Marcos 1
1
Bautizaq Juan wilakushqan
Mateo 3.1-12; Lucas 3.1-9, 15-17; Juan 1.19-28
1Tayta Diospa Surin Jesucristupa ali wilakuyninta wilakur qalaykunanpaqmi 2profëta Isaías kayno qelqarqan:
<<Nänita pisaq japuy runakunata kamarikasinanpaqmi wilakuqnïta puntaykita kachashaq.#Mal. 3.1.
3Paymi sunyaq jirkacho qayakuypa wilakur ninqa:
<Tayta Dios shamunanpaq nänita alsayay.
Wenqu nänikunata derechayay> >>.#Isa. 40.3.
4Isaías qelqashqannölami sunyaq jirkacho Juan bautizar runakunata nirqan: <<Tayta Dios perdonayäshunaykipaq jusalikuykunata wanakur bautizakuyay>>.
5Juan wilakushqanta wiyaqmi Judea provinciapita y Jerusalénpita lapan runakuna aywayarqan. Tayta Diosta perdonta manakuyaptinmi Jordán mayucho say runakunata Juan bautizarqan.
6Juanpa mödanan karqan camëllupa aqsanpita awashqami. Wachkunpis karqan camëllu qarapita rurashqami.#2Rey. 1.8. Chukluskunata y abëjapa mishkintami mikurqan.
7Wilakurmi nirqan: <<Qepäta shamuq kaqqa noqapita mas munayyuqmi kaykan. Paypa lanqi watunta paskapänaläpaqpis manami merëcïsu. 8Noqaqa yakulawanmi bautizä. Paymi isanqa Espíritu Santuwan bautizayäshunki>>.
Jesústa Juan bautizashqan
Mateo 3.13-17; Lucas 3.21-22
9Say wisanmi Galileacho kaykaq Nazaretpita Juan bautizaykashqan kaqman Jesús aywarqan. Chaykuptinmi paytapis Jordán mayucho Juan bautizarqan. 10Yakupita sharkurkurmi Jesús rikarqan jana pasa kichakaskamuptin Espíritu Santu imayka palumano payman uraykämuqta. 11Say hörami jana pasapita Tayta Dios nimurqan: <<Qammi kuyay surï kanki. Qampitami kushish kaykä>>.#Sal. 2.7; Isa. 42.1; Mat. 3.17; 12.18; Mar. 9.7; Luc. 3.22.
Jesústa Satanás tentayta munashqan
Mateo 4.1-11; Lucas 4.1-13
12Saypitanami Jesústa Espíritu Santu sunyaq jirkaman pusharqan. 13Chusku chunka (40) junaq munti uywakuna kaykäyashqancho kaykaptinmi Satanás tentarqan. Angilkunami Jesústa yanapäyarqan.
Galileacho ali wilakuyta wilakur Jesús qalaykushqan
Mateo 4.12-17; Lucas 4.14-15
14Juan carcilcho wichqaraykaptinnami Galileaman Jesús kutirqan. Saychömi Tayta Dios mandaykashqanpa ali wilakuyninta wilakur 15kayno nirqan: <<¡Promitishqankunata Tayta Dios cumplishnami! ¡Tayta Dios mandaykashqan chämushnami! ¡Jusalikuyta wanakur Tayta Diospa ali wilakuyninta chaskikuyay!>>
Discïpulun kayänanpaq pescaqkunata Jesús qayashqan
Mateo 4.18-22; Lucas 5.1-11
16Galilea qocha kuchunpa aywaykashqanchömi Simónta y wawqin Andrésta Jesús rikarqan. Paykuna pescaq karmi redninta yakuman mashtaykäyarqan. 17Paykunatami Jesús nirqan: <<Qatiräyämay. Noqami yachasiyäshayki runakunatana pescayänaykipaq>>.
18Sayno niptinmi redninkunata kachariykuyashpan Jesúswan aywayarqan.
19Saypita mas washaläta aywaykäyashqanchönami rikarqan Zebedeupa surin Santiagutawan wawqin Juanta. Paykunami büquincho redninkunata shilpaykäyarqan. 20Paykunatapis qayaptinmi jukla aywayarqan taytan Zebedeuta y minkayninkunata büquicho kachaykur.
Supay löcuyäsishqan runata Jesús kachakäsishqan
Lucas 4.31-37
21Saypitanami Capernaúm markaman discïpulunkunawan Jesús aywayarqan. Jamay junaqnami sinagögaman yaykur yachasir qalaykurqan. 22Yachasiptinmi runakuna fiyupa admirakuyarqan. Manami ley yachasiq runakunanösu yachasirqan, sinöqa munayyuq karmi shumaq yachasirqan.
