Romanos 16
16
Pablo salüdunta apasishqan
1Paninsi Febimi watukayäshuqniki shamunqa. Pay kaykan Cencrea iglesiacho diacunïsami. 2Paymi yärakuq mayinsikunata shumaq yanapan. Saynölami noqatapis wilakur puriptï yanapäman. Jesucristuman yärakuq mayinsi kaykaptinqa chaskiykuyälanki. Saynöpis lapan nistashqankunata kamaripaykuyälanki.
3Priscilatawan Aquilata salüdü qoykuyälanki. Paykunami Jesucristupa wilakuyninta wilakur puriptï ali yanapäyämash.#Hech. 18.2. 4Paykunami wanuytapis mana mansaypa yanapäyämash. Sayno yanapäyämashqanpitami noqapis y lapan mana Israel wawqi panikunapis agradëcikuyä. 5Wayincho shuntakaq yärakuq mayinsikunatapis salüdüta qoykuyälanki.
Saynöpis salüdüta qoykuyälanki kuyanakuyashqä Epenetuta. Paymi Asia provinciacho lapanpita mas puntata Jesucristuta chaskikush. 6Paninsi Maríatapis salüdüta qoykuyälanki. Paymi qamkunata ali yanapäyäshushkanki. 7Saynöpis salüdüta qoykuyälanki Israel mayïkuna Andrónicuta y Juniastapis. Paykunawanmi carcilcho wichqaräyarqä. Paykunami noqapita mas puntata Jesucristuta chaskikuyash. Lapan apóstol mayïkunapis paykunata kuyayanmi.
8Saynöpis salüdüta qoykuyälanki kuyanakuyashqä Ampliasta, 9wilakuq mayï Urbanuta y kuyanakuyashqä Estaquista. 10Saynöla salüdüta qoykuyälanki Apelesta. Jesucristupa ali sirviqnin kaptinmi payta lapan yärakuq mayinsikuna respitayan. Saynöpis salüdüta qoykuyälanki Aristóbulupa ayllunkunata, 11Israel mayï Herodiónta y Narcisupa aylluncho Jesucristuman yärakuqkunata. 12Saynöla salüdüta qoykuyälanki Trifenatawan Trifosata. Say warmikunami Jesucristupa wilakuyninta wilakuqkunata ali yanapaykäyan. Saynöla salüdüta qoykuyälanki paninsi Pérsidata. Paypis Jesucristupa wilakuyninta wilakuqkunata alimi yanapaykan. 13Saynöla salüdüta qoykuyälanki kuyay wawqinsi Rufuta#Mar. 15.21. y mamantapis. Payqa mamänömi ali rikamash. 14Saynöla salüdüta qoykuyälanki Asíncrituta, Flegontita, Hermesta, Patrobasta, Hermasta y paykunawan shuntakaq wawqi panikunatapis. 15Saynöla salüdüta qoykuyälanki Filóloguta, Juliata, Nereuta, Nereupa paninta, Olimpasta y paykunawan shuntakaq wawqi panikunatapis.
16Jukniki juknikipis qaqlaykikunacho musanakushpayki winchinakuyay. Purishqä kinraycho kaykaq wawqi panikunapis qamkunapaq salüdunta apasikayämunmi.
17Wawqi panikuna, pipis chikinakuyänaykipaq o Jesucristupa wilakuyninta mana cäsupäyänaykipaq shimita qoyäshuptiki ama chaskipäyaysu. Shimita qoqkunaqa lutantami yachasiyäshunki. Sayno kaqkunapitaqa witikuyanki. 18Paykuna manami Jesucristo alabash kananta munarsu yachasiyan, sinöqa kikinkuna alabash kayta munalarmi. Paykunaqa ali shimilanpami mana tantiyakuq wawqi panikunata lutanta criyiykäsiyan.
19Tayta Diosta cäsukuyashqaykitaqa maysaychöpis yärakuq mayinsikuna musyayanmi. Sayno kayashqaykita musyar noqapis kushikümi. Noqa munä mana jusalikuypa alilata rurar imaypis kawayänaykitami.#Mat. 10.16. 20Ali kawayta qomaqninsi Tayta Dios yanapaykuyäläshunki Satanásta manakaqman churayänaykipaq. Señorninsi Jesucristo kuyapäyäshushpayki imaypis yanapaykuyäläshunki.
21Yanapämaq wawqinsi Timoteupis#Hech. 16.1. qamkunapaq salüdunta apasikamunmi. Saynölami Israel mayïkuna Lucio, Jasón y Sosípaterpis salüdunta qamkunapaq apasikayämun.
22(Noqa Terciupis Señorninsipa jutincho salüdüta qamkunapaq apasikamü. Apóstol Pablo dictamashqannölami kay cartata qelqaykämü.)
23Saynölami Gayupis#Hech. 19.29; 1Cor. 1.14. salüdunta apasikamun. Paymi wayinta puestupämash posädakunäpaq y yärakuq mayinsikunawan saycho shuntakäyänäpaq. Saynölami kay markapa tesorërun Erastupis#2Tim. 4.20. y wawqinsi Cuartupis qamkunapaq salüdunta apasikayämun. 24[Señorninsi Jesucristo kuyapäyäshushpayki imaypis yanapaykuyäläshunki. Amén.]
Carta ushanan
25¡Tayta Diosta alabaykuyay! Paymi Jesucristupa wilakuyninta wilakushqänöla yanapaykäyäshunki payman yärakur munashqanno kawayänaykipaq. Say wilakuytaqa runakuna nawpata manami musyayarqansu. 26Kananmi isanqa profëtakuna qelqayashqannöla y imayyaqpis kawaq Tayta Dios nishqannöla wilakuyninta maysay nacionkunachöpis wilakuykäyan. Sayno wilakuykäyan pïmaypis Jesucristuman yärakur Tayta Dios munashqanno kawayänanpaqmi.
27¡Jesucristupa jutincho Tayta Diosta imaypis alabaykuläshun! ¡Pay japalanmi Dios kaykan! ¡Manami pipis payno yachaq kansu! Amén.
Currently Selected:
Romanos 16: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.