Cakacaka 20

Ki Masitonia Kei Kirisi

1Ni sa malumu sobu na tiko yavavala o ya, sa qai vakasoqoni ira vata na tamata vakabauta o Paula, ka tauca vei ira na vosa ni veivakayaloqaqataki, ka sa qai vakamoce vei ira me sa lako yani ki Masitonia. 2A sa lakova o koya na veiyasana kece o ya ka vakaukauwataki ira na tamata ena vuqa sara na vosa ni veivakayaloqaqataki, ka mani yaco sara yani ki na vanua o Akaia. 3E a tiko e kea ka vula tolu. Ia ni sa vakarau me gole ki Siria, sa qai kunea ni ra nakicataki koya tiko na Jiu. Sa mani lewa kina me sa na muri tale ki Masitonia ni sa lesu. 4E ratou a salavata kaya o iratou o Sopate na luve i Pairasi mai Piria, o rau o Arisitako kei Sekudu mai Cesalonaika, o Keio mai Tapi, o rau o Tikiko kei Tirofimo mai Esia, vata kei Timoci. 5E ratou sa liu sara yani ka la'ki waraki keitou mai Tiroa. 6Ia ni sa oti na Solevu ni Madrai Sega ni Vakatubu, keitou sa qai soko mai Filipai ka yaco vei iratou ki Tiroa ni sa oti e lima na siga, ka keitou macawa dua e kea.

Otioti ni Veisiko i Paula ki Tiroa

7Ena i matai ni siga ni macawa, ni keimami sa soqoni vata me caka na dovi madrai, sa qai vunau vei ira o Paula. E a vosa tiko o koya ka yacova sara yani na lomaloma ni bogi, baleta ni sa na lesu tale tiko o koya ena siga ka tarava. 8Sa levu sara na cina era waqa tiko ena veirumu ni tabavale e cake, ena vanua keimami soqo vata tiko kina. 9A sa dua na cauravou lailai, o Autiko na yacana, sa dabe toka ena dua na katuba leka ka mani via moce koto ka sa sosovu sara tiko, ni sa balavu tiko na vosa i Paula. Ia ni sa rawai koya na moce, sa qai lutu mai na i katolu ni tabavale e cake ka tau sobu ki ra. Ni ra sa qai keveti koya cake, sa mate tu. 10Sa qai lako sobu o Paula ka la'ki davoci koya ka mokota. Ia ni sa duri cake tale sa kaya, “Ni kakua ni taqaya, e se bula tiko o koya!” 11Sa qai lako cake tale o Paula ka la'ki dovi madrai ka kana, ka ra sa qai mai veivosaki tiko yani vakadede ka yacova ni sa kida na mataka. Ni oti o ya, sa qai biuti ira ka lako yani. 12Sa mani bula na cauravou lailai ka ra sa kauta lesu ki na nona vale ena vakacegu.

Mai Tiroa ki Milito

13Keitou sa mani liu ki waqa ka soko sara ki na koro o Aso, na vanua me keitou na qai la'ki vakavodoki Paula kina ka ni a tukuna vei keitou o koya me keitou cakava, o ya ni via muri e vanua o koya. 14Ia ni keitou sa sota mai Aso, keitou sa qai vakavodoki koya, ka gole sara ki na koro o Mitilini. 15Keitou soko tale maikea ka soko ravita na yanuyanu o Kio ena siga ka tarava. Keitou yaco yani ki na yanuyanu o Samo ena siga ka tarava, ia ena siga tale ka dua keitou sa yaco sara ki na koro o Milito. 16A sa lewa tu o Paula me kakua ni la'ki sobu ki Efeso ka me na kakua kina ni tiko vakadede tale mai Esia. E a vakatotolo tiko, ka nuitaka, kevaka e mani rawa, me na tiko mai Jerusalemi ena siga ni Penitiko.

