusalemi sara, ni ra na sega ni vakabauta na nomu i tukutuku baleti au.’ 19Au a qai kaya vua, ‘Turaga, era sa kila vinaka sara tikoga ni'u a dau curuma na veivalenilotu ka vesuki ira ka vakanakuitataki ira era sa vakabauti kemuni. 20Ena gauna sa vakamatei kina na nomuni tamata o Sitiveni, au a tu sara ga e kea, ka'u a vakadonuya tu na nona vakamatei, ka'u a maroroya voli na nodra i sulu o ira ka vakamatei koya.’#Caka 7.58 21Sa qai kaya vei au na Turaga, ‘Mo lako ga, ni'u sa na talai iko vakayawa kivei ira na kai matanitu tani.’ ”

Na Ka e Qai Yaco ena Vuku ni Vosa i Paula

22Era a vakarogoci koya vakavinaka tiko me yacova ni sa cavuta na vosa o ya. Era sa qai tabalaka cake mai na domodra, ka kaya, “Me kau tani e vuravura na tamata vakaoqo! Sa sega ni dodonu me bula tiko!” 23Ia ni ra sa qoqolou tikoga, ka cebuceburaka na nodra i sulu, ka kaburaka ki macawa na kuvu ni qele, 24sa qai vakarota na komada me kau ki na i tikotiko ni valu o Paula. A sa kaya talega me vakanakuitataki ka vakatarogi, me kilai kina na vu ni nodra qolouvaki koya na Jiu. 25Ia ni ra sa vesuki koya tu me sa kanakuita, sa qai kaya o Paula ki vua na turaganivalu ka duri tu e kea, “E tara li vei kemuni mo ni vakanakuitataka e dua na kai Roma ni se sega mada ni veilewaitaki ena dua na cala?”

26Ni sa rogoca na turaganivalu na ka oqo, sa lako sara vua na komada ka tarogi koya, “Na cava o sa cakava oqo? Na tamata o ya e kai Roma!”

27Sa mani lako na komada ka kaya vei Paula, “Tukuna mada mai vei au, o iko li o kai Roma se sega?”

Sa qai sauma o Paula ka kaya, “Io.”

28A sa kaya na komada, “Oi au, au a sauma e dua na i lavo levu me'u yaco rawa kina me'u kai Roma.”

Sa qai kaya o Paula, “Ia o au, au kai Roma ena noqu sucu.”

29E ratou sa mai biuti koya vakatotolo sara o iratou ka dodonu me ratou la'ki vakatarogi Paula. A sa rere talega na komada ni sa qai kila ni sa kai Roma o Paula, ka ni a vesuki koya talega ena sinucodo.

O Paula ena Matadra na Lewe ni Matabose

30Ena mataka ka tarava, ni sa via kila na komada na dina ni ka era beitaki Paula tiko kina o ira na Jiu, sa mani sereki koya ka vakarota me ra soqoni vata yani o ira na bete levu kei ira na lewe ni Matabose e cake. A sa qai mai kauti Paula sobu yani o koya ka la'ki vakaturi koya e matadra.

Currently Selected:

Cakacaka 22: FNVDC12

Highlight

Copy