2 Tui 25
25
Na Bale nei Jerusalemi
(2Vei 36.13-21; Jere 52.3b-11)
1A sa vuki tani mai vei tui Papiloni o Setekaia ka bese ni qaravi koya, ka vakavuna oqo me la'ki valuti Jerusalemi kina na mataivalu i Nepukanesa ena i katini ni siga ni katini ni vula ena i kaciwa ni yabaki ni veiliutaki vakatui i Setekaia. Era a tara keba ena taudaku ni bai, ka tara na veivale ni valu me vakavolivolita ena sasaga ni kena tauri vakaukauwa o Jerusalemi.#Jere 21.1-10; 34.1-5; Isi 24.2 2E a tauri vakaukauwa tiko na koro levu o Jerusalemi me la'ki yacova na i katinikadua ni yabaki ni veiliutaki vakatui i Setekaia. 3Ia ena i kaciwa ni siga ena i kava ni vula ni yabaki o ya, sa ka levu sara na viakana ena loma ni koro, ka sa sega na kedra kakana na lewenivanua, 4ka sa basuki na bainikoro. E dina ga ni ra yadra wavokita na koro o ira na kai Papiloni, era a dro bula ena bogi na tamata i valu kece sara. Era muria na sala ki na matamata ni koro ena veimama ni bai ruarua ka volekata na lomanibai ni tui, ka curuma yani na qara e semati rau na lalaga e rua, ka dro yani ena sala ki na Buca o Joritani.#Isi 33.21 5Ia era a qai vakacemuri tui Setekaia na mataivalu ni Papiloni, ka vesuki koya ena buca mai Jeriko, ka ra sa dro tani mai vua o ira kece na nona sotia. 6Era a kauti koya yani vei tui Papiloni ki Ripila, ka vakatauci vua e kea na kena i totogi. 7Ni rai tu ga o Esekaia, era a qai vakamatei iratou na luvena tagane; ka ra leuta tani na yaloka ni matana ruarua; era qai vesuki koya ena sinucodo parasa ka kauti koya ki Papiloni.#Isi 12.13
Na Vakarusai ni Valenisoro
(Jere 52.12-23)
8Ena i kavitu ni siga ni kalima ni vula ena i katinikaciwa ni yabaki vakatui i Nepukanesa na tui Papiloni, sa lako yani ki Jerusalemi o Nipusaretani na daunivakasala i Nepukanesa ka turaganivalu talega ni nona mataivalu. 9E a vakama o koya na Valenisoro, kei na nona vale na tui, kei na nodra veivale na tamata nuitaki e Jerusalemi, 10ka ra talaraka sobu na bai kei Jerusalemi o ira na nona sotia. 11A sa qai kauti ira kece yani vakabobula ki Papiloni na tamata era a vo tiko e loma i Jerusalemi o Nipusaretani; oqo o ira na vo ni tamata cakacaka vakamatai, kei ira era dro yani vei tui Papiloni. 12Ia sa biuti ira laivi tu ga e Juta o Nipusaretani na tamata dravudravua sara ni vanua; oqo o ira e sega na ka era taukena, ka me ra samaka na loganivaini ka teivaka. 13Era a vorolaka vakamatailalai na kai Papiloni na duru parasa, na veitutu ni taqe, kei na taqe parasa levu ka ra tu ena Valenisoro, ka ra kauta na parasa kece oqo ki Papiloni.#1Tui 7.15-26; 2Vei 3.15-17 14Era a kauta talega na kuro, na i sivi ni dravusa, na i koti ni cina, na i taki, kei na i yaya parasa kecega e dau vakayagataki ena veiqaravi ni sokalou.#1Tui 7.45; 2Vei 4.16 15Era a kauta tani na veika taucoko sa buli ena koula se siliva, ka okati kina na disi ni dravusa kei na bilo ni dra me kureitaki. 16Na parasa e tauri mai na duru ruarua, na taqe levu e dua, kei na veitutu ni taqe ka cakava o Solomoni me baleta na Valenisoro sa sega ni vakarautaki rawa na kena bibi. 17Na cecere ni dua na duru e 8 na mita, kei na kena domodomo parasa e delana e 1.3 na mita na kena cere. Ena tikina sara e cake ni veiduru, e cowiritaka toka na i talitali parasa ka ukucavutaki ena pomekaraneti parasa.
