Mateo 8

Leprawan qeshyaykaqta Jesús aliyäsishqan

Marcos 1.40-45; Lucas 5.12-16

1Lömacho yacharkasir urämuptinmi saysika runakuna Jesústa qatiräyarqan. 2Saychömi leprawan qeshyaykaq runa Jesúspa puntanman qonqurpakuykur nirqan: <<Taytay, voluntäniki kaptinqa aliyaykasilämay>>.

3Sayno ruwakuptinmi Jesús yataykur nirqan: <<Aliyash kanaykita munämi>>.

Sayno niptinmi jinan höra aliyaskirqan. 4Saypitanami Jesús nirqan: <<Aliyäsishqäta ama pitapis wilapankisu. Saypa trukanqa cüraman ayway aliyashqaykita rikashunaykipaq. Nirkur aliyashqaykita musyayänanpaq Moisés qelqashqancho nishqannöla ofrendaykita templuman apay>>.#Lev. 14.1-32.

Capitanpa ashmayninta Jesús aliyäsishqan

Lucas 7.1-10; Juan 4.43-54

5Capernaúm markaman Jesús chaykuptinmi Roma soldädukunapa capitannin ruwakur 6nirqan: <<Ashmaynïmi pasaypa ansa wayïcho jitaraykan, taytay. Manami kuyukunsu. Fiyupami nakaykan>>.

7Sayno niptinmi Jesús nirqan: <<Aliyäsinäpaq aywashun>>.

8Saymi capitán nirqan: <<Taytay, mana Israel runa kaykaptï wayïmanpis manami yaykunkimansu. Ashmaynï aliyänanpaq kaylapita niykulay. 9Noqapis mandamaqnïpa munayninchömi kaykä. Saynölami soldädükunapis munaynïcho kaykäyan. Mayqantapis <saypa ayway> niptï aywan y <shamuy> niptï shamun. Saynölami ashmaynïpis <kayta ruray> niptï ruran>>.

10Sayno niptinmi Jesús kushikur paywan aywaykaq runakunata nirqan: <<Rasunpami nï: Sayjinanpa yärakamaq runataqa manami ni Israel runakunachöpis tarishkäsu. 11Saymi qamkunata nï: Maysay nacionkunapitapis shuntakaykurmi Tayta Dios mandaykashqancho Abrahamwan, Isaacwan y Jacobwanpis jamaykur mikuyanqa.#Luc. 13.29. 12Wakin runakunami isanqa Tayta Dios mandaykashqancho kawayänanpaq kashqanta yarparpis yanawyaykaq sakayman qaykush kayanqa. Saychömi fiyupa waqar kiruntapis uchuyanqa>>.#Mat. 22.13; 25.30; Luc. 13.28.

13Nirkurnami capitanta Jesús nirqan: <<Wayikipa kutikuy. Yärakamashqaykinömi ashmayniki aliyashna kaykan>>.

Say hörami capitanpa ashmaynin aliyarqan.

Pedrupa suedranta Jesús aliyäsishqan

Marcos 1.29-34; Lucas 4.38-41

14Saypita Pedrupa wayinman aywarmi Jesús tarirqan Pedrupa suedran fiebriwan ansa jitaraykaqta. 15Saymi makinta yataykuptin jinan höra aliyaskir mikuyta qararqan.

Aska qeshyaqkunata Jesús aliyäsishqan

Marcos 1.32-34; Lucas 4.40-41

16Pasa sakaykaptinnami Jesúsman apayämurqan supaykuna nakasiyashqan aska runakunata. Say runakunapitami supaykunata Jesús juk shimila qarqurqan. Saynölami tukuy qeshyawan qeshyaykaqkunatapis aliyäsirqan. 17Sayno aliyäsirmi profëta Isaías kayno qelqashqanta cumplirqan:

<<Paymi qeshyansikunata apakush.

