Romanos 15
15
Jesucristuta chaskikuq mayinsiwan ali kawanansipaq nishqan
1Yärakuq mayinsi shumaq mana tantiyar imalapis jusa kashqanta yarpaptinqa sayta ama rurashunsu. Kikinsi munashqansita ruranansipa trukanqa 2imatapis rurashun yärakuq mayinsi Tayta Dios munashqanno kawayänanpaq. 3Jesucristupis manami kikin munashqantasu imatapis rurarqan. Tayta Diospa palabranchöpis kaynömi qelqaraykan: <<Qamta manakaqman churashushpaykiqa noqatami manakaqman churaykäyäman>>.#Sal. 69.9.
4Tayta Diospa palabranqa tantiyasimänansipaqmi kaykan. Palabranta yachakurmi payman yärakur promitishqankunata cumplinanpaq kashqanta musyansi. 5Mana ajayaypa y mana lakikuypa yärakunansipaqmi Tayta Dios imaypis yanapaykämansi. Saymi payta manakü Jesucristo kuyamashqansino jukniki juknikipis kuyanakur kawayänaykipaq. 6Kuyanakur kawayashpaykimi Señor Jesucristupa Papänin Tayta Diosta say yarpayla alabaykäyanki.
Mana Israel runakunapaqpis Diospa ali wilakuynin kashqan
7Sayno kaykaptinqa Jesucristo kuyamashqansino yärakuq mayinsikunawan kuyanakushun. Sayno kawashqami Tayta Diosta alabayanqa. 8Kayta yarpäsishayki: Israel runakunata salvananpaqmi Jesucristo shamurqan. Saynöpami Abrahamta, Isaacta y Jacobta promitishqanta Tayta Dios cumplirqan. 9Saynöpis Jesucristo shamurqan mana Israel runakunapis kuyapäkuq kashqanpita Tayta Diosta alabayänanpaqmi. Tayta Diospa palabranchöpis kaynömi qelqaraykan:
<<May nacioncho karpis adorashaykimi.
Lapan shonqüwan cantarmi alabashayki>>.#2Sam. 22.50; Sal. 18.49.
10Saynölami kaynöpis qelqaraykan:
<<Maysay nacioncho taqkuna,
Tayta Dios kuyashqan runakunawan juntu kushikuyay>>.#Deut. 32.43.
11Maspis kayno nirmi qelqaraykan:
<<Maysay nacioncho taqkuna,
Tayta Diosta alabashun.
Maysaycho tarpis payta adorashun>>.#Sal. 117.1.
12Profëta Isaías qelqashqanchöpis nikan:
<<Isaípita miraqpitami juk runa yurinqa.
Maysay nacioncho taq runakunata mandananpaqmi shamunqa.
Mana Israel runakunapis paymanmi yärakuyanqa>>.#Isa. 11.10.
13Tayta Dios yanapaykuyäläshunki payman yärakur jukniki juknikipis ali kawayänaykipaq, Espíritu Santupa makincho kawayänaykipaq y nawpanman chäyänaykipaq kashqanta musyar waran waran kushish kawayänaykipaqpis.
Maysaypapis Pablo wilakur purishqan
14Wawqi panikuna, musyämi ali shonqu kayashqaykita, Tayta Diospa wilakuyninta yachakuyashqaykita y wakintapis tantiyasiyänaykipaq yachaq kayashqaykita. 15Sayno kayaptikipis kay cartawan qamkunata yarpaykäsimü yachakuyashqaykita mana qonqäyänaykipaqmi. Sayno nikä Tayta Dios kuyapämar 16Jesucristupa ali wilakuyninta mana Israel runakunata wilapänäpaq churamash kaptinmi. Saymi wilakuykä mana Israel runakunapis Espíritu Santu yanapaptin Tayta Diospa shonqunpaq sacrificiuno kayänanpaq.
17Wilakunäpaq Jesucristo yanapämaptinmi kushikü. 18Saymi alabakunäpa trukanqa pay yanapämashlanta maysaychöpis parlashaq. Yanapämaptinmi wilakuyninta wilakuykä y runakuna rikakuyänanpaq shumaq kawaykä. Saymi mana Israel runakunapis Tayta Diosta cäsukuykäyan. 19Espíritu Santupa munayninwan milagrukunata rurarmi Jerusalénpita qalaykur hasta Ilírico provinciayaq Jesucristupa wilakuyninta chäsishkä.
20Wilakur purirpis wakinkuna mayna wilakuyashqan markakunaman manami jatikayta munäsu. Saymi pipis manaraq wilakushqan markakunacho Jesucristupa wilakuyninta wilakuykä. 21Tayta Diospa palabranchöpis kaynömi qelqaraykan:
<<Pipis mana wilapashqantami musyayanqa.
Imaypis mana wiyayashqantami wiyayanqa>>.#Isa. 52.15.
Romaman Pablo aywayta yarpashqan
22Maysaypapis wilakur purirmi qamkuna kaqman shamuyta kamäpakushkäraqsu.#Rom. 1.13. 23Kananqa kay puriykashqä markakunacho Jesucristupa wilakuyninta wilakushkänami. Nawpapita pasa yarpashqänölami qamkunata watukaskir 24Españapa aywayta yarpaykä. Sayman aywanäpaq imalawanpis yanapaykayälämanki.
25Kananqa Jerusalénparaqmi aywaykä yärakuq mayinsikunapaq shuntayashqan ofrendata apar. 26Macedonia y Acaya provinciakunacho yärakuq mayinsikunami say ofrendata shuntayash Jerusaléncho kaykaq muchuq wawqi panikunapaq.#1Cor. 16.1-4. 27Ofrendata shuntar alitami rurayash. Paykunapis Jesucristupa wilakuyninta Jerusalénpita qalaykur wilapäyaptinmi chaskikuyash. Wilapäyashqanpita kushikuyashpanmi ofrendata shuntayash Jerusaléncho kaykaq muchuq wawqi panikunaman apanäpaq.#1Cor. 9.11. 28Kay ofrendata Jerusaléncho wawqi panikunata entregaykurnami Españapa aywaqnöla qamkunatapis watukayäshayki. 29Qamkuna kaqman chämuptïmi Jesucristo yanapämäshun shakyäsinakur kushikunansipaq.
30Wawqi panikuna, Señor Jesucristupa jutincho y kuyamaqninsi Espíritu Santupa jutinchömi ruwakü lapan shonquykikunawan Tayta Diosta noqapaq manakuyänaykipaq. 31Sayno manakuyay Judea provinciaman chaptï mana wiyakuq runakunapita Tayta Dios sapaykamänanpaq. Saynöpis manakuyay apashqä ofrendata Jerusaléncho wawqi panikuna kushish chaskikuyänanpaq. 32Jerusaléncho lapanpis ali kananpaq Tayta Dios yanapämaptinqa qamkuna kaqman chämuptï kushishqami qoyäshun.
33Lapaykitapis Tayta Dios ali kawayänaykipaq yanapaykuyäläshunki. Amén.
Currently Selected:
Romanos 15: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.