Filemón 1
1
Carta qalaykunan
1Wilakuq mayï kuyay Filemón:
Noqa Pablumi, Jesucristupa wilakuyninta wilakushqäpita carcilcho kaykar Timoteuwan kay cartata cartakayämü. 2Salüdüta qoykulanki paninsi Apiata, wilakuq mayinsi Arquiputa#Col. 4.17. y wayikicho shuntakaykur Tayta Diosta alabaq wawqi paninsikunatapis. 3Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.
Yärakuq mayinkunawan Filemón ali kawashqan
4Wawqi Filemón, imaypis manakushqä hörami qampaq Tayta Diosta agradëcikü. 5Señor Jesucristuman yärakuykashqaykita y yärakuq mayinsikunawan kuyanakuykäyashqaykitami wilayämash. 6Saymi manakuykä Jesucristuman yärakunaykipaq y noqansi rayku wanushqanpita ali kaqkunata ruranaykipaq.
7Wawqi Filemón, kuyakuq kashpayki yärakuq mayinsikunata shakyaykäsishqaykita musyarmi noqapis fiyupa kushikü.
Onésimuta Filemón chaskinanpaq Pablo ruwakushqan
8-10Wawqi Filemón, Jesucristupa wilakuyninta wilakushqäpitami carcilcho wichqaraykä. Saynöpis awkinnami kaykä. Prësu kaykashqäman ashmayniki Onésimo#Col. 4.9. chämuptin ali wilakuyta wilapaptïmi Jesucristuta chaskikush. Saymi kananqa surïnöna kaykan.
Sayno kaptinmi qamta ruwakü Onésimuta kachamuptï ali chaskinaykipaq. Jesucristupa apostolnin kar qamta obligarpis obligämanmi. Sayno kaptinpis manami obligayta munäsu, sinöqa kuyakuq kaptikimi Onésimuta ali chaskinaykipaq ruwakuykä.
11Ashmayniki karpis nawpata manami shumaqsu yanapäshurqayki. Kananmi isanqa Jesucristuta chaskikushna kar ishkansitana yanapämäshun. 12Saymi seqaypa lakirpis Onésimuta kutiykäsimü. [Payta kikïtano chaskiykulay.] 13Ali wilakuyta wilakushqäpita prësu wichqarashqäyaq trukayki yanapämänanpaq quëdasikuptïpis alimi kanman karqan. 14Sayno kaptinpis ashmaynikitaqa manami sararäkümansu, saypa trukanqa kikikiraqmi yanapämänanpaq o mana yanapämänanpaqpis ninayki.
15Capazchir Tayta Dios kamakäsish Onésimo juk tiempula qampita yarqamunanpaq. Saymi kananqa Jesucristuta chaskikur imayyaqpis wawqikina kaykan. 16Kananpita mananami ashmaylaykinasu kanqa, saypa trukanqa kuyay wawqinsinami. Sayno kaykaptinqa noqa kuyashqänöla makikiman kutimuptin qampis kuyaykulay. 17Saymi yärakuq mayï kaptiki ruwakü noqata chaskikamaq japuyla paytapis chaskiykunaykipaq.
18Ashmayniki Onésimo imaykitapis suwakush kaptinqa o jaqayki kaptin imaptinqa wilaykamay noqa päganäpaq. 19Päganäpaq kaqtaqa kikïmi qelqaykämü. Isanqa ama qonqaysu Jesucristupa ali wilakuyninta wilapashqäpita qampis jaqä kashqaykita. 20Wawqi Filemón, yärakuq mayï kaptikimi ruwakü kay nishqäta ruranaykipaq. Ruwakushqäta ruraptikiqa kushikushaqmi.
21Imatapis nishqäno ruranaykipaq kashqanta musyarmi kay cartata cartakamü. Nishqäpita mastaraq ruranaykipaq kashqantapis musyämi. 22Tayta Diosta manakushqaykino carcilpita yarqamurqa rajakuq shamushaqmi. Chämuptï posädasimänaykipaq puestukuykälay.
Carta ushanan
23Epafrasmi#Col. 1.7; 4.12. salüdunta qampaq apasikamun. Paypis Jesucristupa ali wilakuyninta wilakushqanpitami noqawan juntu prësu wichqaraykan. 24Saynölami wawqinsi Marcos,#Hech. 12.12, 25; 13.13; 15.37-39; Col. 4.10. Aristarco,#Hech. 19.29; 27.2; Col. 4.10. Demas#Col. 4.14; 2Tim. 4.10. y Lucaspis#Col. 4.14; 2Tim. 4.11. salüdunkunata apasikayämun. Paykunami lapanchöpis yanapaykäyäman.
25Señor Jesucristo kuyapäshushpayki imaypis yanapaykuläshunki. [Amén.]
Currently Selected:
Filemón 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.