Paymi nanayninsikunatapis jorqush>>.#Isa. 53.4.

Qatirayta munaqkunata Jesús tantiyasishqan

Lucas 9.57-62

18Aska runakuna juntapaykuyaptinmi discïpulunkunata Jesús nirqan: <<Wak simpaman päsashun>>.

19 Büquiman yaykuyänanpaqna kaykäyaptinmi ley yachasiq runa Jesústa nirqan: <<Rabí, maypa aywaptikipis qatiräshaykimi>>.

20Sayno niptinmi Jesús nirqan: <<Atuqkunapaqa machayninkuna kanmi. Pishqukunapapis qeshunkuna kanmi. Runapa Surinpami isanqa maycho punuykunalanpaqpis kansu>>.

21Saypitanami juk discïpulun nirqan: <<Qatiränäpaq papänïtaraq puntata pampaskamushaq, taytay>>.

22Saymi Jesús nirqan: <<Wanushkunataqa wanush mayinkuna pampakuyäsun. Qamwanqa jukla aywashun>>.

Wayrapaqpis yakupaqpis Jesús munayyuq kashqan

Marcos 4.35-41; Lucas 8.22-25

23Saypitanami büquiman Jesús wisaptin discïpulunkunapis qepanta wisäyarqan. 24Qochata simpaykäyaptinmi Jesús punukäkurqan. Sayyaqmi fiyupa wayrawan yaku pulchaqyar büquita talpukäsinanpaqna kaykarqan. 25Saymi discïpulunkuna Jesústa rikchasir niyarqan: <<¡Taytay, talpukaykansinami! ¡Salvaykayälämay!>>

26Sayno niyaptinmi Jesús nirqan: <<Janan shonqula yärakuq runakuna, ¿imanirtaq mansakäyanki?>>

Niskirmi sharkurkur wayratawan yakuta olqutuparqan. Olqutupaskiptinmi wayrapis yakupis chawaskirqan. 27Sayta rikarmi discïpulunkuna mansakash niyarqan: <<Yakupis wayrapis sayno cäsunanpaqqa ¡pinataq kay runaqa!>>

Supaykuna löcuyäsiyashqan runakunata aliyäsishqan

Marcos 5.1-20; Lucas 8.26-39

28Qochata simparkurnami Gadara niyashqan partiman chäyarqan. Saychömi supaykuna löcuyäsiyashqan ishkay runakuna panteonpita yarqayämurqan. Paykuna pasaypa mansaypaq kayaptinmi saypaqa pipis päsaqsu. 29Jesústa rikäriyashpanmi sinchipa qaparar niyarqan: <<¡Diospa Surin Jesús! ¡Imatataq noqakunawan munanki! ¿Manaraqpis höräkuna chämuptinku nakasiyämänaykipaq shamushkanki?>>

30Paykunapita mas washaläninchömi saysika kuchikunata misiykäyarqan. 31Saymi supaykuna Jesústa ruwakur niyarqan: <<Kay runakunapita qarqayämarqa taqay kuchikunalaman yaykuyänäpaq kachapaykayälämay>>.

32Ruwakuyashqanta Jesús awniptinmi supaykuna ishkan runakunapita yarquskir say kuchikunaman yaykukuykuyarqan. Saymi kuchikuna löcutäyashpan tunapa cörrir qochaman jeqakurpuyarqan. Saychömi shenqaypa wanuyarqan.

33Sayta rikaykurmi kuchi misiqkuna cörrila markaman wilakuq aywayarqan. Chaykurmi wilakuyarqan löcuyash runakunapita supaykunata Jesús qarqushqanta y kuchikuna qochaman jeqar shenqaypa wanuyashqantapis. 34Saymi lapan runakuna markapita Jesús kaqman aywayarqan. Chaykurmi saypita aywakunanpaq ruwakuyarqan.

Currently Selected:

Mateo 8: qvhB

Highlight

Copy

Compare