Tito 2
2
Shumaq yachasinanpaq Tituta yäsishqan
1Qamqa Jesucristupa wilakuynin nishqannöla wawqi panikunata yachasiy. 2Awkinkunata yachasinki lutanta imatapis mana rurayänanpaq, alilata rurar pïmaypitapis respitash kayänanpaq y shumaq yarpachakuskir imatapis rurayänanpaq. Saynöpis yachasinki Tayta Diosman lapan shonqunwan yärakuyänanpaq, kuyapäkuq kayänanpaq y imachöpis pacienciakuq kayänanpaq.
3Chakwankunatapis yachasinki Tayta Dios munashqannöla shumaq kawayänanpaq, pitapis mana tumpayänanpaq y upyalaman mana churakash kayänanpaq. Saypa trukanqa wakintapis yachasiyäsun ali kawayänanpaq. 4Saynöpis jipash kaq warmikunata yachasiyäsun runanta y wawankunata kuyayänanpaq. 5Saynöpis yachasiyäsun shumaq yarpachakuskir imatapis rurayänanpaq, majanta mana jarukuyänanpaq, wayincho rurayninkunata shumaq rurayänanpaq, kuyapäkuq kayänanpaq y runanta wiyakuyänanpaqpis. Sayno ali kawaqta rikarmi Tayta Diospa palabranta pipis manakaqman churanqasu.
6Saynöla maqtakunatapis#2.6 Wakin runakunaqa mözukunatapis niyanmi. tantiyasinki shumaq yarpachakur alilata rurayänanpaq. 7Rikakuyäshunaykipaq kikikipis ali kaway. Pitapis yachasirqa Tayta Diospa wilakuynin nishlanta formal yachasinki. 8Pipis mana jamurpäshunaykipaq rasun kaqlata yachasinki. Sayno ali yachasiptikiqa contransi kaqkuna penqakur manami washansita rimayanqasu.
9Ashmaykunatapis yachasinki patronninta wiyakuyänanpaq y mandashqantapis ashak ashakla rurayänanpaq. Saynöpis yachasinki shimisapa mana kayänanpaq 10y patronninpa imantapis mana suwapäyänanpaq. Saypa trukanqa patronnin yärakunanpaq alilata rurayäsun. Jesucristuta chaskikuq ashmaykuna sayno kawaqta rikarmi runakuna tantiyakuyanqa salvamaqninsi Tayta Diospa wilakuynin ali kashqanta.
11Lapan runakunata salvananpaqmi Tayta Dios kuyapämashpansi Jesucristuta kachamurqan. 12Paymi tantiyasimansi kikinsi munashqansino kawanansipa trukan jusalikuykunata kacharir pay munashqanno alilata rurar kawanansipaq. 13Sayno kawarmi salvamaqninsi Jesucristo kutimushqanyaq kamarikushla shuyakuykäshun. Paymi lapanpaq munayyuq Diosninsi kar lapan runakuna rikay chipipiykar kutimunqa.#Fil. 3.20. 14Jusalikuypita jorqamänansipaqmi wanurqan.#Mat. 20.28; Mar. 10.45; Gál. 1.4; 1Tim. 2.6. Perdonamashpansimi shuntakamashkansi kuyashqan runakuna kanansipaq y lapan shonqunsiwan imatapis alilata ruranansipaq.#Éxo. 19.5; Deut. 7.6; 14.2; 1Ped. 2.9.
15Wawqi Tito, kay yäsishqäkunata pitapis mana mansapaypa yachasinki, shakyäsinki y tantiyasinki. Pipis manakaqman mana churashunaykipaq shumaq kawanki.
Currently Selected:
Tito 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.