Números 32

Rubén trïbu y Gad trïbu runakuna posisionta chaskiyashqan

Deuteronomio 3.12-22

1Rubén trïbu y Gad trïbu runakunapa uywankuna aska kaptinmi Jazer partikuna y Galaad partikuna misikuyänanpaq ali kashqanta rikar munapakurkuyarqan. 2Saymi Moisés, Eleazar y wakin mandaqkuna kaykäyashqanman aywaykur Gad trïbu y Rubén trïbu runakuna niyarqan: 3<<Atarot, Dibón, Jazer, Nimra, Hesbón, Eleale, Sebam, Nebo y Beón partikuna 4uywäkunata misikuyänäpaq alimi kaykan. Uywäkuna aska kaptinmi kay partikunata Tayta Dios noqakunapaq shuntash. 5Saymi ruwakuyä kay partikunata aypuykayämänaykipaq. Jordán mayutaqa amana päsasiyämaynasu>>.

6Saymi Moisés nirqan: <<Israel mayinsikuna guërraman aywaykäyaptin ¿imanirtaq qamkuna quëdakuyta munaykäyanki? 7¿Imanirtaq Israel mayinsikunata qelanaykäsiyanki Tayta Dios promitishqan nacionman aywayänanta? 8Cades-barneapita Canaánta rikapakuq kachashqä runakunapis qamkunanömi Israel mayinsikunata desvalorasiyarqan. 9Paykunami rikapakur chäyarqan Escol pampayaq. Kutiskamurmi Israel mayinsikunata shimita qor desvalorasiyarqan Tayta Dios qoykushqan partiman mana yaykuyänanpaq.#Núm. 13.17-33. 10Say achäquimi Tayta Dios fiyupa rabyakushpan nirqan: 11<Egiptupita yarqamuq runakuna ishkay chunka (20) watayuqpita janaman kaqqa mana wiyakuyashqanpitami yaykuyanqasu Abrahamta, Isaacta y Jacobta promitishqä nacionman. 12Cenezeo runa Jefonipa surin Caleb y Nunpa surin Josuélami yärakayämashqanpita say nacionman yaykuyanqa>.

13<<Sayno nirmi Tayta Dios fiyupa rabyakushpan lapan say runakuna ushakäyashqanyaq sunyaq jirkapa chusku chunka (40) watantin purisirqan.#Núm. 14.26-35. 14Kanan ¿qamkunapis Diosta rabyanäsiq unay Israel mayikikunanölaku desvalorasiyta munaykäyanki? Sayno desvalorasiyaptikiqa yapaymi Tayta Dios rabyar contransi rikakunqa. 15Tayta Diosta mana cäsukur kaycho quëdakuyaptikiqa yapaymi sunyaq jirkapa purisimäshun. Saynöpami qamkuna jusayuq kayanki Israel runakuna ushakäyänanpaq>>.

16Moisés sayno niptinmi paykuna niyarqan: <<Uywäkunapaq kaychömi corralta rurayta munaykäyä. Saynölami surïkunata imapis mana päsananpaq markakunatapis sharkasiyta munaykäyä. 17Kay kinraycho taq runakuna mana fastidiayänanpaqmi markäkunata siguraykur surïkunatapis uywäkunatapis kachaykuyäshaq. Nirkurnami kamarikuskir Israel mayinsikuna täyänanpaq kaq partiman chäsiyashqäyaq puntanta aywayäshaq. 18Lapan Israel mayinsikuna posisionninkunata chaskirkuyaptinraqmi kutiyämushaq. 19Kay simpacho posisionkunata chaskiykarqa Jordán mayu simpachöqa mananami manakuyäshaqnasu>>.

