Sofonías 1
1
Tayta Dios castiganan junaq imano kananpaq kashqan
1Kaychömi qelqaraykan Tayta Diospa wilakuyninta Sofonías wilakushqan. Sofonías wilakurqan Amónpa surin Josías Judá nacionpa mandaqnin rey kaykashqan wisanmi.#2Rey. 22.1—23.30; 2Crón. 34.1—35.27. Sofonías karqan Cusipa surinmi. Cusi karqan Gedalíaspa surinmi. Gedalías karqan Amaríaspa surinmi. Amarías karqan Ezequíaspa#2Rey. 18.1—20.12. surinmi.
2 Tayta Diosmi nin:
<<Kay pasacho kaqkunata chipyaqmi ushakäsishaq.
3Runakunatapis uywakunatapis lapantami ushakäsishaq.
Pishqukunatapis lamarcho pescädukunatapis lapantami ushakäsishaq.
Mana cäsukamaq runakunatapis chipyaqmi ushakäsishaq.
Kay pasacho lapan runakunatami ushakäsishaq>>.
Tayta Diosmi sayno nin.
4<<Judá runakunata y Jerusaléncho taqkunata castigashaqmi.
Baalta adoraqkunata y rurasiyashqan ïdulukunatapis lapantami ushakäsishaq.
Baalta sirviq cürakunatapis lapantami ushakäsishaq.
5Wayi jananman wisaykur jana pasacho kaykaq qoyllarkunata qonqurpaykur adoraqkunatapis ushakäsishaqmi.
Qonqurpaykur adoraykämarpis dios Molocta adoraqkunatapis ushakäsishaqmi.#2Rey. 23.4-14.
6Saynölami ushakäsishaq mana cäsukamaqkunata, mana ashimaqkunata y mana ruwakamaqkunatapis>>.
7 Tayta Diospa nawpancho lapayki upälakuyay.#Hab. 2.20; Zac. 2.13.
Juzganan junaq chaykämunnami.
Say junaqpaqqa Tayta Diosmi sacrificiuta kamarish.
Sacrificiuta mikuyänanpaq qayasishqan runakunapis listunami kaykäyan.#1.7 Kay versïculucho Judá runakunatami sacrificiuman tinkusin. Judá runakunapa chikiqninkunatami sacrificiuta mikuyänanpaq qayasishqan runakunaman tinkusin.
8 Tayta Diosmi nin:
<<Say juzganä junaqmi castigashaq nación mandaqkunata, reypa surinkunata y jäpa runakunapa costumbrinta qatirar mana adoramaqkunatapis.
9Say junaqmi ïdulu adoraqkunataqa lapanta castigashaq.
Say runakunaqa adorayashqan ïdulukunapa templunman churayänanpaqmi suwakuypa y asaltaypa imaykatapis shuntayan>>.
10 Tayta Diosmi nin:
<<Say junaqqa chikiqninkuna atacayaptin Pescädu jutiyuq punkupita seqaypa qayaräyashqanmi maysaymanpis wiyakanqa.
Marka kuchun barriucho qayaräyashqanpis wiyakanqami.
Nawpan lömakunacho qaparäyashqanpis fiyupa mansariypaqmi wiyakanqa.
11<<Mactes barriucho taqkuna, lapayki waqayay.
Say junaqmi lapan negociantikuna wanuyanqa.
Rantikuqkunaqa lapanmi ushakäyanqa.
12Say wisanmi lamparinwan aksikurkur Jerusaléncho taqkuna imano kawaykäyashqantapis rikashaq.
Saychömi jusalikur jawkala kaykaq runakunata castigashaq.
Say runakunaqa shonqunkunachömi nikäyan:
<Tayta Diosqa manami castigakunsu.
Payqa manami alitapis ni mana alitapis ruransu>.
13Sayno nikäyaptinmi chikiqninkuna lapan imaykankunatapis apakuyanqa.
Wayinkunatapis juchusirmi ushayanqa.
Täyänanpaq sharkasiyashqan wayikunachöpis manami täyanqasu.
Üvakunata plantarpis vïnunta manami upuyanqasu>>.
14 Tayta Dios juzganan junaq chämunanpaq walkalanami pishiykan.
¡Say junaqpaqqa manami aykäpis kannasu!#Isa. 13.6; Eze. 30.2-3; Joel 1.15; Amós 5.18, 20; Mal. 3.2; Apoc. 6.17.
Say junaq fiyupa mansariypaq kaptinmi ali chölu runakunapis qaparäyanqa.
15Say junaqqa Tayta Dios fiyupami rabyakunqa.
Saymi runakuna fiyupa lakikur ima ruraytapis kamäpakuyanqasu.
Qaparaykarmi ushakäyanqa.
Fiyupa sakaymi kanqa.
Yanawyayparaq pukutarmi mansariypaq sakakurkunqa.
16Say junaqmi altu murallash markakunaman y jatusaq törrikunaman amparakuyaptinpis contran runakuna atacayanqa.
Atacayaptin mansarirmi cornëtata tukayashpan qaparäyanqa.
17Tayta Dios kaynömi nin:
<<Runakunata castigaptïmi lakikuyashpan sakäpakushno puriyanqa.
Sayno kayanqa mana cäsukamaypa jusalikuyashqanpitami.
Yawarninpis pasachömi mashtaranqa.
Ayankunapis uywapa iskannömi mashtaräyanqa>>.
18 Tayta Dios juzganan junaqqa manami qellayninkunapis ni qorinkunapis runakunata salvanqasu.
Paymi fiyupa rabyashpan kay nacionta chipyaq ushakäsinqa.
Elaqpitami kay nacioncho taqkunata lapanta ushakäsinqa.
Currently Selected:
Sofonías 1: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
