Romanos 12
12
Tayta Diosta sirvinansipaq churamashqansi
1Wawqi panikuna, qamkunatami ruwä Tayta Diospa makinman kawaynikita churaykuyänaykipaq. Pay kuyapaykäyäshuptikiqa kawaykaq santu sacrificiu kaykuyälay. Sayno karmi Tayta Dios munashqanno rasunpaypa sirviyanki. 2Wakin runakuna jusalikuyaptinpis qamkunaqa ama jusalikuyaysu. Yarpaynikikunapis nawpata kashqannöqa ama kasunsu, sinöqa Tayta Dios munashqannöna kasun. Sayno kawarmi tantiyayanki pay munashqanno kawayqa maypis kushikuypaq kashqanta.
3Kuyapämarmi Tayta Dios wilakuqnin kanäpaq churamash. Saymi lapaykita nï: Ama yarpäyaysu wakin kaqpita mas väliq kayashqaykita. Payman yärakunansipaq Tayta Dios yanapaykämaptinsiqa lapansipis välishqansita tantiyakushun. 4Cuerpunsicho aska partinsikuna karpis juk cuerpulachömi kaykan. Sayno karpis manami say ruraylatasu rurayan. 5Saynölami Jesucristuta chaskikuqkuna askaq karpis jukninsi jukninsipis juk cuerpunöla kaykansi.#1Cor. 12.12.
6Sayno kaptinsimi Tayta Dios jukninsi jukninsita churamansi pay munashqanno sirvinansipaq. Profëta kanansipaq churamaptinsiqa payman yärakur wilakuyninta wilakushun. 7Yanapänansipaq churamaptinsiqa yanapäshun. Yachasinansipaq churamaptinsiqa yachasishun. 8Shakyäsinansipaq churamaptinsiqa shakyäsishun. Imatapis qaranansipaq churamaptinsiqa ali shonqunsiwan qarashun. Mandanansipaq churamaptinsiqa shumaq yarpachakuykur mandashun. Kuyapäkuq kanansipaq churamaptinsiqa kushishla pitapis yanapäshun.#1Cor. 12.4-11.
Imano kawanansipaqpis yäsishqan
9Janan shonqula kuyanakuyänaykipa trukanqa lapan shonquykiwan kuyanakuyay.
Lutankunata rurayänaykipaqqa ama yarpaylapis yarpäyaysu. Saypa trukanqa alilata rurar kawayay.
10Aylluykiwan kuyanakuyashqaykino kuyanakuyay. Saynöpis jukniki jukniki respitanakuyay. Kikilaykikuna ali kawayänaykipaq yarpachakuyänaykipa trukanqa wakinkunapis ali kawayänanpaq yarpachakuyay.
11Ama qela kayaysu, saypa trukanqa kushi kushila Tayta Diosta sirviyay.
12Tayta Diosta shuyakur kushi kushila kawakuyay.
Imano nakarpis payman yärakuyay.
Imaypis payta manakuyay.
13Jesucristuman yärakuq mayiki muchuycho kaqta rikarqa yanapäyay. Wayikiman chäyämuptinpis posädasiyay.#Heb. 13.2; 1Ped. 4.9.
14Chikishuqnikipa washanta ama rimayaysu. Saypa trukanqa Tayta Diosta manakuyay yanapänanpaq.#Mat. 5.44; Luc. 6.28.
15Kushish kaqkunawan kushikuyay. Waqaqkunawan waqayay.
16Jukniki juknikipis ali kawayay. Runa tukuyänaykipa trukanqa humildi kaqkunawanpis kuyanakur kawayay. Ama yachaq tukuyaysu.#Prov. 3.7.
17Chikiyäshuptikipis ama chikiyaysu. Saypa trukanqa pïmaypis rikakunanpaq alilata rurar kawayay. 18Imaykanöpapis lapan runakunawan ali kawayta tïrayay.
19Kuyay wawqi panikuna, chikiyäshuqnikikunapa contran ama venganzata ashiyaysu. Saypa trukanqa Tayta Dios juzgananpaq paypa makinman churaykuyay. Tayta Diospa palabranchöpis kaynömi qelqaraykan: <<Lutanta rurayashqanpita kikïmi juzgashaq>>.#Deut. 32.35.
20Mastapis kaynömi nikan:
<<Chikishuqniki mikanaptinqa mikuyta qaraykuy.
Yakunaptinqa yakuta makyaykuy.
Sayno ruraptikiqa pasaypa penqakunqa>>.#Prov. 25.21-22.
21Runakuna lutanta rurayaptinpis qamkunaqa alilata rurayay.
Currently Selected:
Romanos 12: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
