1 Makabe 2
2
Na yalodina i Matacayasi
1E na gauna ya a toki kina mai Jerusalemi me vakaitikotiko e Moteini o Matacayasi na luve i Jone luve i Simione, na bete ni kawa i Joarivi. 2E lima na luvena: o Jone, karua ni yacana o Qati, 3o Saimoni vakatokai me o Casi, 4o Jutasa vakatokai me o Makabe, 5o Iliesa vakatokai me o Avarani, kei Jonacani vakatokai me o Apo. 6Nona raica na itovo veibeci e vakayacori tu e Juta kei Jerusalemi, 7a kaya,
“Sobo! Na cava au sucu kina meu raica na ka qo,
Sara vakalolomataki na kai noqu,
sa talaraki na koro tabu,
au tiko sara kina ni sa nodra na meca,
na loqi tabu sa nodra na kaitani.
8Kena valenisoro e vaka na turaga sa beci;
9kena bilo tabu lagilagi sa itokinivalu.
Na kena gonelalai era sa moku mate e na veisaqata,
kena sausauvou era sa bale e na iselewau ni meca.
10Bau dua na matanitu se bera ni tawana na vale vakatui i Jerusalemi,
se kovea na kena iyau?
11Sa kau kece na kena iukuuku;
sa sega ni lewai koya, sa bobula tu.
12Isa, raica mada: na noda vanua tabu,
noda isakisaki kei na noda lagilagi, sa talaraki;
era sa vakaweletaka na kaitani.
13Me icavai vei keda na bula tiko?”
14Eratou qai dresulaka nodratou isulu o Matacayasi kei iratou na luvena, eratou vakaisulu taqarotu kece, ratou sa veilolosivaki.
15Eratou mani lako mai i Moteini na sotia ni tui eratou usuraka tiko na lotu lasulasu, meratou vakavorakitaki ira na lewenikoro mera vakacabo isoro. 16E lewe levu na kai Isireli era lako yani, wili kina o Matacayasi kei iratou na luvena. 17Eratou qai vosa vaqo vei Matacayasi na sotia ni tui: “O kemuni na iliuliu rokovi, iliuliu rogo e na koro qo, eratou dokai kemuni na luvemuni kei na tacimuni. 18Moni liu sara ga mai o kemuni moni muria na lewa ni tui, me vaka era sa cakava oti na kaitani kece, na kai Juta, kei ira na vo tiko e Jerusalemi. Odou sana qai wili na veitamani modou itokani ni tui, dou na vakaiyautaki e na siliva, koula kei na levu tale na iloloma.” 19Ia a sauma domoilevu o Matacayasi: “Sera mani muria na lewa ni tui na nona matanitu kece, ra lewa mera muria na nona ivakaro, mera dui biuta na lotu ni nodra qase, 20o yau, o ratou na luvequ kei na taciqu, keitou na rokova tiko ga nodra veiyalayalati na neimami qase. 21Tabu sara me keitou vakanadakuya na lawa kei na ivakaro. 22Keitou na sega ni muria na vosa ni tui me keitou gole tani mai na neitou lotu i na imatau se na imawi.”
23Sa cavuka ga na nona vosa, sa gole mai e dua na Jiu me vakacabo isoro e matanalevu e na yaletare e Moteini, me vaka na lewa ni tui. 24Ni sa raica o Matacayasi, sa yavala na yalona e na igu vakalotu. Na levu ni nona cudru vakalotu, sa cici yani, vakamatei koya e na dela ni yaletare, 25lako vata nona vakamatea na sotia ni tui e vakasaurarataki ira tiko mera vakacabo isoro, qai talaraka na yaletare. 26#Tiko 25.6-15Qo gona na levu ni nona gumatuataka na lawa, me vaka a cakava o Peniasi vei Simiri na luve i Salu.
Sa batikadi o Matacayasi
27Sa qai kailavaka e loma ni koro o Matacayasi: “I kemuni kece oni rokova na lawa oni tokona na veiyalayalati, ni muri yau mai!” 28Eratou sa qai dro i colo na veitamani, biu tu mai e na koro na nodratou iyau kece. 29Era lewe levu na guta tiko na itovo kei na lewa dodonu era sa qai siro i vanualala mera tiko kina 30kei ira na nodra veitinani kei na nodra bulumakau, baleta ni sa bikai ira vakalevu na ca. 31Sa tukuni vei ira na vakailesilesi ni tui kei ira na nona sotia e Jerusalemi na koro i Tevita ni o ira na cata na lewa ni tui era sa siro i na ivunivuni e vanualala. 32#2M 6.11E dua na matasotia levu sa qai muri ira, yacovi ira, qai keba donumaki ira, sa vakarau me valuti ira e na siga ni vakacecegu. 33Era kaya, “Sa rauta na ka qo! Ni mai muria na lewa ni tui moni bula.” 34Era kaya ga, “Keimami bese ni lako yani se muria na lewa ni tui me keimami beca na siga ni vakacecegu.”
