Miqueas 4
4
Maysay nacionpitapis Jerusalénman Diosta adoraq aywayänanpaq nishqan
Isaías 2.2-4
1Shamuq watakunachömi Tayta Diospa wayin kaykashqan lömaqa wakin lömakunapita mas respitash kanqa.
Saymanmi maysay nacionpitapis runakuna Tayta Diosta adoraq aywayanqa.
2Saynölami Sión lömapita Tayta Diospa yachasikuyninta maysaymanpis apayanqa.
Jerusalénpita pasami palabranta wilakuyanqa.
Maysay nacionpita runakuna Jerusalénman aywarmi niyanqa:
<<Lapansi wisäshun Tayta Dios akrashqan lömaman.
Jacobpita miraq runakuna yärakuyashqan Tayta Diospa wayinman yaykushun.
Saychömi kikin yachasimäshun mandamientunkunata imano cumplinansipaqpis.
Saynöpami pay munashqanno lapansi kawashun>>.#Isa. 56.6-7; Zac. 8.20-22.
3Aska nación runakuna chikinakuyaptinpis Tayta Diosmi arreglanqa.
Say nacionkuna jatun y mayjina karucho kayaptinpis paymi juzganqa.
Juk markawan juk marka guërrata manami rurayanqanasu.
Maysaychöpis runakuna espädankunapitami planchonkunatana rurasiyanqa.
Lanzankunapitanami ösita rurasiyanqa.#Joel 3.10.
Guërracho pelyayänanpaqpis manami kamarikuyanqanasu.
4Sayno kaptinmi runakuna mana mansariypanami kawayanqa.
Üva jachapa y hïgus jachapa chakincho jawkanami jamapäyanqa.#Zac. 3.10.
Lapanta mandaq Tayta Diosmi sayno kananpaq kashqanta nin.
5Wakin marka runakuna diosninkunaman yärakuyaptinpis noqansiqa munayyuq Tayta Diosninsimanmi imaypis yärakushun.
Israel runakuna markanman kutiyänanpaq nishqan
6 Tayta Diosmi nin:
<<Say junaqqa chakin pakish y oqrakash uyshakunata aylluqnömi castigashqä Israel runakunata shuntamushaq.
7Chakin pakish uyshano kayaptinpis
y juklä markaman qarqush kayaptinpis
yanapäshaqmi markanman kutir munayyuq rikakuyänanpaq.
Nirkurnami Sión lömapita imayyaqpis paykunapa mandaqnin rey kashaq.#Sof. 3.19.
8<<Sión marka, uyshakunata rikachakuna törrino karmi Tayta Dios kuyashqan runakunata ali rikaykanki.
Qamqa yapaymi munayyuq kankipaq.
Kuyashqä Jerusalénpitaqa yapaymi reykuna mandayanqa.
9Sayno kananpaq kaykaptinqa ¿imanirtaq wachay nanaywan qaparaq warmino qaparaykanki?
¿Manaku mandashuqniki rey kan?
¿Yachaq runakuna wanukuyashku?
10Sayno kaptinpis qamcho taq runakunata jäkuq jirkakunapa prësu aparmi Babilonia nacionman chäsiyanqa.
Ay Sión, sayno kananpaq kaptinqa fiyupa lakikur wachay nanaywan qoshpaykaq warmi qaparashqanno qaparay.
Juklä nacionman apayäshuptikipis contraykikunapa makinpitami Tayta Dios salvayäshunki>>.
11Kananqa aska nación runakunami shuntakaykur contrayki sharkuyash.
Paykuna wilanakurmi nikäyan:
<<¡Sión marka ushakaykaqta rikar kushipäshun!>>
12Isanqa say runakuna manami tantiyayansu Tayta Dios imata yarpaykashqantapis.
Manami musyayansu trïguta wirunanpaq ëraman shuntaqno paykunata shuntar castigananpaq kashqanta.
13Tayta Diosmi nin:
<<Sión, trïguta jarusir punshanta ushakäsiyashqanno say nacionkunata ushakäsiy.
Noqami yanapäshayki fiërru waqrayuq y bronci shiluyuq töruno kar aska nacionkunata ushakäsiyänaykipaq.
Nirkurnami suwayashqan riquëzankunatapis shuntamunki.
Saytanami kay pasapa duëñun kaptï noqa Tayta Diospaq apamunki>>.
Currently Selected:
Miqueas 4: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