20Saymi Moisés nirqan: <<Niyashqaykita cumpliyänayki kaptinqa alimi kanqa. Saymi guërraman aywayänaykipaq kamarikuskir 21Jordán mayu simpancho Tayta Diospa contrankunata ushakäsiyashqaykiyaq pelyayanki. 22Intëru nacioncho kamakaskiyaptinraqmi kutiyämunki. Sayno cumplirqa Tayta Diospa nawpancho y Israel mayinsikunapa nawpanchöpis mananami jusayuqnasu kayanki. Saynöpami kay chakrakuna qamkunapaqna kanqa. 23Mana cumplirmi isanqa Tayta Diospa nawpancho jusayuq kar paypa makinpita imanöpapis qeshpiyankisu. 24Sayno kaptinqa surikikuna quëdayänanpaq markakunata sharkasiyay. Saynöpis uywaykikunapaq corralkunata rurayay. Nirkurnami kikikikuna promitiyashqaykinöla aywayanki>>.

25Saymi Gad trïbu y Rubén trïbu runakuna niyarqan: <<Niyämashqaykita lapantami cumpliyäshaq, taytay. 26Warmïkunata, pishi wamräkunata y uywäkunataqa kay Galaad parti markakunachömi kachaykuyäshaq. 27Noqakunami isanqa niyämashqaykinöla shumaq kamarikuskir Tayta Dios munashqanno guërraman aywayäshaq>>.

28Sayno niyaptinmi cüra Eleazarta, Nunpa surin Josuéta y cada trïbupa mandaqninkunata 29Moisés nirqan: <<Gad trïbu y Rubén trïbu runakunami Jordán mayuta simpar saycho taq runakunata vinciyänaykipaq yanapäyäshunki. Saypitaraqmi Galaad particho kaykaq chakrakunata posisionninkuna aypuyanki. 30Yanapäyäshunaykipaq Jordán mayuta mana päsayaptinqa kay simpacho posisionninkunata ama aypuyankisu, saypa trukanqa Israel mayinkunawan iwal Canaánchöraq posisionninkunata aypuyanki>>.

31Sayno niptinmi Gad trïbu y Rubén trïbu runakuna niyarqan: <<Noqakunaqa Tayta Dios nishqanno lapantami cumpliyäshaq, taytay. 32Saymi guërracho yanapäyänäpaq Jordán mayuta simpar Canaánman yaykuyäshaq. Imano kaptinpis noqakunapa posisionnïkunaqa Jordán mayupita kay simpachömi kanqa>>.#Jos. 1.12-15.

33Sayno niyaptinmi posisionninkunata Moisés entregarqan Gad trïbu, Rubén trïbu y pulan Manasés trïbu runakunata. Manasés trïbu runakuna kayarqan Josépa surin Manaséspita miraqkunami. Manaraq vinciyaptinqa say posisionkuna karqan amorreo runakunapa mandaqnin rey Sehónpa y Basán nacionpa mandaqnin rey Ogpami. Saycho kaq lapan markakunata chakrantintami Moisés entregarqan. 34Saymi Gad trïbu runakuna kikinkunapaq alsayarqan Dibón markata, Atarot markata, Aroer markata, 35Atarot-sofán markata, Jazer markata, Jogbeha markata, 36Bet-nimra markata y Bet-arán markata. Lapan say markakunata jiruruypami murallayarqan. Saynölami cabrankunapaq y uyshankunapaqpis corralkunata rurayarqan.

37Rubén trïbu runakunanami kikinkunapaq alsayarqan Hesbón markata, Eleale markata, Quiriataim markata, 38Nebo markata, Baal-meón markata y Sibma markata. Say markakunapataqa jutinkunatapis trukasiyarqanmi.

39Manaséspa surin Maquirpita miraqkunanami Galaad partiman yaykuyarqan. Paykunami saycho taq amorreo runakunata qarquskir chakrankunata sarikurkuyanqa. 40Saymi Galaad partita Moisés entregarqan Manaséspa surin Maquirpita miraq runakunata. Paykunami saycho täyarqan. 41Saynölami Manaséspa surin Jairpita miraq runakuna amorreo runakunapa wakin taksha markankunata sarikuyarqan. Say partitami jutisiyarqan Havot-jair jutin kananpaq.#32.41 Havot-jair ninanqa Jairpa markankuna ninanmi. 42Noba ayllu runakunanami Kenat partita lapan markankunatawan sarikurkuyarqan. Nirkurmi say partita jutisiyarqan Noba jutin kananpaq.

Currently Selected:

Números 32: qvhB

Highlight

Copy

Compare