Tito 3
3
Imaypis alilata rurayänanpaq yäsishqan
1Wawqi panikunata yachasinki mandaqkunata y autoridäkunata respitar wiyakuyänanpaq y alilata imaypis rurayänanpaq. 2Saynöpis yachasinki washarima mana kayänanpaq, pitapis mana wajupäyänanpaq, ali shonquyuq kayänanpaq y pïmaywanpis ali rikanakur kawayänanpaq.
3Jesucristuta manaraq chaskikurqa noqansipis wakin runakunanölami mana tantiyakushpansi Tayta Diosta wiyakurqansisu. Jusalikuykunata kachariytapis manami kamäpakurqansisu. Chikinakur rimanakurmi kawarqansi. 4Sayno kawaykashqami Tayta Dios kuyakuq kar 5salvamashkansi. Manami alita rurashqansipitasu salvamashkansi, saypa trukanqa jusayuq kaykashqapis kuyapämashpansimi salvamashkansi.#Dan. 9.18. Jusansipita maylamashpansimi Espíritu Santuta kachamur mushuq kawayta qomashkansi. 6Espíritu Santuta sayno kachamush salvamaqninsi Jesucristo noqansi rayku wanush kaptinmi. 7Jusayuq kashqapis dembaldilami perdonamashkansi herenciansita chaskir paypa nawpancho imayyaqpis kawanansipaq.
8Kay nishqäkuna lapanpis rasun kaqla kaptin wawqi panikunata mana qelanaypa yachasinki. Sayno yachasiptikimi tantiyakuyanqa Tayta Dios munashqanno imaypis alikunata rurayänanpaq. Kay yachasishqäkuna lapan runakunapaq alimi kaykan.
9Wakin runakunaqa unay ayllunkuna pï kayashqanpita y Israel runakunapa costumbrinkunalapitami apänakuyan. Saykunapita piwanpis ama apänakuysu. Apänakushqayki manakaqlapaqmi kanqa.
10Say apänakasiqkunataqa ishkay kutiyaqla tantiyasinki. Sayno tantiyasiptikipis mana cäsuyäshuptikiqa qarqurinki.#Mat. 18.15-17; 2Tes. 3.14. 11Musyashqaykinöpis say runakunaqa jusalikuylacho kawarmi Tayta Diosta wiyakuyansu. Sayno kayashqanpitami Tayta Dios castiganqa.
Carta ushanan
12Noqa yarpaykä wawqinsi Artemasta karpis o Tíquicuta#Hech. 20.4; Efe. 6.21-22; Col. 4.7-8; 2Tim. 4.12. karpis qam kaqman kachamuytami. Mayqanpis chämuptinqa Nicópolisman jukla shamunki saycho tinkunansipaq. Tamya killa päsashqanyaq saycho taytami yarpaykä. 13Abogädu Zenaswan Apolos#Hech. 18.24; 1Cor. 16.12. viäjita yarquyänanpaq kamarikuyaptin ima nistäyashqantapis lapayki kamaripäyanki. 14Sayno yanaparmi wawqi panikuna yachakuyanqa wakin kaqtapis yanapäyänanpaq. Sayno rurarqa Tayta Dios munashqannömi kawayanqa.
15Kaycho kaykaq wawqi panikuna lapanmi salüdunta apasikayämun. Saynöla noqapa salüdütapis wawqi panikunata qoykulanki. Lapaykipis ali kawayänaykipaq Tayta Dios kuyapäyäshushpayki yanapaykuyäläshunki. [Amén.]
Currently Selected:
Tito 3: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.