Romanos 13

Autoridäkunata cäsukunansipaq yäsishqan

1Lapan autoridäkunata Tayta Dios churash kaykaptinqa paykunata cäsukuyay. 2Autoridäkunata mana cäsukurqa Tayta Diostapis manami cäsukuyansu. Autoridäkunata mana cäsukuq kaqtaqa Tayta Diosmi juzganqa.

3Autoridäkunata cäsukuqkunaqa manami mansa mansalasu puriyan. Mana cäsukuqkunami isanqa mansayan. Sayno mana puriyänaykipaq autoridäkunata cäsukuyay. Cäsukuyaptikiqa paykuna alimi rikayäshunki.

4Lutanta rurashqaqa autoridäkuna castigamäshunmi. Paykunataqa Tayta Dios churash ali ruraqkunapa favornin sharkuyänanpaq y lutan ruraqkunata castigayänanpaqmi. Manami manakaqlapaqsu autoridä kaykäyan. 5Sayno kaykaptinqa autoridäkuna nishqankunata cäsukushun. Manami castigamänansipaq kaptilansu cäsukushun, saypa trukanqa Tayta Diosta respitarmi.

6Runakunata shumaq rikarqa Tayta Diostami autoridäkuna sirviykäyan. Paykunata Tayta Dios churash kaykaptinqa impuestukunatapis pägashun. 7Cumpliyänaykipaq kaqkunata lapanta cumpliyay. Impuestuta pägayänayki kaptinqa pägayay. Pitapis respitayänayki kaptinqa respitayay. Pitapis alabayänayki kaptinqa alabayay.#Mat. 22.21; Mar. 12.17; Luc. 20.25.

Kuyanakunansipaq nishqan

8Pipapis jaqan karqa pägayay. Jaqa kaynikita pägayänaykipaq yarpachakuyashqaykinöla kuyanakuyänaykipaqpis yarpachakuyay. Runa mayinsita kuyarqa Tayta Diospa lapan leyninkunatami cumpliykansi. 9Say leykunacho kayno nirmi qelqaraykan:

<<Majaykita ama jarukunkisu.#Éxo. 20.14; Deut. 5.18.

Runa mayikita ama wanusinkisu.#Éxo. 20.13; Deut. 5.17.

Ama suwakunkisu.#Éxo. 20.15; Deut. 5.19.

[Manakaqta pitapis ama tumpankisu.]#Éxo. 20.16; Deut. 5.20.

Runa mayikipa imaykankunatapis ama munapankisu>>.#Éxo. 20.17; Deut. 5.21.

<<Kikiki kuyakushqaykino runa mayikita kuyanki>> nishqan mandamientuta cumplirqa lapan mandamientukunatami cumpliykansi.#Lev. 19.18. 10Runa mayinsita kuyarqa manami contran sharkunsisu. Saynöpami Tayta Diospa lapan leyninkunata cumpliykansi.

Jusalikuykunata kacharinansipaq nishqan

11Jesucristo kutimur salvamänansipaq kaq junaq cercachönami kaykan. Sayno kaykaptinqa punukashno kashqansipita rikchashun. 12Pasa waränanpaqnöna kaykaptinqa jusalikuykunata kacharir Tayta Dios munashqannöna kawanansipaq shumaq yarpachakushun. Sakäpakushno kawanansipa trukanqa aksichönöna kawashun. Espädan kamarikush soldädu kaykaqno noqansipis kaykäshun.

13Aksichöno kawaykarqa mana jusalikuypana kawashun. Wakin runakuna shuntakaykur mikur upyar kakuyaptinpis noqansiqa ama sayno kashunsu. Saynöpis majansita ama jarukushunsu ni majaynaq karpis jukwan jukwan kakushunsu. Ama qayapänakushunsu ni chikinakushunsu. 14Saypa trukanqa qanra mödanata loqtikur kachariyashqaykino jusalikuykunata kacharir Jesucristupa makincho kawayay. Lutanta rurayta munarpis ama rurayaysu.

Currently Selected:

Romanos 13: qvhB

Highlight

Copy

Compare