Números 8
8
Candelabruman mechërukunata imano churananpaqpis tantiyasishqan
1Saypitami Moisésta Tayta Dios nirqan: 2<<Aarónta niy: <Qanchis mechërukunata candelabruman churay puntanman asikyänanpaq> >>.#8.2 Puntanman asikyarqa qori mësacho kaykaq chunka ishkay tantakunatami asikyaparqan. Sayta musyanaykipaq liyinki Éxo. 40.22, 24.
3Saymi Moisésta Tayta Dios nishqannöla Aarónqa puntanmanpa asikyapänanpaq mechërukunata candelabruman churarqan. 4Say candelabrumi jamakunanpita puntanyaq martilluwan takaylapa qoripita rurash karqan. Tayta Dios rikasishqantanölami say candelabruta Moisés rurasirqan.#Éxo. 25.31-40; 37.17-24.
Tayta Diosta sirviyänanpaq levitakunata churayashqan
5Moiséstami Tayta Dios nirqan: 6<<Wakin Israel runakunapita rakiykur levitakunata purificasinki. 7Purificasinaykipaqqa paykunapa jananman yakuta saqsupanki. Cuerpunkunapita shaprankunata rutukuskir mödanankunata taqshakuyanqa. Saynöpami purificashna kayanqa. 8Nirkurnami apayämunqa juk turïtuta rupasina sacrificiupaq y aceitiwan pichush jarinata saki mikuy ofrendapaq. Saynöla purificasina sacrificiupaqpis juk turïtuta apamuyämunqa.
9<<Levitakunata wilanki Tinkuna Toldu nawpanman shayämunanpaq. Saynöla lapan Israel runakunapis shayämunqa. 10Noqapa nawpäman levitakuna shayämuptin Israel runakunapa mandaqninkuna paykunapa umanman makinta churayanqa. 11Nirkurnami makinta Aarón joqarishpan nawpächo paykunata dedicanqa sirviyämänanpaq. Saynöpami levitakuna Israel runakuna apayämushqan ofrendano kayanqa.
12<<Nirkurnami apayämushqan turïtukunapa umanman makinta levitakuna churayanqa. Juk turïtuta pishtar altarcho rupasinki purificasina sacrificiupaq y jukaq turïtutanami pishtar altarcho rupasinki rupasina sacrificiupaq. Saynöpami levitakuna purificash kayanqa.
13<<Saypitanami paykunata pushanki Aarónpa y surinkunapa nawpanman. Saychömi makikita joqarir levitakunata noqapaq dedicanki. 14Saynöpami Israel runakunapita levitakunata rakinki noqapa kayänanpaq. 15Purificash y dedicash karnami paykuna libri kayanqa Tinkuna Tolducho imapis ruraypaq kaqkunata rurayänanpaq.
16<<Israel runakunapa qechpa olqu surinkunapa trukanmi levitakunata noqapa kayänanpaq akrashkä. 17Egipto runakunapa qechpa olqu surinkunata wanusishqä junaqpitami Israel runakunapa qechpa olqu surinkunapis uywankunapa punta yuriq orqu wawankunapis noqapa kaykan.#Éxo. 13.2, 11-16. 18Saymi levitakuna noqapa kaykäyan Israel runakunapa qechpa olqu surinkunapa trukan. 19Levitakunatami churashkä Israel runakunapa trukan Tinkuna Tolducho Aarónta y surinkunata yanapäyänanpaq. Saynöpami Israel runakunata Tinkuna Tolduman aywayaptin castigashaqsu>>.
20 Tayta Dios nishqannölami Moisés, Aarón y lapan Israel runakuna levitakunata churayarqan Tayta Diosta sirviyänanpaq. 21Saymi levitakuna purificakur armakuyarqan y mödanankunatapis taqshakuyarqan. Saypitanami makinta joqarir Tayta Diospaq paykunata Aarón dedicarqan. Nirkurnami purificasina sacrificiuta rupasirqan purificash kayänanpaq. 22Sayno dedicarkuptinnami levitakuna Aarónta y surinkunata Tinkuna Toldu patiucho yanapayta qalaykuyarqan. Moisésta Tayta Dios nishqannölami levitakunata dedicar lapanta rurarqan.
Sagrädu Tolducho levitakuna ayka wata sirviyänanpaqpis tantiyasishqan
23Saypitami Moisésta Tayta Dios nirqan: 24<<Levitakuna Tinkuna Toldu patiucho yanapar qalaykuyanqa ishkay chunka pisqa (25) watayuqpitaraqmi. 25Pisqa chunka (50) watayuq karnaqa jubilakuyanqanami. 26Jubilakurpis tiempun kashqan höra levita mayinkunata Tinkuna Tolducho yanapäyanqa. Isanqa nawpata sirviyashqannöqa mananami sirviyanqanasu. Sayno kayänanpaq levitakunata niy>>.
Currently Selected:
Números 8: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