Na Vosa ni Veitalatala nei Paula vei Ira na Qase mai Efeso

17Ia sa mani talatala ga o Paula mai Milito ki Efeso ka kerea me ra lako mada yani vua na qase ni lotu maikea. 18Ni ra sa yaco yani vua, sa qai vosa vei ira o koya, ka kaya, “O ni sa kila na i tovo ni noqu tiko voli vei kemuni ena veisiga kecega, me vakatekivu mai na i matai ni siga au a yaco yani kina ki Esia. 19Au a qarava na Turaga ena yalomalumalumu sara kei na wai ni mataqu ena gauna dredre au sota kaya ena nodra a nakicataki au na Jiu. 20O ni kila ni'u a sega ni vunia vei kemuni e dua na ka ena yaga vei kemuni, ena noqu vakatavulici kemuni ena veisoqoni ka caka ena matana levu kei na veivale. 21E vaka talega kina vei ira na Jiu kei ira na kai Kirisi, au a vakarota vei ira me ra veivutuni mai na nodra i valavala ca ka vakabauta na noda Turaga o Jisu Karisito. 22Ia oqo au sa lako tiko ki Jerusalemi ena veituberi ni Yalo Tabu, ka'u sega ni kila se cava ena yaco vei au maikea. 23Na ka ga sa vakatakila tiko vei au na Yalo Tabu ena veikoro kecega, ni sa waraki au tu mai na valeniveivesu kei na veika rarawa. 24Ia sa sega tu ni'u okata me dua na ka na noqu bula; na ka ga au gadreva o ya me'u na vakaotia vakavinaka na noqu i lakolako, kei na i tavi sa solia vei au na Turaga o Jisu, o ya me'u vunautaka na i Tukutuku Vinaka ni loloma-savu ni Kalou.#2Timo 4.7

Na Vakamamasu i Paula

25“Ia oqo au sa kila ni sa na sega ni raica tale na mataqu e dua vei kemuni; oi kemuni ka'u a dau lako voli ena kemuni maliwa, ka vunautaka kina na Matanitu ni Kalou. 26O koya oqo, au sa tukuna vakadodonu kina vei kemuni edaidai ni sa na sega ni noqu cala kevaka ena mani cudruvi e dua vei kemuni. 27Ka ni'u a sa vakamacalataka vakavinaka sara vei kemuni na i naki ni Kalou, ka sega ni vunia e dua na tikina. 28O koya oqo, mo ni qai qarauni kemuni vinaka kei ira kecega na qele ni sipi sa lesi kemuni kina na Yalo Tabu mo ni kedra i vakatawa. Ni qarava vinaka na i soqosoqo lotu ni Kalou, o ira ka sa volia o koya me nona mai na dra i Luvena. 29Au sa kila ni gauna ka'u na lako tani eke, era na curu mai ena kemuni maliwa eso na olifa daukata, ka ra na sega ni via laiva me dro bula e dua vei ira na qele ni sipi. 30Era na tubu talega mai eso vei kemuni, ka ra na mai vakatanitaka na i vakavuvuli dina me ra vakayarayarataki ira kina na vakabauta kivei ira. 31O koya oqo mo ni qai yadra tiko kina, ka kakua ni guilecava na noqu a sega ni bau cegu ena siga kei na bogi, ena loma ni tolu na yabaki, ena noqu vakasalataki kemuni tiko, ka tonawanawa tiko na mataqu.

32“Ia oqo au sa tataunaki kemuni vua na Kalou kei na i tukutuku ni nona loloma-savu, na loloma ka sa rawata me vakatuburi kemuni cake; me solia talega me nomuni na i votavota sa maroroya tu me nodra na nona tamata. 33Au a sega ni domona na nona siliva, se koula, se i sulu e dua na tamata. 34Oi kemuni vaka i kemuni o ni kila ni a dau cakacaka ga na ligaqu oqo me baleta na ka e yaga vei au kei iratou talega e ratou tiko vata kei au. 35Au a sa vakaraitaka vei kemuni na veika kece sara; au a vakaraitaka ni sa dodonu ena noda cakacaka vakaukauwa me da dau vukei ira na malumalumu, ka nanuma tiko na vosa ni Turaga o Jisu, ena nona a kaya, ‘Sa kalougata vakalevu cake me da solia na ka, ka sega soti na noda dau ciqoma na ka.’ ”

Sa Vakarau Biuti Efeso o Paula

36Ni sa vosa oti vaka o ya o koya, era sa qai tekiduru vata kece ka masu. 37E sega ni dua vei ira me sega ni tagi, ka ra sa mokoti koya ka reguca. 38Sa rarawa vakalevu sara na lomadra ena nona a kaya ni ra sa na sega tale ni raica na matana. Oti o ya era sa qai mai kauti koya sara yani ki waqa.

Currently Selected:

Cakacaka 20: FNVDC12

Highlight

Copy