Rut 4
4
Rutwan Booz tashqan
1Saypitanami marka yaykuna punkuman aywaykur Booz jamaraykaptin Rutpa runanpa mas legïtimu kaq ayllun päsaykarqan. Saymi Booz qayar nirqan: <<Shamuy parlanapaq>>.
Niptin say runa aywarmi jamaykurqan. 2Nirkurnami say markacho taq chunka mayor runakunata Booz qayaykasir jamakuyänanpaq nirqan. 3Ayllun runatami Booz nirqan: <<Moab nacionpita kutimuq Noemími runanpa chakranta rantikuyta munaykan. Say chakraqa ayllunsi Elimelecpa kaqmi kaykan. 4Saymi mas legïtimu ayllun kaptiki qamta wilä rantiyta munarqa kay mayor runakunapa nawpancho rantinaykipaq. Mana rantiyta munarqa wilamay noqapis ayllun kaykarqa rantinäpaq>>.
Sayno niptinmi say runa nirqan: <<Rantishaqchir>>.
5Saymi Booz nirqan: <<Noemípa chakranta rantishpaykiqa Moab nacionpita shamuq viüda Rutwanpis tänaykimi. Saynöpami Rutpa wawan yurir wanuq runanpa surinno kanqa say chakrapa duëñun kananpaq>>.
6Saymi say runa nirqan: <<Sayno kaptinqa manami rantïmansu. Rutwan taptïqa say rantinäpaq kaq chakra manami herenciäsu kanqa, sinöqa paypa wawankunalapaqmi. Noqa rantinäpa trukanqa qam rantikurkuy>>.
7Say wisanmi Israel nacioncho pipis ayllunpa chakranta rantiyta mana munarqa lanqinta loqtirir qoykuq chakra rantiyta munaq kaqta. Saynöpami runakuna musyayaq lanqinta chaskiq kaqna chakrata rantinanpaq kashqanta. 8Saymi lanqinta loqtirir Boozta makyashpan nirqan: <<Ayllunsipa chakrantaqa qamna rantikurkuy>>.
9Sayno niptinmi mayor runakunata y saycho kaykaq wakin runakunata Booz nirqan: <<Qamkuna rikaykäyankimi Elimelecpa, Queliónpa y Mahlónpa chakranta Noemípita rantiykashqäta. 10Saynöpis qamkuna musyayankimi Mahlónpa viüdan Rut warmïna kananpaq kashqanta. Saynöpami Rutpa wawanpis Mahlónpa surinnöna kanqa y Mahlónpa chakranpis Rutpa wawanpana kanqa.#Deut. 25.5-6. Nishqäkunata lapaykimi wiyaykäyanki>>.
11Sayno niptinmi mayor runakuna y saycho wakin runakunapis niyarqan: <<Nishqaykita lapantami wiyaykäyä. Tayta Dios bendicionninta Rutman churaykuläsun. Raquelpa y Leapa wawankuna aska kayashqanno paypapis wawankuna aska kaykuläsun. Paykunapita miraqlami lapansipis Israel runakuna kaykansi. Qamtapis Tayta Dios yanapaykuläshunki Efrata nishqan Beléncho pïmaypis respitayäshunaykipaq. 12Saynöpis Tayta Dios bendicionninta qoykuläshunki Tamarcho Judápa surin Farespita#Gén. 38.27-30. miraqkuna aska kayashqanno qampapis surikikuna Rutcho aska kayänanpaq>>.
13Saynöpami Rutwan Booz tarqan. Tayta Dios bendicionninta churaptinmi Rut qeshyaq rikakur olqu wamrata qeshyakurqan. 14Saymi warmikuna Noemíta niyarqan: <<¡Tayta Dios alabash kaykuläsun! Paymi munash Rutpa wawan kananta. Say wawan wilkaykino kar Israel nacionninsicho shumaq respitash kaykuläsun. 15Chakwanyaptikipis say wilkaykimi yanapäshunki y ashmashunki. Kuyashuqniki lumsuynikipa wawan karmi qanchis olqu wawaykikunapitapis mas ali rikashunki>>.
16Noemínami wilkanta selläma kuyar ashmarqan. 17Saymi Noemípa vecïnankuna niyarqan: <<¡Wamran aparishqami Noemí puriykan!>>
Say wamratami jutisish Obed jutin kananpaq. Obedmi Isaípa#4.17 Wakin traduccionkunachöqa Jesépa niyanmi. taytan karqan. Isaínami Davidpa taytan karqan.
Davidpa unay ayllunkuna
18Kaykunami Farespita Davidyaq miraqkuna kayarqan:
Farespa surinmi karqan Hezrón.
19Hezrónpa surinmi karqan Ram.
Rampa surinmi karqan Aminadab.
20Aminadabpa surinmi karqan Naasón.
Naasónpa surinmi karqan Salmón.
21Salmónpa surinmi karqan Booz.
Boozpa surinmi karqan Obed.
22Obedpa surinmi karqan Isaí.
Isaípa surinnami karqan David.#1Crón. 2.5-15; Mat. 1.3-6.
Currently Selected:
Rut 4: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.