Miqueas 3
3
Mana ali autoridäkunata castigananpaq nishqan
1Saypitanami noqa nirqä:
¡Jacobpita miraq runakunapa autoridäninkuna!
¡Israel runakunapa mandaqninkuna!
¡Shumaq wiyayämay!
¿Manaku tantiyakuyanki ali kaqta rurayänaykipaq kashqanta?
2Qamkunaqa alikunata rurayänaykipa trukan mana alikunatami ruraykäyanki.
Saymi runa mayikipa qaranta lushtiqno y tulunpita aysanta shipliqno kaykäyanki.
3Tayta Dios kuyashqan runakunata mikuqnömi kaykäyanki.
Qaranta shipraskir tulunta pakiqnömi kaykäyanki.
Caldukuyänaykipaq aysanta kusuqnömi munashqaykita ruraykäsiyanki.
4Sayno kayashqaykipitami manakuyaptikipis Tayta Dios yanapäyäshunkisu.
Rabyanäsir jusalikuyashqaykipitami rikaytapis munayäshunkisu.
Lula profëtakunata castigananpaq nishqan
5Lula profëtakunami Tayta Dios kuyashqan runakunata lulapaykäyan.
Paykunaqa imatapis aptapaq kaqpaqqa bendición kananpaq kashqantami niyan.
Mana aptapaq kaqpaqmi isanqa maldición kananpaq kashqanta niyan.
Say lula profëtakunatami Tayta Dios nin:
6<<Qamkunataqa imata ruranäpaq kaqtapis manami musyasiyäshaykinasu.
Imano kananpaq kaqtapis manami wilapäyäshaykinasu.
Saymi sakäpakushno kar imata wilakuyänaykipaq kaqtapis musyayankinasu>>.
7Say lula profëtakunaqa pasaypa penqaychömi kayanqa.
Tayta Dios mana tantiyasiptinmi imata wilakuyänanpaqpis shimin tarinqasu.
8Noqatami isanqa Tayta Diospa Espïritun yanapaykäman pay munashqanno wilakunäpaq.
Saymi valornï kan Israel runakuna mana cäsukuq kayashqanta y jusayuq kayashqanta mana mansariypa wilakunäpaq.
Jerusalén marka ushakänanpaq nishqan
9¡Jacobpita miraq runakunapa autoridäninkuna!
¡Israel runakunapa mandaqninkuna!
¡Shumaq wiyayämay!
¿Imanirtaq demandukunata shumaq arreglayankisu?
¿Imanirtaq leykunatapis cumpliyankisu?#Amós 5.7.
10Sayno kayaptikimi Jerusalénchöqa mana ali ruraykunala y wanusinakuyla kaykan.
11Autoridäkunapis ashäkuyta#3.11 Wakin runakunaqa sobornuta niyanmi. apapaqnin kaqlapaqmi favornin sharkuyan.
Cürakunapis qellaypaq kashlami yachasiyan.
Profëtakunapis qellaypaq kashlami wilakuyan.
Sayno kaykarmi niyan: <<Tayta Dios yanapaykämansimi.
Manami ima desgraciapis päsamäshunsu>>.
12Sayno kayashqaykipitami Sión löma#3.12 Sión lömachöqa templumi karqan. imayka barbichash chakrano quëdanqa.
Jerusalén markata ushakäsiptinmi raqälana quëdanqa.
Templutapis juchusiyaptinmi jachakunalana saycho winanqa.#Jer. 26.18.
Currently Selected:
Miqueas 3: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
