Miqueas 1
1
1Moreset markacho taq Miqueastami Tayta Dios revelacionkunacho rikasirqan Samaria markata y Jerusalén markata ima päsananpaq kashqantapis. Sayno rikasirqan Judá nacioncho Jotam#2Rey. 15.32-38; 2Crón. 27.1-7. rey kaykänan wisan, Acaz#2Rey. 16.1-20; 2Crón. 28.1-27. rey kaykänan wisan y Ezequías#2Rey. 18.1—20.21; 2Crón. 29.1—32.33. rey kaykänan wisanmi.
Samaria runakunata Tayta Dios castigananpaq kashqan
2Maysay markakunacho taqkuna, Tayta Dios nishqanta lapayki wiyayay.
Munayyuq Tayta Diosmi sagrädu templunpita pasa jusalikuyashqaykita shimpiyäshunkipaq.
3Täkunanpita shamurmi jirka puntakunapa purinqa.
4Jaruptinmi ninacho cëra suluqno say puntakuna sulunqa.#Sal. 97.5.
Pampakunapis aska yaku aywar raqrayäsishqannömi raqrayash quëdanqa.
5Lapan saykuna kanqa Jacobpita miraq runakuna jusalikuyashqanpitami.
Israel runakuna jinan Samaria markachömi jusalikuykäyan.
Judá runakunapis jinan Jerusalénchömi ïdulukunata adoraykäyan.
6 Tayta Diosmi nin:
<<Samaria markata chipyaq ushakäsiptïmi üvata plantayänalanpaqna kanqa.
Ruminkunata raqrapa qarpasiptïmi cimientulana rikakanqa.
7Contrapartinkuna shamurmi Samaria runakuna adorayashqan ïdulunkunatapis pasaypa pakir ushayanqa.
Qerupita rurash sagrädu kaqkunatapis lapantami rupasiyanqa.
Prostitütakuna gänapakuyashqan qellaywanmi say ïdulukunata rurasiyarqan.
Contrankuna shamurmi say ïdulukunata sulusir qellayta fundiyanqa prostitütakunawan kakur pägayänanpaq>>.
Miqueas lakikushqan
8Tayta Dios sayno castigananpaq kashqanta musyarmi lakikur iksuypa iksur waqaykä.
Qara chakila y qarapächulami lakish puriykä.
Saynöpis chacal aulaqnömi pasaypa waqaykä.
Avestruz qaparaqnömi qaparaykä.
9Samaria markapa qerinqa ima jampiwanpis manami aliyansu.#1.9 Samaria markapa qerinqa Asiria runakuna ushakäsiyashqanmi kaykan.
Say qeriqa Judátapis jukushqami.
Judá mayïkuna täyashqan Jerusalénmanpis chashqami.
10Saytaqa Gat markacho#1.10 Gat markachöqa filisteo runakunami täyarqan. runakunata ama wilapäyaysu.
Desgracia päsamashqansita mana musyayänanpaq ama waqayaysu.
Bet-le-afracho taq runakuna, fiyupa lakikur alpacho qoshpayay.
11Safircho taqkuna, nacionnikipita juklämanmi qarapächulata prësu apayäshunki.
Zaanáncho taqkuna, yanapäyäshunaykipaq manami pipis yarqayämunqasu.
Beteselcho taqkuna, waqayaptikipis manami pipis kuyapäyäshunkisu.
12Marotcho taqkunaqa fiyupami lakikuyanqa pipis salvananta munar.
Paykunamanqa desgracialatami Tayta Dios kachamunqa.
Say desgraciaqa Jerusalén marka punkuyaqmi chanqa.
13Laquischo taq runakuna, qamkunami Israel nación runakunano mas puntata Judá nacioncho jusalikuyarqayki.
Jusalikuyänanpaq Sión runakunatapis qamkunami yachasiyarqayki.
Kananqa qamkunamanmi castïgu chämunqa.
Say castïgupita qeshpiyänaykipaq cawalluykikunaman carrëtaykikunata watayay.
14Imaypis mana kutiyämunaykipaqna Moreset-gat markapita despidikur aywakuyay.
Israel nacionpa mandaqnin reykunaqa Aczib marka runakunamanmi yärakuykäyan.
Sayno yärakuyaptinpis Aczib runakunaman castïgu chaptin say reykunata manami imanöpapis yanapäyanqasu.
15Maresacho taqkuna, qamkunamanmi contraykikunata kachamushaq ushakäsiyäshunaykipaq.
Saymi Israel nacioncho mas rïcukunapis mansarir qeshpiyashpan Adulam machayman pakakuyanqa.
16Jerusaléncho taq runakuna, kuyayashqayki surikikunatami karu nacionman apakuyanqa.
Sayno kananpaq kashqanpita lakikuyashpayki qara putuypa rutukuyay.
Wiskurno kayänaykipaq qara putuypa rutukuyay.
Currently Selected:
Miqueas 1: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
