Levítico 13

Leprawan qeshyaqkuna imano purificakuyänanpaqpis nishqan

1Moiséstawan Aaróntami Tayta Dios nirqan: 2<<Pipapis qaran jakaptin, chupu pashtaptin, qarancho yuraq yuraq yuriptin, lepra niraq qeri yuriptinqa cüra Aarónman karpis o paypita miraq cüraman karpis apayanqa. 3Cüranami rikanqa runapa qarancho kaykaq qerita. Qerincho kaykaq aqsa yuraqash kaptin y qerin uchkukaptinqa leprami kanqa. Sayno kaptinqa cüra ninqa say runa impüru kashqantami.

4<<Pipapis qaran yuraqash kaptinpis qerin mana uchkukaptin o aqsanpis mana yuraqaptinqa qanchis junaqyaqmi cüra wichqaräsinqa. 5Qanchis junaqtami yapay rikanqa. Qeri mana ajaytaptinqa yapaymi qanchis junaqyaq wichqaräsinqa. 6Qanchis junaqcho qerin sakipaykaqta rikarmi musyanqa qerila kashqanta. Saymi mödananta say qeshyaq taqshakuriptin cüra ninqa püruna kashqanta.

7<<Püru kashqanta cüra nishqanpitaraq qerin miraptinqa cüraman yapaymi kutinqa rikananpaq. 8Qeri miraptin qaran yuraqash kaykaqta rikarmi cüra tantiyanqa leprawan kaykashqanta. Saymi say runa impüru kashqanta ninqa.

9<<Pitapis lepra qeriwan kaykaqta rikarqa cüraman apayanqa. 10Cüranami imano kashqantapis rikanqa. Qaran jakashpan aqsan yuraqaykaqta o qeri yuriykämuqta rikaptinqa 11lepranami kanqa. Sayta rikarmi impüruna kashqanta cüra ninqa. Impüru kashqanta tantiyar amana wichqaräsinqanasu.

12<<Chaki puntanpita uma jirkanyaq say runacho lepra mirashqanta cüra rikarmi 13aliyashqanta o mana aliyashqantapis shumaq tantiyanqa. Yuraqayparaq intëru cuerpun sakipaptinqa aliyashqantami tantiyanqa. Saymi püruna kashqanta ninqa. 14Yapay qeri rikakämuptinmi isanqa impüru kashqanta ninqa. 15Cüra sayno ninqa qeri imanöpis kaykashqanta rikaykurmi. Qeri kaptinqa lepranami kanqa.

16<<Say qeri sakipar yuraqaptinqa cüraman yapay kutinqa. 17Qeri sakipashpan yuraqashqanta rikarqa cüra ninqa püruna kashqantami.

18<<Pipapis qerin aliyaykashqanpita 19yuraqar jakaptin o pukayaptinqa cüraman aywanqa rikananpaq. 20Qerin uchkukash kaykaqta rikar o aqsanpis yuraqash kaykaqta rikarqa impüru kashqantami cüra ninqa. Sayno karqa leprami kaykan. 21Qerin aliyar mana uchkukaptin y aqsanpis mana yuraqaptinqa qanchis junaqmi say runata wichqaräsinqa. 22Qerin ajaytaptinqa impüru kashqantami cüra ninqa. Say qeriqa lepranami kaykan. 23Qerin mana ajaytaptinmi isanqa seralan kashqanta musyanqa. Sayno kaptinqa püru kashqantami cüra ninqa.

24<<Pipis rupakuptin qaran yuraqaptin o pukayaptinqa 25cürami rikanqa. Rupakushqancho aqsan yuraqaptin y qerin uchkukaptinqa leprami kanqa. Sayta rikar cüra ninqa leprawan qeshyar impüru kashqantami. 26Rupakushqan aliyarna aqsanpis mana yuraqaptin y qerinpis uchkukänanpa trukan sakipaptinqa qanchis junaqmi cüra wichqaräsinqa. 27Qanchis junaq päsarkuptin yapaymi cüra rikanqa. Say qeri ansaykaqta rikarqa impüru kashqantami ninqa. Sayqa lepranami kanqa. 28Aliyarqa manami leprasu kanqa, sinöqa rupakushqan seralanmi. Saymi cüra ninqa püruna kashqanta.

29<<Olqupa o warmipa umancho o chakawlancho qeri kaptin 30cürami shumaq rikanqa. Qeri uchkukaptin y qericho kaq aqsan qarwashtaptinqa say runa o say warmi impüru kashqantami cüra ninqa. Umancho o chakawlancho karpis say qeriqa leprami kanqa. 31Say qeri mana uchkukaptin y qarancho yana aqsa mana kaptinqa qeshyaykaq runata qanchis junaqyaq wichqaräsinqa.

