2 Veigauna 2
2
Vakarau me Tara na Valenisoro
(1Tui 5.1-18)
1A sa vakatulewataka o Solomoni me tara e dua na valenisoro me dau qaravi kina o Jiova, ka me tara talega na nona vale vakatui. 2A sa lesia o Solomoni e lewe 70,000 na tamata me ra daucolata na i yaya me veikauyaki, ka me ra lewe 80,000 na tamata me ra ta vatu ena veiulunivanua. Era tiko talega e 3,600 na tamata ka ra sa lesi me ra liutaka na veicakacaka eso ka raica na kedra i tosotoso.
3A sa talatala o Solomoni vei Irami na tui Taia, ka kaya, “Me vaka o a cakava vei Tevita na tamaqu, ni o sa vakauta vua na sitari me tara kina na nona vale me tiko kina, mo kitaka vaka talega kina vei au. 4Au sa vakarau tara tiko oqo na valenisoro me vakarokorokotaki kina o Jiova na noqu Kalou. Ena vakatabui me savasava na vale oqo ka me'u sokalou kina kei ira na noqu tamata, me keimami vakama kina na veika boi vinaka, me vakacabori wasoma kina na madrai tabu, me cabori kina na i soro kama ena veimataka kei na veiyakavi, ena Siga ni Vakacecegu, ena Solevu ni Vula Vou, kei na nona solevu tabu tale eso sa vakarokorokotaki kina o Jiova na neimami Kalou. Sa lesia oqo o Jiova me nodra i tavi na Isireli ka tawa mudu. 5Sa noqu i naki me'u tara e dua na valenisoro cecere ka uasivi, baleta ni sa cecere cake na neimami Kalou ka uasivia na veikalou kecega. 6#1Tui 8.27; 2Vei 6.18Ia, sa sega ni rawa vua e dua na tamata me tara e dua na valenisoro ni Kalou baleta ni sa sega mada ga ni tabonaki koya rawa na levu kei na cecere ni lomalagi e cake. Ena qai rawa li vakacava me'u tara e dua na valenisoro ka me bau qaravi mada ga kina na vakacaboisoro vua na Kalou? 7Ena ka oqo, mo vakauta mada mai kina vei au e dua na tamata vinaka ka kila na cakacaka vakamatai ni ceuceu; e kila na cakacakataki ni koula, na siliva, na parasa, kei na kaukamea; e kila talega na kena cakacakataki na i sulu karakarawa, lokaloka, kei na damudamu. O koya oqo, ena cakacaka vata kei ira na daucakacaka vakamatai e Juta kei Jerusalemi ka sa digitaki ira o Tevita na tamaqu. 8Me vakau talega mai vei au eso na kau sitari, na kau damanu, kei na kau talei mai Lepanoni, ni'u sa kila ni ra sa matai sara ena ta kau o ira na nomu tamata. Ia sa rawa vei au me'u tala yani eso na noqu tamata me vukei ira na nomu tamata 9ena vakarautaki ni binibini kau levu, baleta ni valenisoro au sa nanuma me'u tara oqo ena ka levu sara ka totoka vakaoti. 10Au na solia vei ira na nomu tamata, o ira na dauvakarautaka na kau e 2,000 na tani na witi, kei na 2,000 na tani na barile, e 400,000 na lita na waini, kei na 400,000 na lita na waiwai olive.”
11A qai sauma ena dua na i vola o Irami na tui Taia vei Solomoni, ka vaka, “Me baleta ni sa lomani ira na nona tamata o Jiova, a sa buli iko kina o koya mo nodra tui.” 12A sa kaya tale o Irami, “Me vakavinavinakataki o Jiova na nodra Kalou na Isireli, o koya ka buli lomalagi kei vuravura, ka solia vei Tevita na tui e dua na luvena vuku, ka sa tiko vua na yalomatua kei na kila-ka, ka na tara na vale tabu me nei Jiova, kei na dua na nona vale vakatui.”
13Ia oqo au sa tala yani e dua na tamata yalomatua, ka vuku sara ena cakacaka vakamatai, na yacana o Urami. 14Na tinana e lewe ni mataqali na Tani, ka i taukei ni matanitu o Taia o tamana. Sa kila o koya na cakacaka vakamatai me baleta na koula, na siliva, na parasa, na kaukamea, na vatu, kei na kau. E rawa ni cakacakataka na veisulu karakarawa, lokaloka, damudamu, kei na lineni matailalai. E rawa ni cakava na veimataqali ceuceu kece e vinakati ka vakamuria na i yaloyalo se i ukuuku cava ga e gadrevi me ceuti. Io me cakacaka vata kei ira na nomu matai vata kei ira na nona matai na noqu turaga o Tevita na tamamu. 15Ia oqo, me vakauti mai vei ira na nomuni tamata na witi, na barile, na waiwai olive, kei na waini me vaka na nomuni vosa na noqu turaga; 16ia keimami na taya na kau kece o ni vinakata mai Lepanoni, ka na vakaciriciritaki yani me vaka na bilibili ena wasawasa ki Jopa; ia ena qai nomu i tavi na kena kau cake yani ki Jerusalemi.
Tekivu me Tara na Valenisoro
(1Tui 6.1-38)
17A wiliki ira kece na lewenivanua era tiko vulagi ena vanua o Isireli o Solomoni, me vaka ga na wili lewenivanua sa cakava taumada o Tevita na tamana. E a kunea ni ra lewe 153,600 taucoko na vulagi. 18A sa lesia e lewe 70,000 vei ira me ra daucolacola, ka ra lewe 80,000 me ra dautavatu mai na veidelana, ka digitaka e 3,600 me ra liutaka na veimatacakacaka eso ka raica matua na kena vakayacori tiko na cakacaka.
Currently Selected:
2 Veigauna 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.