Hebreos 8

Jesús riki ja Sacerdotebaon Koshi

1Ja non yoiibea bebonbires jakon riki, ja non Sacerdotebaon Koshi naikan itina, Diossen ani yakati mekayao yakata.

2Jainoaxa teeti itai, sacerdote keskatibi, ja ikonkon Diossen xobonkoniaxshaman, ja xobo riki non Ibonbi aká, jonibaon akáma.

3Jatíbi sacerdotebaon koshibo riki, Dios bexonkanai jawékibo jato menixonti, itan yoina retexon jato menoxonti janekanabo. Jaskara kopíra, Jesucristonaribi jati jake, ja jato Dios menixonti.

4Jatian nato mainbi ikaxa, jawekeskataxbi já sacerdote iamakeanke, nenora moa sacerdotebo jake, ja Moiséssen esekan yoiai keskáakin, Dios jawéki bexonkana jato menixonaibo.

5Ikaxbi nato sacerdotebaonra, jaton tee akanai, Diossen xobonkoxon, ja riki naikanmea Diossen xobo jisáakin aká. Ja naikanmea jisá non onanna riki, ja Moiséssen Dios xoboaxonaitian, Diossen neskáakin yoia iketian: “Ja mananmanxon en mia jaskáakin ati oinmani keskáakinshaman, jatíbi awé”, akin.

6Ikaxbi ja Sacerdotebaon Koshi iti tee Jesussen biatoninra, jato winoke, já meranxonra wetsa jakonhira bená ja senenhabekonti joi Diossen aká iki. Jara akonkin senenhati ixon, Diossen yoia jakonhira joiboki koshike.

7Ja reken Diossen jato betan senenhabekonti joi aká jatíbi jakonbires iketianra, wetsa bená senenhabekonti joi, Diossen jato betan ayamakeana iki.

8Ikaxbi jonibaon senenhayamakanai oinnax, Ibo iká iki neskati:

“Ibonra yoiai: Netera nokónoxiki, ja Israel jonibo itan

Judá jonibo betan, en bená senenhabekonti joi ati.

9Ja nato bená senenhabekonti joi en

akaira, ja Egipto mainmea jaton rekenbo en

metsontaanan pikonontian aní keska itima iki.

Ja en senenhabekonti aká joibo, jabaon

senenhayamaitianra aká iki, en jato jenekin, ikira ikai

ja Ibo.

10Ja netebo moa winota pekáo, Israel

jonibo betan, en bená senenhabekonti joi akaira

inóxiki, neskara ikira ikai non Ibo:

Nokon esébora jaton shinan meranbo en imanoxiki,

itan jaton jointi meranra en wishanoxiki.

Eara inóxiki jaton Dios, jatian jabora inóxiki nokon

jonibo.

11Moara maxkáyamanoxiki tsonbi jabé joni, itan

jawen kaibobo non Ibo onankanon ixon jato yoiti,

jatíxonbira ea onannoxikanai, ja kikin itan kikinma

jonibaonbi.

12Ja jakonmabo akanatonra, ea shinanbenoti iki,

jaton ocha akábora jawetianbi en jato shinanxontima iki”, ikira ikai non Ibo.#Jer. 31.31

13Ja bená senenhabekonti joi atikiriti Dios yoyo ikátoninra, ja moatian senenhabekonti joi aká, moa jawemabi imaa iki, jatian moatian ikaxa, basima maxkáke moa keyoti.

Currently Selected:

Hebreos 8: shp

Highlight

Copy

Compare