32<<Qanchis junaq wichqararkasir yapaymi cüra rikanqa aliyashqanta o mana aliyashqantapis. Qeri mana ajaytaptin, aqsan mana qarwashtaptin y aysan mana kachkakaptinqa 33qeri nawpancho kaq aqsata rutukunanpaqmi cüra ninqa. Qeri kaykashqanta isanqa ama rutukunqasu. Nirkur qanchis junaq yapay wichqaräsinqa. 34Saypitana qerita yapay cüra rikanqa. Qeri mana ajaytaptin ni uchkukaptinqa say runa püru kashqantami ninqa. Mödanankunata taqshakurir pürunami kanqa.

35<<Püru kashqanta nishqanpitaraq say qeri ajaytaptinqa 36cüra yapay rikanqa. Qeri ajaytaykashqanta rikarqa aqsan qarwashyashqantapis mana ashiylapanami say runa impüru kashqanta ninqa. 37Qeri jinalancho sakipaptin y yana aqsana winamuptinqa qeri aliyaykashqantami musyanqa. Sayno kaptinqa qeriwan qeshyaqta püruna kashqantami cüra ninqa.

38<<Olqucho o warmicho karpis kancha yuriptinqa 39ima kashqantapis musyananpaq cüra rikanqa. Oqi oqi karqa yurikuq kanchalami kanqa. Sayno kaptinqa say runa o warmi pürumi kanqa.

40<<Pipapis aqsan ushakaptin qara putu rikakurpis pürumi kanqa. 41Urkulanpa aqsan ushakaptin paqla rikakurpis pürumi kanqa. 42Qara putu kaptinpis o paqla urku kaptinpis pukaypa pukar qeri yurirqa lepranami kanqa. 43Sayno kaptin cürami rikanqa. Cuerpucho lepra yurishqanno yuraqayparaq qeri jakakurkuptinqa 44say runapa umancho lepranami kanqa. Saymi impüru kashqanta cüra ninqa.

45<<Leprawan qeshyaqqa mödananta rachirir qara umala qaqlanta sapakurkur purinqa <¡impürumi kä, impürumi kä!> nir qaparashpan. 46Say runaqa lepran aliyashqanyaq impürumi kanqa. Sayno karqa aliyashqanyaq campamentupita juklächo täkunqa.

47<<Milwapita o lïnupita awash mödanacho karpis, 48milwapita o lïnupita awashcho karpis, qaracho karpis, o qarapita rurashcho karpis 49mupaliqno verdiyaypa pukayaypa yurirqa leprami kanqa. Sayno kaptin ima kashqantapis tantiyananpaq cürata rikasinqa. 50Cüra shumaq rikar mupalishta tarirqa qanchis junaqmi wichqaykunqa. 51Qanchis junaq cumplirkuptinmi yapay rikanqa imano kaykashqantapis musyananpaq. Mödanacho karpis, awacho karpis, qaracho karpis, qarapita rurashcho karpis mupalishqan mas miraptinqa mana aliyaq leprami kanqa. Saykunaqa impürunami kanqa. 52Manana aliyaq lepra kaptin rupasinki mödana kaptinpis, awa kaptinpis, qara kaptinpis o qarapita rurash kaptinpis. 53Mupalishqan manana miraptinmi isanqa 54taqsharkasir qanchis junaqyaq yapay wichqaykunqa.

55<<Taqsharkasir wichqaräsishqantami cüra yapay rikanqa. Mupalishqan mana elaqaptinqa impürumi kanqa. Saymi jananpa karpis rurinpa karpis mupalish kaptinqa rupasinqa. 56Taqshashqanpitaraq cüra rikaptin manchala quëdaptinqa rachiypa jorqurinqa mödanapita kaptinpis, qarapita kaptinpis o awapita kaptinpis. 57Rachir jorqushqanpitaraq mödanacho karpis, awacho karpis, qarapita rurashqancho karpis yapay mupaliptinqa lapanta rupasinqa. 58Isanqa mödanata, awata, qarapita rurashta taqshariptin mupalishqan elaqaptinqa yapaymi taqshanqa. Saypitaqa pürunami kanqa.

59<<Lepra yuriptin say leykuna niyashqannömi ruranqa mödanacho kaptinpis, milwacho kaptinpis, lïnucho kaptinpis, awacho kaptinpis o qarapita rurashcho kaptinpis. Imanöpis kaykashqanta rikaykurmi püru kashqanta o impüru kashqantapis cüra ninqa>>.

Currently Selected:

Levítico 13: qvhB

Highlight

Copy

Compare