Josué 7

Acán jusalikushqan

1Judá trïbupitami Acán jutiyuq runa karqan. Pay karqan Carmipa surin, Zabdipa wilkan y Zerapa shurukta wilkanmi. Jericó markacho kaqta lapanta rupasiyänanpaq Josué nikaptinmi alinnin kaqta pakaylapa Acán apakurqan. Sayno apakushqanpitami Tayta Dios fiyupa rabyakur Israel runakunapa contran rikakurqan.

2Jericó markapitami runakunata Josué kacharqan Hai markata rikapakayämunanpaq. Hai markaqa Bet-elpita inti jeqamunan kaqläpa y Bet-avén marka cercanchömi karqan. Saymi paykuna aywar Hai markata rikapakayämurqan. 3Kutiykamurmi Josuéta wilar niyarqan: <<Lapansiqa ama aywashunsu. Ishkay waranqa (2,000) o kimsa waranqa (3,000) runakunalawanmi Hai runakunata ushakäsishun. Say markachöqa walkalami runakuna taykäyan>>.

4Sayno niyaptinmi Hai markata ushakäsiq Josué kacharqan kimsa waranqatano (3,000) runakunata. Sayno kaptinpis Haicho taq runakuna paykunata vinciyashpanmi qatikachäyarqan. 5Hai markapa punkunpita rumita jorqukuna partiyaq qatikacharmi uraypa qeshpiyaptin kimsa chunka soqta (36) runakunata wanusiyarqan. Saymi Israel runakuna mansarir pelyayta almitiyarqannasu.

6Sayno vinciykuyaptinmi Josué y mayor runakuna lakikuyashpan mödanankunata rachiyarqan y alpatapis umankunaman winakuyarqan. Nirkurnami pasa sakashqanyaq Tayta Diospa babulninpa puntanman lätakuykuyarqan. 7Saychömi Josué nirqan: <<Tayta Dios, kay markakunacho taq amorreo runakuna wanusiyämänanpaqqa ¿imapaqraq Jordán mayutapis päsasiyämarqayki? Saypa trukanqa Jordán mayu wak simpalancho kachaykayämankiman karqan. 8Tayta Dios, conträkuna vinciykäyämaptinqa kanan ¿imataraq Israel mayïkunata nishaq? 9Kananqa sayta wiyaykur kay particho taq cananeo runakuna shuntakaykur chipyaqchir asulaskayämanqa. Sayno asulayämaptinqa ¿imanöparaq runakuna musyayanqa lapanpaq munayyuq kashqaykita?>>

10Josué sayno niptinmi Tayta Dios nirqan: <<¿Imanirtaq lätaraykanki? ¡Sharkuy! 11Nishqäta mana cäsukamarmi Israel runakuna jusayuq kaykäyan. Jericó markacho lapanta rupasiyänanpaq nikaptïpis#Deut. 13.16; Jos. 6.17-19. suwaykurmi toldunkunacho pakaraykäsiyan. Sayno rurayash jusalikuykäyashqanta musyaykarmi. Saynöpami paykunawan pactu rurashqäta manakaqman churayash. 12Saymi contraykikunawan pelyaytapis mana kamäpakur qeshpikuyanki. Jusayuq runata manaraq wanusiptikiqa qamkunata yanapänäpa trukan ushakäsiyäshaykimi.

13<<Jukla aywar runakunata wilay kanan junaq purificakuskir waray junaq nawpäman shayämunanpaq. Qamkunapa Diosniki karmi nï: <Lapanta rupasiyänaykipaq nikaptïpis wayikikunapa apakurmi jusayuq kaykäyanki. Jusayuq runata manaraq wanusirqa manami contraykikunatapis ushakäsiyta kamäpakuyankisu>.