35Sara qai kaba sara mai na meca. 36Era sega ga ni sauma, se veiviri, se latia nodra ivunivuni, 37nira kaya, “Me keimami mate kece ga e na yalosavasava; erau ivakadinadina o lomalagi kei vuravura nioni vakamatei keimami vakatawadodonu tiko.” 38Era sa qai valuti ira e na siga ni vakacecegu, ra mani mate kece kina kei ira na veitinani kei na bulumakau, kedra levu taucoko e le dua na udolu.
39Niratou sa rogoca o Matacayasi, eratou sa lolosi vakalevu. 40Eratou veivosakitaka: “Kedatou muri ira na wekadatou tou sega ni vorati ira na kaitani medatou valataka nodatou bula kei na lawa, era na vakawabokotaki kedatou vakatotolo e dela i vuravura.” 41Qo na nodratou lewa e na siga ya: “O koya ga e mai valuti kedatou e na siga ni vakacecegu, medatou vorata; medatou kua ni mate kece vakataki ira na wekadatou e na nodra ivunivuni.”
42Sa qai mai cokovata kei iratou e dua na ilala Hasiteo, na sotia qaqa ni Isireli, era sa bolea kece mera valataka na lawa. 43O ira kece na drovaka mai na veivakasaurarataki, era mai tovata kei ira. 44Era tauyavutaka na mataivalu, era qai mokuti ira e na nodra cudru na dauvalavalaca kei ira na muri lomadra; o ira na cila rawa, era dro vei ira na kaitani mera bula kina. 45Eratou qai talaraki yaletare wavoki o Matacayasi, 46eratou cilivi ira kece voraki na gone tawacili e Isireli. 47Eratou vakasasataki ira na viavialevu, e toso vinaka nodratou sasaga. 48Eratou vueta na lawa e ligadra na kaitani kei na tui, sa mudu kina nodra qaqa na tamata valavalaca.
Sa bale o Matacayasi
49Ni sa malumalumu o Matacayasi, sa tatau vei iratou na luvena: “Sa kaukaua mai na viavialevu kei na veibeci, sa gauna ni leqa kei na cudru katakata. 50Kemudou na luvequ, dou gumatuataka na lawa, dou bole mate e na vuku ni nodra veiyalayalati na nodatou qase.
51“Dou nanuma na nodra cakacaka na nodatou qase e na nodra delanigauna; dou na rokovi vakalevu kina, e na rogo tawamudu na yacamudou. 52#Vteki 15.6; 22.15-18A sega beka ni vakadeitaki na vakabauta nei Eparahama e na nona vakatovolei, mani okati kina me yalododonu? 53#Vteki 39.1–45.28O Iosefo a muria tu ga na ivunau e na gauna ni leqa, mani yaco me turaga levu e Ijipita. 54Na gumatua nei Peniasi na tubudatou a yalataki kina nira na bete tawamudu na nona kawa. 55#Tiko 13.1–14.12O Josua a yaco me turaganilewa e Isireli e na nona dau vakarorogo. 56O Kalepi a vakaivotavota e na qele e na nona vosa ni vakadre e na soqo. 57#2Samu 7.16O Tevita a nona vakadua na itutu vakatui e na nona yalololoma. 58#2Tui 2.9-12O Ilaija a laveti i lomalagi e na nona dau gumatuataka na lawa. 59#Tani 3.8-30O Anania, o Asaria kei Misaele eratou a vakabulai mai na yame ni buka e na nodratou vakabauta. 60#Tani 6.1-24; 3. Tn 31-42O Taniela a bula mai na gusu ni laione e na nona yalosavasava.
61“O koya gona: e na veitabatamata o ira kece na nuitaki koya, era na qaqa. 62Dou kua ni rerevaka na vosa ni tamata valavalaca, ni nona lagilagi e na vuki me denimanumanu kei na baca. 63Nikua e na vakacerecerei, nimataka e na sega ni kune, ni sa vuki me kuvuniqele, sa seva nona inaki. 64Kemudou na luvequ, dou yalodei, dou gumatua na maroroya na lawa, nidou na rokovi kina.
65“Raica, au kila ni tamata yalomatua o Simione na tuakamudou, dou dau vakarorogo vua; sana wili me tamamudou. 66Se cauravou o Jutasa Makabe sa liganiwau qaqa, e na liutaka na nomudou mataivalu me valuti ira na kaitani. 67Modou vakasoqoni ira kece mai na dau rokova na lawa, modou sauma na ca e vakayacori vei ira na wekadatou. 68Dou sauma lesu sara vakavinaka vei ira na kaitani, dou rokova na lawa.”
69Sa qai vakalougatataki iratou, qai toki yani vei ira na tubuna. 70E mate e na yabaki 146 [166 BSK], qai bulu e na nodratou ibulubulu qaravatu e Moteini. E lolositaki koya o Isireli taucoko e na tagilagalaga.
Currently Selected:
1 Makabe 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.