Números 35
35
Levitakuna täyänanpaq markakuna
1Jericó simpan Jordán mayu kaqlä Moab pampacho Israel runakuna kaykäyaptinmi Moisésta Tayta Dios nirqan: 2<<Israel runakunata niy: <Chaskiyänaykipaq kaq markakunacho levitakunapis täyänanpaq wakin markakunata rikasiyanki. Say rikasiyashqayki markakunapa nawpancho kaykaq chakrankunapis uywankunata misikuyänanpaqmi kanqa. 3Saynöpami levitakuna täyänanpaq markankuna kanqa y uywankunata misikuyänanpaq chakrakunapis kanqa. 4Uywakunata misikuyänan chakrakuna kanqa markapa murällanpita chusku pachak pisqa chunka (450) metrumi. 5Say chakrakuna chuskun lädunpa iwalmi kanqa. Inti jeqamunan kaqläpapis, inti jeqanan kaqläpapis, norti kaqläpapis, sur kaqläpapis esqun pachak (900) metru largumi kanqa. Saymi say marka kanqa uywa misikuna chakrakuna chawpincho.
6<< <Levitakunata aypuyashqayki markakunapita soqta markakuna kayanqa runakuna say markakunaman amparakuyänanpaq. Say soqta markakunamanmi mana yarpaypa runa mayinta wanusiqkuna amparakuyanqa. Say markakunapita chusku chunka ishkay (42) markakuna masta levitakunata entregayanki. 7Saymi levitakunata aypuyashqayki markakuna kayanqa uywakunata misikuyänan chakrayuq chusku chunka puwaq (48) markakuna. 8Juk trïbu aska markayuq karqa mas aska markakunatami levitakunata aypunqa. Walkala markayuq karqa walkalatami aypunqa> >>.#Jos. 21.1-42.
Amparakuyänanpaq markakunata akrayänanpaq tantiyasishqan
Deuteronomio 19.1-13; Josué 20.1-9
9Moiséstami Tayta Dios nirqan: 10<<Israel runakunata niy: <Jordán mayuta simpar Canaánman chäyashpayki 11markakunata akrayanki runakuna amparakuyänanpaq.#Jos. 20.1-9. Say markakunamanmi mana yarpaypa runa mayinta wanusiq runakuna qeshpir amparakuyanqa. 12Saymanmi qeshpinqa wanuq runapa ayllunkuna venganzata ashir mana wanusiyänanpaq. Saynöpami wanusiq runa salvakunqa marka mayinkuna juzgayashqanyaq.
13<< <Say amparakuyänan markakuna soqtami kayanqa sayman qeshpiyänanpaq. 14Kimsa kaq markakuna kayanqa Jordán mayu simpan inti jeqamunan kaqlächo y kimsa kaqkunanami kayanqa Canaánlächo. 15Saynöpami Israel runa karpis o jäpa runa karpis mana yarpaypa runa mayinta wanusiptin soqta markakuna kayanqa mayqanmanpis qeshpirkur amparakunanpaq.
16<< <Pipis fiërru herramientawan runa mayinta wanusiptinqa kikintapis wanusiyanki.
17<< <Pipis rumiwan samqaypa runa mayinta wanusiptinqa kikintapis wanusiyanki.
18<< <Pipis qeruwan wiruypa runa mayinta wanusiptinqa kikintapis wanusiyanki. 19Wanusikuq runataqa wanuq runapa legïtimu ayllunmi maychöpis tarishqancho wanusinqa.
20<< <Pipis chikishpan runa mayinta tanqaypa o imawanpis samqaypa 21o maqaykälar wanusiptinqa kikintapis wanusiyanki. Wanusikuq runataqa wanuq runapa legïtimu ayllunmi maychöpis tinkushqancho wanusinqa.
22<< <Isanqa pitapis mana yarpaypa tanqarishpan, imawanpis mana yarpaypa chäsishpan 23o mana rikaypa rumi kuchpawan wanusiptinqa 24marka mayinkunami shuntakar tantiyakuyanqa wanusikuq runa yarpaypa o mana yarpaypa wanusishqantapis. Sayno tantiyakunanpaq kanan nishqäkunata ama qonqayäsunsu. Saynöpami wanuq runapa ayllunkunapis tantiyakuyanqa yarpaypa wanusishqanta o mana yarpaypa wanusishqantapis.
25<< <Mana yarpaypa wanusishqanta tantiyakurqa marka mayinkunami juzgayashqan markapita kutisiyanqa amparakuyänan markaman. Say markachöna kaykaptinqa wanuqpa ayllun amana wanusinqanasu. Wanusiq runaqa say markalachömi tanqa mandaq cüra wanushqanyaq. Say cüraqa sagrädu aceitita umanman winapashqami kaykan. 26Amparakuyänan markapita yarquptinmi isanqa 27wanuq runapa ayllun tinkur wanusinman. Wanusirpis manami jusayuqsu kanqa. 28Saymi wanusiq runa amparakuyänan markalacho tanqa mandaq cüra wanushqanyaq. Mandaq cüra wanuptinraqmi markanman kutikunqa.
29<< <Kay nishqäkunami ley kaykan. Kay leytami surikikunata maycho tarpis yachasiyanki.
30<< <Wanusikuq runataqa rikaqkuna shimpiptinraqmi wanusiyanki. Juk runala shimpiptinqa ama wanusiyankisu.#Deut. 17.6; 19.15.
31<< <Wanusikuq runa wanuyta mansar qellayta pägayta munaptinpis ama chaskiyankisu. Runa mayinta wanusishqanpita say runataqa wanusiyanki.
32<< <Mana yarpaypa wanusikuq runa amparakuyänan markacho tashqanpita markanman kutiyta munar pägayta munaptinpis ama chaskiyankisu. Mandaq cüra manaraq wanuptinqa say amparakuyänan markalacho tanqa.
33<< <Runa mayinta wanusiq runaqa täyashqayki naciontami impüruyäsin. Saymi wanusikuq runata wanusiyaptikiraq nacionniki purificash kanqa.
34<< <Noqa Tayta Diosmi qamkunawan taykä. Sayno kaykaptinqa tänansipaq kaq nacionta ama impüruyäsiyankisu> >>.
Currently Selected:
Números 35: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