14<<Waray tuta trïbunpa trïbunpa Israel runakuna nawpäman shayämusun mayqan trïbupis jusayuq kashqanta ninäpaq. Saynölami say trïbu runakuna ayllunpa ayllunpa nawpäman shayämunqa mayqan ayllupis jusayuq kashqanta ninäpaq. Nirkurnami say ayllu runakuna castanpa castanpa nawpäman shayämunqa mayqan castanpis jusayuq kashqanta ninäpaq. Say casta runakunanami cada ünun nawpäman shayämunqa mayqanpis jusayuq kashqanta ninäpaq. 15Mayqan runa jusayuq kashqantapis niptïmi wayintapis surinkunatapis y lapan imaykankunatapis rupasiyanki. Say runa pasaypa mana alita rurarmi Israel runakunawan pactu rurashqäta manakaqman churash>>.

Acánta wanusiyashqan

16Sayno niptinmi waraynin tuta saka sakala lapan runakunata shuntaykur Josué nirqan trïbunpa trïbunpa Diospa nawpanman#7.16 Tayta Diospa nawpanman nirqa Tinkuna Tolducho kaykaq altarpa nawpanmanmi nikan. shayämunanpaq. Sayno shayämuptinmi Judá trïbu jusayuq kashqanta Tayta Dios nirqan. 17Judá trïbutanami Josué nirqan ayllunpa ayllunpa Diospa nawpanman shayämunanpaq. Saymi Zera ayllu jusayuq kashqanta Tayta Dios nirqan. Zera ayllu shamuptinnami Zabdi casta jusayuq kashqanta nirqan. 18Zabdi castacho olqu kaqkuna shayämuptinnami Tayta Dios nirqan Acán runa jusayuq kashqanta. Pay karqan Carmipa surinmi. Saynöpis karqan Zabdipa wilkan y Zerapa shurukta wilkanmi. Paykuna kayarqan Judá trïbupitami.

19Saymi Acánta Josué nirqan: <<Tayta Diospa nawpancho mana lulakuylapa rasun kaqlata wilamay, hïju>>.

20Sayno niptinmi Acán nirqan: <<Tayta Diosta mana cäsukurmi jusalikushkä. 21Jericó markaman yaykurmi tarishkä Babiloniacho awash kuyaylapaq jakuta, ishkay pachak (200) qellayta y juk taksha bärra qoritapis. Say qoriqa mediu kïlunömi lasan. Saykunata munaparmi pakaylapa apar toldü rurinman pampaykushkä. Qellaytaqa mas rurinmanmi pampaykushkä>>.

22Sayno niptinmi Acánpa toldunman runakunata Josué kacharqan. Saychömi tariyämurqan lapan pakashqankunata y qellaytapis mas rurincho pakaraykaqta. 23Saykunata apakurkurmi Israel runakuna shuntakäyashqanman aywar Josuéta entregayarqan. Sayta chaskirkurnami Tayta Diospa nawpanman churaykurqan.

24Nirkurnami lapan Israel runakunawan Acánta, suwashqan qellayta, qorita, jakuta, warmi surinkunata y olqu surinkunatapis Acor Pampaman apayarqan. Saynölami paypa kaqtaqa lapanta apayarqan wäkankunata, uyshankunata, cabrankunata, ashnunkunata y tolduntapis. 25Sayman pushaykurmi Josué nirqan: <<¿Imanirtaq kay desgraciaman jitarpayämashkanki? Kananqa kikikitami Tayta Dios desgraciaman jitarpushunki>>.

Sayno niptinmi Israel runakuna Acánta, surinkunata y lapan uywankunatapis samqaypa wanuskasir rupasiyarqan. 26Nirkurnami rupasiyashqan jananman saysika rumikunata qotuyarqan. Say rumikuna kananyaqmi saycho qoturaykan. Say wanusiyashqan junaqpita pasami say pampapa jutin Acor Pampa#7.26 Acor Pampa ninanqa Desgracia Pampa ninanmi. kaykan. Acánta wanuskasiyaptinnami Tayta Diospa rabyanaynin päsarqan.

Currently Selected:

Josué 7: qvhB

Highlight

Copy

Compare