23Say sinagögachömi kaykarqan supay löcuyäsishqan runa. Paymi qayarar 24nirqan: <<[¡Waauuu!] ¡Nazaretpita kaq Jesús! ¿Imatataq noqakunawan munanki? ¿Ushakäsiyämänaykipaqku shamushkanki? ¡Noqa musyämi Tayta Dios kachamushqan santu runa kashqaykita!>>
25Sayno qayaraptinmi supayta olqutupar Jesús nirqan: <<¡Upälala kay runapita yarquy!>>
26Sayno niptinmi say runata chapiriykur supay fiyupa qaparar aywakurqan. 27Sayta rikaykurmi admirakuyashpan jukninpis jukninpis niyarqan: <<¡Imatanataq rikansi! ¡Munayninwan niptin supaykunapis cäsukurmi aywakuyan! ¡Pay yachasishqannöqa manami pipis yachasinsu!>>
28Supayta qarqushqanta musyarmi intëru Galileacho Jesús munayyuq kashqanta parlayaq.
Pedrupa suedranta Jesús aliyäsishqan
Mateo 8.14-15; Lucas 4.38-39
29 Sinagögapita Jesús yarqurnami Santiaguta y Juanta pushakurkur Simónpa y Andréspa wayinman aywayarqan. 30Chaykuyaptinmi Simónpa suedran fiebriwan ansa jitaraykashqanta wilayarqan. 31Saymi qeshyaykashqan kaqman Jesús yaykurir makipita sharkasiptin jinan höra aliyarqan. Aliyarkurnami mikuyta paykunata qararqan.
Aska qeshyaqkunata Jesús aliyäsishqan
Mateo 8.16-17; Lucas 4.40-41
32Pasa sakaykaptinnami lapan qeshyaykaqkunata y supaykuna nakasiyashqan runakunatapis Jesúsman apayämurqan. 33Say markacho lapan runakunami Jesús kaykashqan wayi punkuman shuntakäyarqan. 34Saychömi tukuyläya qeshyawan qeshyaykaqkunata Jesús aliyäsirqan. Saynölami aska runakunapita supaykunatapis qarqurqan. Pï kashqantapis supaykuna musyayaptinmi Jesús olqutuparqan mana parlakuyänanpaq.
Galileacho wilakur Jesús purishqan
Lucas 4.42-44
35Warayninnami Tayta Diosta manakunanpaq saka sakala sunyaqman Jesús aywakurqan. 36Saymi Jesústa watukayashpan Simón y paywan kaykaqkuna ashir aywayarqan. 37Tarirkurnami niyarqan: <<Lapanmi ashiykäyäshunki, taytay>>.
38Saymi Jesús nirqan: <<Tayta Diospa wilakuyninta wilakuq wakin markakunapapis aywashun. Saypaqmi shamushkä>>.
39Saymi intëru Galileapa Jesús purirqan sinagögakunacho wilakushpan y supaykunata runakunapita qarqushpan.#Mat. 4.23; 9.35.
Leprawan qeshyaykaqta Jesús aliyäsishqan
Lucas 5.12-16
40Juk kutichömi leprawan qeshyaykaq runa Jesúspa puntanman qonqurpakuykur nirqan: <<Taytay, voluntäniki kaptinqa aliyaykasilämay>>.
41Sayno ruwakuptinmi Jesús kuyapashpan yataykur nirqan: <<Aliyash kanaykita munämi>>.
42Sayno niptinmi jinan höra leprawan qeshyaykashqanpita aliyaskirqan. 43Aywakunanpaq despacharmi Jesús chunkapis nirqan: 44<<Aliyäsishqäta ama pitapis wilapankisu. Saypa trukanqa cüraman ayway aliyashqaykita rikashunaykipaq. Nirkur Moisés qelqashqancho nishqannöla purificakunaykipaq ofrendaykita templuman apay. Saynöpami aliyashqaykita musyayanqa>>.#Lev. 14.1-32.
45Sayno nikaptinpis say runaqa Jesús aliyäsishqanta pïmaytami wilaparqan. Saymi markamanpis Jesús yaykurqansu, saypa trukanqa sunyaq jirkalachömi quëdakurqan. Saymanpis maysaypitami runakuna aywayaq.
Currently Selected:
Marcos 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.