Kau Vakabobula ki Papiloni o Ira na Juta
(Jere 52.24-27)
18Na turaganivalu o Nipusaretani sa kauti iratou talega vakavesu o Siraia na bete levu, kei Sefanaia na i karua ni bete, kei iratou e lewe tolu tale na vakailesilesi nuitaki ni valenisoro. 19Mai na loma ni koro levu, a sa tauri iratou vakavesu na turaganivalu ka liutaki ira voli mai na tamata i valu, kei iratou e lewe lima na nona daunivakasala na tui ka ra kune ena koro, kei koya na vunivola ni liuliu ni mataivalu ka dau wiliki ira na lewe ni vanua, kei na lewe 60 na turaga nuitaki ni vanua ka ra kunei ena loma ni koro. 20A kauti ira o Nipusaretani na turaganivalu vua na tui Papiloni, ka tiko ena koro o Ripila 21ena vanua o Emaci. A sa mokuti ira mai kea o tui Papiloni ka vakamatei ira.
Ena ka oqo era sa kau vakabobula kina o ira na Juta mai na nodra vanua.
Lesi me Kovana e Juta o Kitalaia
(Jere 40.7-9; 41.1-3)
22A sa lesi Kitalaia na luve i Eaikimi ka makubui Safani o Nepukanesa na tui me nodra kovana na tamata era a vo tiko ena vanua o Juta, oqo o ira era a sega ni kau yani ki Papiloni. 23Ia ni ra rogoca oqo o ira kece na sotia kei na vakalesilesi ni Juta ka ra se bera ni soro, era sa lako yani me ra sota kei Kitalaia mai Misipa. O ira oqo o Isimeli na luve i Necanaia, o Jonani na luve i Karaia, kei Siraia na luve i Tanumeci mai na koro o Nitofa, kei Jeesanaia mai Meka. 24A sa kaya vei iratou o Kitalaia, “Au sa bubului vei kemudou ni sega ni dodonu mo dou rerevaki ira na nodra tamata na kai Papiloni. Dou tiko ga ena vanua oqo, ka qaravi tui Papiloni, ka na vinaka na veika taucoko me baleti kemudou.”
25Ia ena i kavitu ni vula, a sa lako yani ki Misipa o Isimeli na luve i Necanaia ka makubui Ilisama, e dua vei ira na kawa ni tui, kei iratou vata kaya e lewe tini na tamata, ka ratou mokuti Kitalaia, ka mani mate kina o koya. A sa vakamatei ira talega na Isireli kei ira na kai Papiloni era a tiko vata. 26Ena ka oqo era sa cavutu kina na Isireli, o ira era vutuniyau se dravudravua, kei ira na turaganivalu, ka ra sa lako ki Ijipita baleta ni ra rerevaki ira na kai Papiloni.#Jere 43.5-7
Sereki mai Valeniveivesu o Jo-akini
(Jere 52.31-34)
27Ena yabaki ka cabeta kina na i tutu vakatui e Papiloni o Ivilimirotaki, a sa yalololoma vei Jo-akini na tui Juta ka sereki koya mai na valeniveivesu. E a yaco oqo ena i ka 27 ni siga ni katinikarua ni vula ena i ka 37 ni yabaki ni nona a tauri vakavesu o Jo-akini. 28A sa vosa vinaka vua o Ivilimirotaki, ka vakatikori koya ena i tutu cecere ka uasivi mai vei ira na vo ni tui era a kau vakabobula yani ki Papiloni. 29E a soli na galala vei o Jo-akini me luvata laivi na i sulu ni veivesu, ka tokara na i sulu vakaitaukei, ka kana ena teveli ni tui ena vo ni nona bula taucoko. 30A sa soli talega e dua na nona i votavota i yau mai vua na tui ena veisiga yadua ni nona bula.
Currently Selected:
2 Tui 25: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.